មួយថ្ងៃ មុនសហរដ្ឋអាមេរិកចាប់ដៃអ៉ីស្រាអែលផ្លោងមីស៊ីលដាក់អ៉ីរ៉ង់ មានការព្យាករណ៍ថា កម្ពុជារំពឹងថា នឹងទទួលបានអ្នកដំណើរតាមផ្លូវអាកាសចំនួន៨លាននាក់នៅឆ្នាំនេះ។ ប៉ុន្តែ តើការប្រយុទ្ធគ្នានោះ នឹងប៉ះពាល់ដល់វិស័យទេសចរណ៍កម្ពុជាឬទេ? អ្នកនៅក្នុងវិស័យដឹកជញ្ជូនតាមផ្លូវអាកាសម្នាក់បានអះអាងថា ជើងហោះហើរទៅតំបន់មជ្ឈឹមបូព៌ាជាច្រើនត្រូវលុបចោល…
មួយថ្ងៃ មុនសហរដ្ឋអាមេរិកចាប់ដៃអ៉ីស្រាអែលផ្លោងមីស៊ីលដាក់អ៉ីរ៉ង់ មានការព្យាករណ៍ថា កម្ពុជារំពឹងថា នឹងទទួលបានអ្នកដំណើរតាមផ្លូវអាកាសចំនួន៨លាននាក់នៅឆ្នាំនេះ។ ប៉ុន្តែ តើការប្រយុទ្ធគ្នានោះ នឹងប៉ះពាល់ដល់វិស័យទេសចរណ៍កម្ពុជាឬទេ?
អ្នកនៅក្នុងវិស័យដឹកជញ្ជូនតាមផ្លូវអាកាសម្នាក់បានអះអាងថា ជើងហោះហើរទៅតំបន់មជ្ឈឹមបូព៌ាជាច្រើនត្រូវលុបចោល ហើយកម្ពុជាក៏មានសេវាកម្មដឹកជញ្ជូនផ្លូវអាកាសទៅទីនោះដែរ។ ដូច្នេះ ចង់មិនចង់ វានឹងជះឥទ្ធិពលដល់វិស័យដឹកជញ្ជូនផ្លូវអាកាសកម្ពុជា ។
នៅមុនផ្ទុះការប្រយុទ្ធគ្នានេះ កម្ពុជាត្រូវបានគេរំពឹងថា នឹងទទួលបានអ្នកដំណើរតាមផ្លូវអាកាសចំនួន៨លាននាក់នៅឆ្នាំ២០២៦នេះ ខណៈឆ្នាំ២០២៥កន្លងទៅ គឺសម្រេចបានត្រឹម៦,៩៨លាន
នាក់។
សារព័ត៌មានបរទេសធំៗបានរាយការណ៍ថា ក្រោយការវាយប្រហារក្រុមហ៊ុនអាកាសចរណ៍សកលបានប្រកាសផ្អាកជើងហោះហើរនៅទូទាំងមជ្ឈិមបូព៌ានៅថ្ងៃសៅរ៍ ។
ផែនទីហោះហើរបានបង្ហាញថា ដែនអាកាសលើអ៉ីរ៉ង់ស្ទើរតែទទេស្អាត ខណៈដែលអ៉ីស្រាអែលបាននិយាយថា ខ្លួនបានវាយប្រហារអ៉ីរ៉ង់ ហើយយោធាអាមេរិកបានផ្តួចផ្តើមការវាយប្រហារជាបន្តបន្ទាប់ប្រឆាំងនឹងគោលដៅនៅក្នុងប្រទេសនេះ ដោយឡែក អ៉ីរ៉ង់បានសងសឹកដោយការបាញ់មីស៊ីលជាច្រើនគ្រាប់ផងដែរ។
ដោយសារដែនអាកាសរុស្ស៊ី និងអ៊ុយក្រែនត្រូវបានបិទក្រុមហ៊ុនអាកាសចរណ៍ភាគច្រើនប្រើប្រាស់ដែនអាកាស មជ្ឈិមបូព៌ា ប៉ុន្តែសង្គ្រាមថ្មីនេះនឹងធ្វើឲ្យក្រុមហ៊ុនអាកាសចរណ៍កាន់តែលំបាក ។
ចែករំលែកព័តមាននេះ