វ៉ាស៊ីនតោន ៖ លោកប្រធានាធិបតីសហរដ្ឋអាមេរិក ដូណាល់ ត្រាំ នឹងកោះប្រជុំ ជាមួយនាយកប្រតិបត្តិឧស្សាហកម្មការពារជាតិ នៅថ្ងៃសុក្រ ទី៦ ខែមីនា…
វ៉ាស៊ីនតោន ៖ លោកប្រធានាធិបតីសហរដ្ឋអាមេរិក ដូណាល់ ត្រាំ នឹងកោះប្រជុំ ជាមួយនាយកប្រតិបត្តិឧស្សាហកម្មការពារជាតិ នៅថ្ងៃសុក្រ ទី៦ ខែមីនា ឆ្នាំ២០២៦ សម្រាប់កិច្ចប្រជុំមួយ ដែលមានគោលបំណងបំពេញបន្ថែម អោយបានឆាប់រហ័ស នូវស្តុកគ្រាប់រំសេវ និងអាវុធរបស់សហរដ្ឋអាមេរិក ដែលបានប្រើប្រាស់ក្នុងសង្គ្រាមប្រឆាំងនឹងអ៊ីរ៉ង់ នេះបើយោងតាមមន្ត្រីសេតវិមានបានបញ្ជាក់ប្រាប់ Military Times ។
ថ្នាក់ដឹកនាំមកពីក្រុមហ៊ុន Lockheed Martin, RTX, L3Harris និងក្រុមហ៊ុនការពារជាតិធំៗផ្សេងទៀត ត្រូវបានគេរំពឹងថា នឹងចូលរួមកិច្ចប្រជុំ នៅស្អែកនេះ ។
កាលពីខែមករា ប្រធានាធិបតី បានចុះហត្ថលេខាលើបទបញ្ជាប្រតិបត្តិមួយ ដោយដាក់សម្ពាធលើអ្នកម៉ៅការការពារជាតិធំបំផុតរបស់អាមេរិក ឱ្យជំរុញការផលិត និងចែកចាយអាវុធ។ អ្នកម៉ៅការ ដែលត្រូវបានចាត់ទុកថា “មានដំណើរការមិនល្អ” នឹងត្រូវដាក់ស្នើផែនការជួសជុល ឬប្រឈមនឹងការបាត់បង់ការគាំទ្រថវិកាពីរដ្ឋាភិបាល ។
ការវាយប្រហារលើកដំបូងរបស់សហរដ្ឋអាមេរិក នៃប្រតិបត្តិការ Epic Fury គេបានឃើញមីស៊ីល និងគ្រាប់រំសេវរាប់ពាន់គ្រាប់ធ្លាក់មកលើអ៊ីរ៉ង់។ លោក ត្រាំ បានណែនាំថា ការវាយប្រហារនេះ នឹងមានរយៈពេលពីបួនទៅប្រាំសប្តាហ៍ ប៉ុន្តែអាច “យូរជាងនេះ” ដោយលោកអះអាងថា យោធាសហរដ្ឋអាមេរិកមាន “ការផ្គត់ផ្គង់អាវុធ គ្មានដែនកំណត់” ។
សេតវិមាន បានបន្ទរសារនោះ កាលពីថ្ងៃពុធ ដោយអះអាងថា ឃ្លាំងអាវុធរបស់អាមេរិកគឺគ្មានដែនកំណត់។ នៅពេលដែលការវាយប្រហារលើកដំបូងកាលពីថ្ងៃសៅរ៍ លើប្រទេសអ៊ីរ៉ង់ មន្ទីរបញ្ចកោណបានប្រមូលផ្តុំកម្លាំងយោធាដ៏ធំបំផុតនៅមជ្ឈិមបូព៌ា មិនធ្លាប់មានទេចាប់តាំងពីសង្គ្រាមអ៊ីរ៉ាក់ ។
លោកស្រី Karoline Leavitt អ្នកនាំពាក្យសេតវិមាន បាននិយាយកាលពីថ្ងៃពុធថា “សហរដ្ឋអាមេរិក មានសមត្ថភាពគ្រប់គ្រាន់ មិនត្រឹមតែអនុវត្តប្រតិបត្តិការ Epic Fury ដោយជោគជ័យប៉ុណ្ណោះទេ ប៉ុន្តែថែមទាំងអាចបន្តទៅមុខទៀត” ។ “យើងមានឃ្លាំងស្តុកអាវុធ ដែលមនុស្សជាច្រើននៅក្នុងពិភពលោកនេះ មិនដឹងអំពីវាផង” ។
ឧត្តមសេនីយ៍ Dan Caine ប្រធានអគ្គសេនាធិការចម្រុះ បានប្រាប់អ្នកយកព័ត៌មាននៅក្នុងសន្និសីទសារព័ត៌មានដាច់ដោយឡែកមួយកាលពីថ្ងៃពុធថា “យើងមានគ្រាប់រំសេវ ដែលមានភាពជាក់លាក់គ្រប់គ្រាន់សម្រាប់ភារកិច្ច ដែលកំពុងធ្វើ ទាំងការវាយលុក និងការពារជាតិ”។ ប៉ុន្តែលោក Caine មិនបានផ្តល់ព័ត៌មានលម្អិតបន្ថែមទេ ។
យោងតាមបញ្ជាការកណ្តាលសហរដ្ឋអាមេរិក បង្ហាញថា កងកម្លាំងអាមេរិកបានវាយប្រហារគោលដៅជិត 2,000កន្លែង ជាមួយនឹងគ្រាប់ជាង 2,000គ្រាប់។ សហរដ្ឋអាមេរិក បានចាត់វិធានការដើម្បីលុបបំបាត់ឃ្លាំង ទីស្នាក់ការកណ្តាល និងសមត្ថភាពទំនាក់ទំនងយោធារបស់កងឆ្មាំបដិវត្តន៍អ៊ីរ៉ង់។ ឥស្សរជនជាន់ខ្ពស់អ៊ីរ៉ង់រាប់សិបនាក់ ត្រូវបានគេរាយការណ៍ថា ត្រូវបានសម្លាប់ រួមទាំងមេដឹកនាំកំពូលលោក Ayatollah Ali Khamenei ក៏ដូចជាបុគ្គលម្នាក់ ដែលរដ្ឋមន្ត្រីក្រសួងការពារជាតិលោក Pete Hegseth បានពិពណ៌នាថា ជាមេផែនការធ្វើឃាតលោក Trump កាលឆ្នាំ២០២០ ។
មន្ត្រីអាមេរិក បាននិយាយថា សាធារណរដ្ឋអ៊ីស្លាម ត្រូវបានប៉ាន់ប្រមាណថា មានមីស៊ីលផ្លោងរយៈចម្ងាយមធ្យមប្រហែល 2,000 ទៅ 3,000 គ្រាប់ ប្រព័ន្ធមីស៊ីលរយៈចម្ងាយខ្លី ចំនួន 6,000 ទៅ 8,000 គ្រាប់ និងយន្តហោះគ្មានមនុស្សបើក រាប់ពាន់គ្រឿង នៅដើមដំបូង នៃសង្គ្រាម។ ចាប់តាំងពីពេលនោះមក ទីក្រុងតេអេរ៉ង់ បានសងសឹកជាមួយនឹងយន្តហោះគ្មានមនុស្សបើក និងមីស៊ីលរាប់រយគ្រឿង ដែលកំណត់គោលដៅលើទីតាំងយោធាអាមេរិក និងគោលដៅប្រទេសជាច្រើននៅទូទាំងតំបន់មជ្ឈិមបូព៌ា ៕
ចែករំលែកព័តមាននេះ