ខេត្តបាត់ដំបង ៖ ទំនងមាន«វិបត្តិស្នេហ៏» យុវតីដែលទើបមានអាយុ១៦ឆ្នាំ បានងើបពីព្រលឹមជិះម៉ូតូមកលោតទឹកសម្លាប់ខ្លួននៅស្ទឹងសង្កែ ខាងមុខសាលាខេត្តបាត់ដំបង បណ្ដាលឲ្យស្លាប់ តែបានបន្សល់ទុកស្បែកជើង និងម៉ូតូនៅលើស្ពាន បង្កឲ្យមានការភ្ញាក់ផ្អើល…
ខេត្តបាត់ដំបង ៖ ទំនងមាន«វិបត្តិស្នេហ៏» យុវតីដែលទើបមានអាយុ១៦ឆ្នាំ បានងើបពីព្រលឹមជិះម៉ូតូមកលោតទឹកសម្លាប់ខ្លួននៅស្ទឹងសង្កែ ខាងមុខសាលាខេត្តបាត់ដំបង បណ្ដាលឲ្យស្លាប់ តែបានបន្សល់ទុកស្បែកជើង និងម៉ូតូនៅលើស្ពាន បង្កឲ្យមានការភ្ញាក់ផ្អើល នៅម៉ោងជាង៥ព្រឹកថ្ងៃទី ០៣ មិនា ត្រង់ចំណុចស្ពានសម្ដេច ហ៊ុន សែន ក្នុងសង្កាត់ស្វាយប៉ោ ក្រុងបាត់ដំបង ។
យោងតាមរបាយការណ៍បឋមរបស់សមត្ថកិច្ចបានឲ្យដឹងថា យុវតីដែលលោតទឹកធ្វើ «អត្តឃាត»នោះ ឈ្មោះ ប៉ែន រតនាពិកែវ អាយុ១៦ឆ្នាំ ជាបុគ្គលិកបំរើការនៅហាង«សមុទ្រប៊ូហ្វេ» រស់នៅភូមិអូរតាគាំ១ សង្កាត់ទូលតាឯក ក្រុងបាត់ដំបង ។
របាយការណ៍បានឲ្យដឹងទៀតថា នារីរងគ្រោះបានសម្រេចចិត្តធ្វើអត្តឃាតខ្លួនឯង លោតទឹកសម្លាប់ខ្លួន ដោយសារតែនាងមាន «វិបត្តិស្នេហា» ។ នេះបើតាមសមត្ថកិច្ចស្រង់សម្ដីសាច់ញាតិ និងប្រភពពីអ្នកស្គាល់នាង ។
ស្ថិតក្នុងហេតុការណ៏ដ៏រន្ធត់នេះ បើតាមសមត្ថកិច្ចថា អ្នកដើរហាត់ប្រាណបានប្រទះឃើញនារីវ័យក្មេងរូបនេះដំបូងគេ ដែលបានលោតទឹកសម្លាប់ខ្លួននៅស្ទឹងសង្កែ។ សាក្សីនិយាយថា ដំបូងគេឃើញនាងជិះម៉ូតូមកឈប់លើស្ពានទាំងព្រឹក តែគេមិននឹកស្មានថា នាងមកលោតទឹកទេ លុះបន្តិចក្រោយមកស្រាប់តែនាងឡើងលើបង្កាន់ដៃស្ពានលោតចូលទឹកស្ទឹងបាត់ខ្លួនឈឹងភ្លាមៗតែម្ដង ។
គេបានរាយការណ៍ភ្លាមៗទៅកាន់សមត្ថកិច្ច ដើម្បីជួយអន្តរាគមន៏ និងស្វែងរកសាច់ញាតិ។លុះបន្តិចក្រោយមក ក៏ឃើញក្រុមគ្រួសារនាងមកដល់ចុះរាវរកឃើញនាងនៅក្នុងទឹកភ្លាមៗដែរ តែនាងបានស្លាប់ទៅហើយ ។
នៅកន្លែងកើតហេតុ គេឃើញសាច់ញាតិ និងក្រុមគ្រួសារដែលបានមកស្រង់យកសាកសពនាងពីក្នុងទឹក ម្នាក់បានស្រែងទ្រហោយំបោកខ្លួន ស្ដាយស្រណោះនាង ។ តាមការផ្ដល់ចម្លើយ សាច់ញាតិហាក់មិនបានដឹងពីដំណើររឿងនេះជាក់លាក់ទេ ដែលនាំឲ្យនារីវ័យជំទង់រូបនេះ សម្រេចចិត្តធ្វើអត្តឃាតខ្លួនឯងដោយលោតទឹក ។
និយាយបណ្ដើរស្រែកយំសោកសង្រេងបណ្ដើរ តាមរយៈប្អូនស្រីរបស់នាង គ្រាន់តែបានផ្ដល់ចម្លើយខ្លីថា «ម្ដាយ ឪពុកនាង មិនមានរឿងអ្វីជាមួយបងស្រីនាងទេ (ជនរងគ្រោះ) ។ ក្រោយចេញពីធ្វើការវិញ កាលពីយប់មិញ នាងបានសុំម្ដាយដើរលែងជាមួយមិត្តភក្ដិ ។ ហើយពេលត្រឡប់មកវិញ ក៏មិនមានរឿងអ្វីដែរ ស្រាប់តែព្រឹកឡើងគាត់ជីះម៉ូតូទៅលោតទឹកសម្លាប់ខ្លួន» ។ ប៉ុន្តែប្រភពដែលស្គាល់នាងបានបង្ហើបឲ្យដឹងថា ការសម្រេចធ្វើអត្តឃាតរបស់យុវតីវ័យជំទងរូបនេះ ទំនងអាចពាក់ព័ន្ធនឹង«វិបត្តិស្នេហា»។
យ៉ាងណាក្ដី នេះគ្រាន់តែជាអំណាស់អំណាងក្រៅផ្លូវការ ដែលមិត្តភក្ដិរបស់នាង បានបង្ហើបឲ្យដឹងតែប៉ុណ្នោះ រីឯរឿងរ៉ាវពិតប្រាកដបែបណា មានតែសាមីខ្លួន និងក្រុមគ្រួសារនាងតែប៉ុណ្ណោះ ទើបដឹងច្បាស់ ។
បើតាមសមត្ថកិច្ចបានបញ្ជាក់ចុងក្រោយថា ក្រៅពីម៉ូតូ០១គ្រឿង និងស្បែកជើង០១សម្រាប់ សមត្ថកិច្ចក៏ប្រទះឃើញកូនកាំបិត០១ដែរ ដែលនារីរងគ្រោះបន្សល់ទុក មុនពេលនាងលោតទឹកសម្លាប់ខ្លួន៕
ចែករំលែកព័តមាននេះ