សហរដ្ឋអាមេរិក ៖ សហរដ្ឋអាមេរិកបានធ្វើឱ្យពិភពលោកភ្ញាក់ផ្អើលយ៉ាងខ្លាំង តាមរយៈការផ្លាស់ប្តូរយុទ្ធសាស្ត្រពីការប្រើមីស៊ីលតម្លៃថ្លៃៗភាគច្រើនរបស់ខ្លួន ជំនួសដោយការប្រើដ្រូនអត្តឃាតតម្លៃទាប «LUCAS» ដែលចម្លងតាមដ្រូន «Shahed» របស់អ៉ីរ៉ង់ក្នុងប្រតិបត្តិ្កការណ៍ «Epic…
សហរដ្ឋអាមេរិក ៖ សហរដ្ឋអាមេរិកបានធ្វើឱ្យពិភពលោកភ្ញាក់ផ្អើលយ៉ាងខ្លាំង តាមរយៈការផ្លាស់ប្តូរយុទ្ធសាស្ត្រពីការប្រើមីស៊ីលតម្លៃថ្លៃៗភាគច្រើនរបស់ខ្លួន ជំនួសដោយការប្រើដ្រូនអត្តឃាតតម្លៃទាប «LUCAS» ដែលចម្លងតាមដ្រូន «Shahed» របស់អ៉ីរ៉ង់ក្នុងប្រតិបត្តិ្កការណ៍ «Epic Fury» វាយប្រហារលើប្រទេសនៅមជ្ឈិមបូព៌ាមួយនេះ។ នេះបើយោងតាមប្រភពពីសារព័ត៌មាន Channel News Asia (CNA) ចេញផ្សាយកាលពីថ្ងៃទី៣ ខែមីនា ឆ្នាំ២០២៦។
បច្ចុប្បន្ន ដ្រូនអត្តឃាត «Shahed» របស់អ៉ីរ៉ង់កំពុងដើរតួនាទីយ៉ាងសំខាន់នៅក្នុងសង្គ្រាមរបស់ខ្លួនប្រឆាំងនឹងសហរដ្ឋអាមេរិក និងអ៉ីស្រាអែល។ ទីក្រុងតេហេរ៉ង់បានបាញ់មីស៊ីល និងដ្រូនរាប់រយគ្រាប់នៅទូទាំងតំបន់មជ្ឈិមបូព៌ា បន្ទាប់ពីការវាយប្រហាររបស់អាមេរិក និងអ៉ីស្រាអែល នៅថ្ងៃទី២៨ ខែកុម្ភៈ ឆ្នាំ២០២៦ ដែលបង្ហាញថា ប្រព័ន្ធនេះ ក្លាយជាចំណុចកណ្តាលនៃសៀវភៅយុទ្ធសាស្ត្រយោធារបស់ខ្លួន។
ដូច្នេះ តើដ្រូនអត្តឃាត Shahed របស់អ៉ីរ៉ង់ ដែលត្រូវបានប្រើយ៉ាងទូលំទូលាយរួចទៅហើយដោយ
រុស្ស៊ីនៅក្នុងសង្គ្រាមអ៊ុយក្រែន និងមួយចំនួនបានហោះទៅដល់មូលដ្ឋានទ័ពអាកាសអង់គ្លេសនៅតំបន់ Akrotiri នៃប្រទេសស៊ីបផងដែរនោះ គឺជាអ្វី?
Shahed ជាដ្រូនអត្តឃាតវាយប្រហារមួយផ្លូវដែលមានតម្លៃទាប បង្កើតឡើងដោយអ៉ីរ៉ង់ ដំណើរការជាមីស៊ីលហោះ ឆ្ពោះទៅរកគោលដៅដែលបានកំណត់ជាមុន ហើយផ្ទុះនៅពេលប៉ះទង្គិច។ គុណសម្បត្តិចម្បងរបស់ Shahed គឺទំហំ និងអាចយកឈ្នះលើប្រព័ន្ធការការពារដែនអាកាសមួយចំនួន ដោយអាចហោះពីទិសដៅច្រើនក្នុងពេលតែមួយ ។
នៅពេលដែលមីស៊ីលផ្លោង និងមីស៊ីលលឿនជាងសំឡេងមានតម្លៃរាប់លានដុល្លារក្នុង១គ្រាប់នោះ ងាកមកដ្រូន Shahed ត្រូវបានប៉ាន់ប្រមាណថាតម្លៃចន្លោះពី ២ម៉ឺន ទៅ៥ម៉ឺនដុល្លារអាមេរិកតែប៉ុណ្ណោះក្នុង១គ្រឿង ជាមួយចម្ងាយហោះយ៉ាងហោចណាស់ ២ពាន់គីឡូម៉ែត្រ និងអាចធ្វើដំណើរក្នុងល្បឿនប្រហែល១៨០គីឡូម៉ែត្រក្នុង១ម៉ោង។
បញ្ជាការកណ្តាលសហរដ្ឋអាមេរិក (CENTCOM) បានលើកឡើងនៅក្នុងសេចក្តីថ្លែងការណ៍លើបណ្តាញទំនាក់ទំនងសង្គម X ថា ដ្រូនតម្លៃទាបផលិតដោយអាមេរិក ដែលយកគំរូតាមដ្រូន Shahed របស់អ៉ីរ៉ង់ ឥឡូវនេះ កំពុងផ្តល់ការសងសឹកតបទៅវិញ ។
មន្ទីរបញ្ចកោណបានអះអាងថា ដ្រូនទាំងនេះមានតម្លៃថោក ហើយត្រូវបានផលិតដោយក្រុមហ៊ុនផលិតជាច្រើន ។ បើតាមរូបថតចេញផ្សាយដោយមន្ទីរបញ្ចកោណ អ្នកជំនាញមើលឃើញថា ដ្រូនអាមេរិកចម្លងតាមដ្រូនអ៉ីរ៉ង់គឺ LUCAS ដែលជាដ្រូនអត្តឃាតតម្លៃទាប ផលិតដោយក្រុមហ៊ុនអាមេរិក Spektreworks ដែលមានមូលដ្ឋាននៅទីក្រុងហ្វូនីក (Phoenix) រដ្ឋអារីហ្សូណា (Arizona) តម្លៃប្រហែល៣៥ ០០០ ដុល្លារក្នុង១គ្រឿង ជាមួយចម្ងាយហោះដល់៨០០គីឡូម៉ែត្រ។ ដូច្នេះ ការផ្លាស់ប្តូរយុទ្ធសាស្ត្ររបស់អាមេរិកដ៏ភ្ញាក់ផ្អើលពិភពលោកនេះ បានឆ្លុះបញ្ចាំងពីការសង្កត់ធ្ងន់កាន់តែខ្លាំងឡើងលើប្រសិទ្ធភាពនៃការចំណាយរបស់ខ្លួន៕ ប្រភព ៖ CNA
ចែករំលែកព័តមាននេះ