រាជធានីភ្នំពេញ ៖ ក្រសួងពាណិជ្ជកម្ម តាមរយៈអ្នកនាំពាក្យរបស់ខ្លួន នៅថ្ងៃទី៣ ខែមីនា ឆ្នាំ២០២៦ បានអំពាវនាវដល់បងប្អូនប្រជាពលរដ្ឋ សូមមេត្តាប្រើប្រាស់ប្រេងឥន្ធនៈដោយសន្សំសំចៃ ខណៈតម្លៃប្រេងចាប់ផ្តើមកើនឡើង…
រាជធានីភ្នំពេញ ៖ ក្រសួងពាណិជ្ជកម្ម តាមរយៈអ្នកនាំពាក្យរបស់ខ្លួន នៅថ្ងៃទី៣ ខែមីនា ឆ្នាំ២០២៦ បានអំពាវនាវដល់បងប្អូនប្រជាពលរដ្ឋ សូមមេត្តាប្រើប្រាស់ប្រេងឥន្ធនៈដោយសន្សំសំចៃ ខណៈតម្លៃប្រេងចាប់ផ្តើមកើនឡើង ដោយសារការផ្ទុះសង្គ្រាមនៅតំបន់ដើមបូព៌ា បណ្តាលឱ្យកាត់ផ្តាច់នូវការផ្គត់ផ្គង់ប្រេង ។ ប៉ុន្តែបញ្ហានេះ មិនមានការទាយទុកទេថា តើសង្គ្រាមនេះនឹងអូសបន្លាយយូរប៉ុនណា ?
តាមបណ្តាញព័ត៌មានក្នុងស្រុកមួយបានស្រង់សម្តីឯកឧត្តម ប៉ែន សុវិជាតិ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម ដែលបានបញ្ជាក់ប្រាប់បណ្តាញព័ត៌មាននៅព្រឹកថ្ងៃទី៣ ខែមីនា ឆ្នាំ២០២៦ថា ក្រសួងពាណិជ្ជកម្មដែលជាសេនាធិការរបស់រាជរដ្ឋាភិបាល កំពុងតាមដានយ៉ាងយកចិត្តទុកដាក់ ចំពោះការកើនឡើងនៃតម្លៃប្រេង និងស្តុកប្រេងរបស់ក្រុមហ៊ុននាំចូល ដើម្បីធានាដល់ការផ្គត់ផ្គង់ប្រេងក្នុងប្រទេសកម្ពុជា ។
ឯកឧត្តមបន្ថែមថា ក្នុងករណីតម្លៃប្រេងកើនឡើង ដើម្បីបន្ថយបន្ទុកចំណាយរបស់ប្រជាពលរដ្ឋ រាជរដ្ឋាភិបាលនឹងធ្វើការឧបត្ថម្ភធន ដើម្បីបញ្ចុះថ្លៃប្រេងដល់ប្រជាពលរដ្ឋ ។ បន្ថែមពីនេះ ក្រសួងស្ថាប័នពាក់ព័ន្ធនឹងបន្តប្រឹងប្រែងស្វែងរកប្រភពផ្គត់ផ្គង់ប្រេង ដើម្បីធានាឱ្យការស្តុកប្រេងសម្រាប់រយៈពេល១ខែដូចពេលមុនៗ ។
យ៉ាងណាក៏ដោយ ក្រសួងពាណិជ្ជកម្មក៏រំពឹងថា សង្គ្រាមនៅតំបន់ដើមបូព៌ានឹងបញ្ចប់ក្នុងពេលឆាប់ៗ ដែលនឹងធ្វើឱ្យតម្លៃ និងការផ្គត់ផ្គង់ប្រេងត្រឡប់មករកប្រក្រតីភាពឡើងវិញហើយប្រសិនបើសង្គ្រាមអូសបន្លាយយូរ សង្ឃឹមថា សហរដ្ឋអាមេរិកនឹងបញ្ចេញស្តុកប្រេង ដើម្បីបន្ថយសម្ពាធជាអន្តរជាតិមួយនេះ ។
ភាពតានតឹងនៃការព្រួតគ្នារវាងសហរដ្ឋអាមេរិក និងអ៉ីស្រាអែល វាយប្រហារលើប្រទេសអ៉ីរ៉ង់ កំពុងរុញច្រានស្ថានភាពសេដ្ឋកិច្ចរបស់ពិភពលោកឱ្យស្ថិតក្នុងភាពរង្គោះរង្គើ ។ ជំហានដំបូង ប្រសិនបើអ៉ីរ៉ង់ប្រើប្រាស់យុទ្ធសាស្ត្របិទច្រកសមុទ្រហ័រម៉ូសដូចការព្រមានមែននោះ សេដ្ឋកិច្ចសកលនឹងត្រូវជួបគ្រោះអាសន្នភ្លាមៗ ព្រោះបច្ចុប្បន្នប្រមាណ១/៣នៃការនាំចេញប្រេងតាម
សមុទ្រ និង២០%នៃការនាំចេញឧស្ម័នធម្មជាតិផ្គត់ផ្គង់លើទីផ្សារពិភពលោក គឺសុទ្ធតែត្រូវដឹកជញ្ជូនឆ្លងកាត់ច្រកយុទ្ធសាស្ត្រមួយនេះ ។
ក្នុងចំណោមក្រុមប្រទេសផលិតប្រេង OPEC អ៉ីរ៉ង់គឺជាអ្នកផលិតធំជាងគេលំដាប់ទី៤ ដែលមានសមត្ថភាពផ្គត់ផ្គង់លើសពី៣លានបារ៉ែលក្នុងមួយថ្ងៃ ។ អ្វីដែលសំខាន់បំផុតនោះ គឺភូមិសាស្ត្រនយោបាយរបស់អ៉ីរ៉ង់ ដែលស្ថិតតាមបណ្តោយឆ្នេរនៃច្រកសមុទ្រហ័រម៉ូស បានធ្វើឱ្យប្រទេសនេះមានអំណាចក្នុងការគ្រប់គ្រងផ្លូវទឹកដ៏សំខាន់សម្រាប់តម្លៃទំនិញសកល ។
លោក បូប ម៉ាកណាលី (Bob McNally) អតីតទីប្រឹក្សាថាមពលនៃសេតវិមាន បានព្រមានថា ពិភពលោកមិនត្រូវមើលស្រាលការគំរាមកំហែងសងសឹករបស់អ៉ីរ៉ង់ឡើយ ។ លោកបានព្យាករថា តម្លៃប្រេងឆៅនៅសប្តាហ៍ក្រោយ អាចនឹងហក់ឡើងពី៥ទៅ៧ដុល្លារបន្ថែមទៀតក្នុងមួយបារ៉ែល ។
គួរបញ្ជាក់ថា កាលពីថ្ងៃទី២៦ ខែកុម្ភៈ ឆ្នាំ២០២៦ មុនការវាយប្រហារ តម្លៃប្រេងឆៅអន្តរជាតិបានឡើងថ្លៃ២,៤៥% រួចទៅហើយ ពោលគឺដល់កម្រិត ៧២,៤៨ដុល្លារ ក្នុងមួយបារ៉ែល ។
លោកបានសង្កត់ធ្ងន់ថា ប្រសិនបើច្រកសមុទ្រហ័រម៉ូសលែងមានសុវត្ថិភាព តម្លៃប្រេងអាចនឹងហក់ឡើងលើសពី១០០ដុល្លារក្នុងមួយបារ៉ែល ។ លោកបន្ថែមថា អ៉ីរ៉ង់មានគ្រាប់មីនក្នុងទឹក និងមីស៊ីលរយៈចម្ងាយខ្លីគ្រប់គ្រាន់ ដើម្បីបង្កការរំខានដល់ចរាចរណ៍ទំនិញតាមផ្លូវទឹក ។
កាលពីឆ្នាំ២០២៥កន្លងទៅ ច្រកសមុទ្រនេះបានបម្រើការដឹកជញ្ជូនប្រេងរហូតដល់១៤លានបារ៉ែលក្នុងមួយថ្ងៃ ហើយក៏ជាដង្ហើមសេដ្ឋកិច្ច ដ៏មមារញឹកសម្រាប់ការដោះដូរពាណិជ្ជកម្មរវាងតំបន់ដើមបូព៌ាជាមួយចិន ឥណ្ឌា ជប៉ុន និងកូរ៉េខាងត្បូងផងដែរ ៕
ចែករំលែកព័តមាននេះ