ខេត្តបាត់ដំបង ៖ ក្រុមយុវជនវង្វេងផ្ទះ ដែលមួយចំនួនបង្ហាញពីសកម្មភាពបែបក្មេងទំនើង និងមួយចំនួនទៀតកំពុងប្រើប្រាស់ថ្នាំញៀននៅក្នុងប្លុកស្ថានីយរថភ្លើង ត្រូវកម្លាំងការិយាល័យជំនាញនៃស្នងការខេត្ត ចុះធ្វើរដ្ឋបាលឡោមព័ទ្ធក្របួចបានជាង៣០នាក់ ក្នុងរយៈពេលជាង៣ម៉ោង ហើយបាននាំទៅកាន់ស្នងការខេត្ត ដើម្បីសួរនាំតាមលំដាប់លំដោយ…
ខេត្តបាត់ដំបង ៖ ក្រុមយុវជនវង្វេងផ្ទះ ដែលមួយចំនួនបង្ហាញពីសកម្មភាពបែបក្មេងទំនើង និងមួយចំនួនទៀតកំពុងប្រើប្រាស់ថ្នាំញៀននៅក្នុងប្លុកស្ថានីយរថភ្លើង ត្រូវកម្លាំងការិយាល័យជំនាញនៃស្នងការខេត្ត ចុះធ្វើរដ្ឋបាលឡោមព័ទ្ធក្របួចបានជាង៣០នាក់ ក្នុងរយៈពេលជាង៣ម៉ោង ហើយបាននាំទៅកាន់ស្នងការខេត្ត ដើម្បីសួរនាំតាមលំដាប់លំដោយ ។
តាមរយៈរបាយការណ៍សមត្ថកិច្ចបានឲ្យដឹងថា កិច្ចប្រតិបត្តិការនេះ បានធ្វើឡើងចាប់ពីវេលាម៉ោង៣ និង៣០នាទីរសៀល រហូតដល់ម៉ោង៦ល្ងាចថ្ងៃទី ០១ មីនា ដោយកម្លាំងអន្តរាគមន៍បង្ការបង្ក្រាបនៃស្នងការខេត្ត ក្រោមបទបញ្ជាផ្ទាល់របស់លោកស្នងការខេត្ត និង ដឹកនាំកិច្ចប្រតិបត្តិការដោយលោកឈឿង គឹមសុង ស្នងការរងទទូលផែនព្រហ្មទណ្ឌ បានចុះធ្វើរដ្ឋបាល នៅក្នុងប្លុកស្ថានីយរថភ្លើង ក្នុងក្រុងបាត់ដំបង ។
ក្នុងកិច្ចប្រតិបត្តិការដែលមិនធ្លាប់មាននេះ កម្លាំងសមត្ថកិច្ច បានរកឃើញយុវជនប្រមូលផ្ដុំគ្នាជាក្រុមៗយ៉ាងពពាក់ពពូន ។ ក្រុមខ្លះបានបង្ហាញពីសកម្មភាពបែបក្មេងទំនើង រីឯក្រុមខ្លះទៀតបែរជាប្រមូលផ្ដុំគ្នាសេពថ្នាំញៀនយ៉ាងអនាធិបតេយ្យនៅតាមទីកន្លែងបិទបាំង ទាំងថ្ងៃៗនៅក្នុងស្ថានីយរថភ្លើង ។
សមត្ថកិច្ចបានចំណាយពេលជាង៣ម៉ោង ដើម្បីតាមប្រមូលក្រុមមនុសុ្សវង្វេងផ្ទះ និងប្រើប្រាស់ថ្នាំញៀនទាំងនោះ ដោយប្រមូលបានសរុបចំនួន៣៣នាក់ ហើយនាំពួកគេទៅកាន់ស្នងការខេត្ត ដើម្បីសួរនាំ ។
លោក ឈឿង គឹមសុង ស្នងការរងទទូលផែនព្រហ្មទណ្ឌដែលដឹកនាំកិច្ចប្រតិបត្តិការនេះ បានប្រាប់ថា ក្រុមយុវជនទាំងអស់ខាងលើនេះ ភាគច្រើនមិនមែនពួកគេមានផ្ទះនៅក្នុងប្លុកស្ថានីយរថភ្លើងទេ ។ ពួកគេខ្លះបានប្រមូលផ្ដុំគ្នាជាក្រុមៗបង្ហាញពីសកម្មភាពបែបក្មេងទំនើង រីឯខ្លះទៀតផ្ដុំគ្នាប្រើប្រាស់ថ្នាំញៀនយ៉ាងអនាធិបតេយ្យបំផុត ។
លោក ឈឿង គឹមសុង បានបញ្ជាក់ថា នៅពេលនាំពួកគេមកដល់ស្នងការ ក្រោយពីសួរនាំ និងធ្វើតេស្ដទឹកនោម មន្ត្រីជំនាញបានរកឃើញពួកគេស្ទើរជាងពាក់កណ្ដាលមាន«ផ្ទុកសារធាតុញៀន» ។
នៅក្នុងកិច្ចប្រតិបត្តិការតាមក្របួច.ក ក្រុមក្មេងអន្ធពាលយកមកដុះក្អែលនេះ បើតាមប្រភពពីសមត្ថកិច្ចដែរបានទម្លាយថា ពេលចុះទៅដល់ក្នុងស្ថានីយរថភ្លើងភ្លាម កម្លាំងសមត្ថកិច្ចដែលស្លៀកស៊ីវិល ត្រូវបានអ្នកលក់គ្រឿងញៀនបោយដៃហៅឲ្យទិញ «ថ្នាំញៀន» ដូចហៅទិញស្ករគ្រាប់ លុះចូលទៅមើលឃើញសុទ្ធតែពួកជក់ថ្នាំ ។
បានន័យថា នៅក្នុង«ប្លុកស្ថានីយរថភ្លើង»ក្នុងក្រុងបាត់ដំបង បច្ចុប្បន្ននេះ ពោពេញទៅដោយអ្នកលក់ដូរ និងប្រើប្រាស់ថ្នាំញៀនយ៉ាងអានាធិបតេយ្យបំផុត នៅពេលកម្លាំងជំនាញព្រហ្មទណ្ឌនៃស្នងការខេត្ត ចុះក្របួចបានជាង៣០នាក់បែបនេះ ទើបដឹងថា នៅក្នុង«ស្ថានីយរថភ្លើង»សព្វថ្ងៃជាសំបុកជូញដូរ និងប្រើប្រាស់ថ្នាំញៀន ។
តើមន្ត្រីប្រឆាំងគ្រឿងញៀនដែលចុះទៅអើតមើល ឬដែលចុះទៅបង្អើលម្ដងណាដែរឬអត់? ប៉ុន្តែយ៉ាងណា ពាក់ព័ន្ធនឹងក្រុមយុវជន៣៣នាក់ ដែលមន្ត្រីជំនាញព្រហ្មទណ្ឌប្រមូលបានខាងលើនេះ បើតាមលោក ឈឿង គឹមសុង បានប្រាប់ថា ក្នុងចំណោមមនុស្សចំនួន៣៣នាក់ដែលត្រូវបាននាំមកសួរនាំ មានយុវជនចំនួន១៨នាក់ ត្រូវបានរកឃើញថា មាន«ផ្ទុកសារធាតុញៀន» ។
ត្រង់ចំណុចនេះ លោកស្នងការរងបានបញ្ជាក់ថា យោងតាមគោលការណ៍លោកស្នងការខេត្ត អ្នកមានសារធាតុញៀន នឹងត្រូវបញ្ជូនបន្តទៅប្រគល់ឲ្យការិយាល័យប្រឆាំងគ្រឿងចាត់ការតាមនីតិវិធី ។
ក្រៅពីនេះ ដែលពុំមានបទល្មើស លោកស្នងការបានបញ្ជាឲ្យអញ្ជើញអាណាព្យាបាលមកធានាពួកគេត្រឡប់ទៅផ្ទះវិញ និងធ្វើកិច្ចសន្យាបញ្ឈប់ការប្រមូលផ្ដុំគ្នា ដែលបង្ហាញពីសកម្មភាពបែបក្មេងទំនើង ។ ជាពិសេស ប្រមូលផ្ដុំគ្នានៅតំបន់ដែលមានពាក់ព័ន្ធនឹងសកម្មភាពការជូញដូរ និងប្រើប្រាស់គ្រឿងញៀន ដូចនៅក្នុងស្ថានីយរថភ្លើងនេះជាដើម៕
ចែករំលែកព័តមាននេះ