ទីក្រុងវ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានគំរាមឈប់ធ្វើពាណិជ្ជកម្មទាំងអស់ជាមួយប្រទេសអេស្ប៉ាញ បន្ទាប់ពីប្រទេសនេះបានហាមឃាត់សហរដ្ឋអាមេរិកមិនឱ្យប្រើមូលដ្ឋានទ័ពរបស់ខ្លួនជាផ្នែកមួយនៃប្រតិបត្តិការវាយប្រហារលើប្រទេសអ៊ីរ៉ង់។…
ទីក្រុងវ៉ាស៊ីនតោន ៖ ប្រធានាធិបតីអាមេរិក លោក ដូណាល់ ត្រាំ (Donald Trump) បានគំរាមឈប់ធ្វើពាណិជ្ជកម្មទាំងអស់ជាមួយប្រទេសអេស្ប៉ាញ បន្ទាប់ពីប្រទេសនេះបានហាមឃាត់សហរដ្ឋអាមេរិកមិនឱ្យប្រើមូលដ្ឋានទ័ពរបស់ខ្លួនជាផ្នែកមួយនៃប្រតិបត្តិការវាយប្រហារលើប្រទេសអ៊ីរ៉ង់។ នេះបើយោងតាមប្រភពពី BBC បានចេញផ្សាយនៅថ្ងៃទី៤ ខែមីនា ឆ្នាំ២០២៦។
នៅក្នុងការអត្ថាធិប្បាយនៅសេតវិមាន លោក ត្រាំ បានឱ្យដឹងថា អេស្ប៉ាញ គឺជាប្រទេសដ៏អាក្រក់មួយ ហើយថា អាមេរិកនឹងកាត់ផ្តាច់ពាណិជ្ជកម្មទាំងអស់ជាមួយប្រទេសនេះ។ ដោយលោកបានប្រាប់អ្នកយកព័ត៌មានថា «យើងមិនចង់មានអ្វីពាក់ព័ន្ធជាមួយប្រទេសអេស្ប៉ាញទេ»។
យ៉ាងណាមិញ វាមិននៅច្បាស់ទេថា តើរដ្ឋបាលលោក ត្រាំ នឹងបន្តតាមការគំរាមកំហែងនេះ ឬមន្ត្រីអាមេរិកនឹងចាត់វិធានការដើម្បីរារាំងពាណិជ្ជកម្មជាមួយនឹងប្រទេសអេស្ប៉ាញដែលជារដ្ឋសមាជិកសហភាពអឺរ៉ុប (EU)។
ការអត្ថាធិប្បាយរបស់លោក ត្រាំ នេះ បានបន្ថែមទៅលើភាពតានតឹងដែលមានស្រាប់រវាងប្រទេសទាំងពីរ រួមទាំងការតស៊ូរបស់រដ្ឋាភិបាលអេស្ប៉ាញចំពោះការទាមទាររបស់លោក ត្រាំ សម្រាប់សម្ព័ន្ធមិត្តណាតូ ដើម្បីបង្កើនការចំណាយលើវិស័យការពារជាតិរបស់ពួកគេ។
លោក ត្រាំ បានបញ្ជាក់កាលពីថ្ងៃទី៣ ខែមីនា ឆ្នាំ២០២៦ (ម៉ោងនៅសហរដ្ឋអាមេរិក) ថា «ខ្ញុំអាច នៅថ្ងៃស្អែក ឬថ្ងៃនេះ បញ្ឈប់អ្វីៗគ្រប់យ៉ាងទាក់ទងនឹងអេស្ប៉ាញ និងអាជីវកម្មទាំងអស់ទាក់ទងនឹងអេស្ប៉ាញ»។ លោក ត្រាំ និងរដ្ឋមន្ត្រីក្រសួងរតនាគារអាមេរិក លោក Scott Bessent ទាំងពីរនាក់បានអះអាងថា សហរដ្ឋអាមេរិកអាចដាក់ទណ្ឌកម្មស្របច្បាប់លើផលិតផលដែលនាំចូលពីអេស្ប៉ាញ។
នៅថ្ងៃដដែលនោះ លោក ត្រាំ ក៏បានសម្តែងការខកចិត្តចំពោះរដ្ឋាភិបាលអេស្ប៉ាញដែលបានបដិសេធមិនបង្កើនការចំណាយលើវិស័យការពារជាតិដល់ ៥% នៃផលិតផលក្នុងស្រុកសរុប (GDP) របស់ខ្លួន ផ្ទុយពីប្រទេសអឺរ៉ុបជាច្រើនទៀតដែលបានយល់ព្រម។ ដ្បិតកន្លងមកលោក ត្រាំ បានណែនាំថា ប្រទេសអេស្ប៉ាញគួរតែប្រឈមមុខនឹងការដាក់ទណ្ឌកម្មសេដ្ឋកិច្ច៕
ចែករំលែកព័តមាននេះ