ទីក្រុងតេអេរ៉ង់៖ នៅពេលសង្គ្រាមរវាងអ៊ីរ៉ង់ទល់នឹងអាមេរិក និងអ៊ីស្រាអែលបន្តឆាបឆេះយ៉ាងក្ដៅគគុក មានករណីក្រុមសម្ព័ន្ធដូចគ្នាបាញ់ច្រឡំទៅលើយន្តហោះរបស់គ្នាឯង។ អគ្គបញ្ជាការដ្ឋានកងទ័ពអាមេរិកបញ្ជាក់ថាគុយវែតបានបាញ់ដោយច្រឡំដៃទៅលើយន្តហោះចម្បាំងអាមេរិកបីគ្រឿងបណ្ដាលឱ្យឆេះខ្ទេចគ្មានសល់។ នៅម៉ោង១១:០៣យប់មិញ យន្តហោះស៊េរីចាស់ម៉ាកអែហ្វ១៥ (F-15) ចំនួនបីគ្រឿងបានបើកការហោះហើរជាលក្ខណៈគាំទ្រដល់ប្រតិបត្តិការសឹកអាមេរិកដែលមានឈ្មោះថាអូប៉ឺរ៉េសឹន អេពីក ព្យូរី (Operation Epic Fury)។
នៅអំឡុងពេលបើកប្រតិបត្តិការសឹកនោះ អ៊ីរ៉ង់ក៏បញ្ជូនយន្តហោះ, មីស៊ីល និងដ្រូនទៅវាយប្រហារបណ្ដាប្រទេសសម្ព័ន្ធមិត្តអាមេរិកនៅមជ្ឈិមបូព៌ា។ ម៉្លោះហើយ យន្តហោះចម្បាំងរបស់អាមេរិកទាំងនោះត្រូវបានបាញ់ទម្លាក់ទាំងភាន់ច្រឡំព្រោះប្រព័ន្ធការពារដែនអាកាសត្រូវការប្រុងប្រយ័ត្នខ្ពស់។ ដូច្នេះឱ្យតែយន្តហោះ ឬមីស៊ីលហោះកាត់ត្រូវតែបាញ់ទម្លាក់ហើយ។
អាមេរិក និងអ៊ីស្រាអែលបន្តវាយប្រហារគោលដៅជាច្រើនកន្លែងនៅអ៊ីរ៉ង់ដើម្បីផ្ដួលរំលំរដ្ឋាភិបាលដែលគ្រប់គ្រងប្រទេសតាមបែបសាសនានិយមរបស់លោកអាយ៉ាតូឡា អាលី ខាមេនី (Ayatollah Ali Khamenei)។ អ៊ីរ៉ង់ទោះបីមានតែម្នាក់ឯងក៏ដោយក៏ត្រូវតែវាយបកវិញជាដាច់ខាត។ ពេលខ្លះ អ៊ីរ៉ង់មិនត្រឹមតែវាយប្រហារគោលដៅយោធារបស់អ៊ីស្រាអែល និងអាមេរិកប៉ុណ្ណោះទេ ថែមទាំងវាយប្រហារទីតាំងរបស់ជនស៊ីវិលផងដែរ។
នៅក្នុងករណីគុយវែតបាញ់ធ្លាក់យន្តហោះអាមេរិកទាំងបីគ្រឿងនោះ អាកាសយានិកសរុប៦នាក់អាចចុចគន្លឹះឆ័ត្រយោងរលាស់ខ្លួនចេញពីយន្តហោះដោយសុវត្ថិភាពគ្រប់ៗគ្នា។ គុយវែតប្រកាសទទួលស្គាល់ថាខ្លួនពិតជាបានបាញ់ធ្លាក់យន្តហោះទាំងនោះមែន។ ទោះជាយ៉ាងណាក្ដី អាមេរិកនៅតែអរគុណកិច្ចខិតខំប្រឹងប្រែងរបស់យោធាគុយវែតដែលតែងតែផ្ដល់ការគាំទ្រចំពោះប្រតិបត្តិការសឹកវាយប្រហារអ៊ីរ៉ង់លើកនេះ។ រហូតមកដល់ពេលនេះ គេមិនទាន់ដឹងច្បាស់ថាមូលហេតុអ្វីបានប្រព័ន្ធការពារដែនអាកាសគុយវែតបាញ់ច្រឡំបែបនេះទេ៕ ប្រភព៖ ប៉ូលីទីកូ (Politico) និងប្រភពដទៃទៀត
ចែករំលែកព័តមាននេះ