ខេត្តកំពង់ស្ពឺ៖ ជនសង្ស័យចំនួនពីរនាក់ដែលតែងតែធ្វើសកម្មភាពលួចគាស់ផ្ទះយកទ្រព្យសម្បត្តិរបស់ប្រជាពលរដ្ឋចំនួន០៣ករណីផ្សេងគ្នា ត្រូវបានកម្លាំងនគរបាលស្រុកសំរោងទងធ្វើការស្រាវជ្រាវឃាត់ខ្លួនបានក្រោយធ្វើសកម្មភាពគាស់ផ្ទះរបស់ប្រជាពលរដ្ឋ លួចយកទ្រព្យសម្បត្តិអស់ជាច្រើន។
នគរបាលស្រុកសំរោងទងបានឲ្យដឹងថានៅមុនពេលបង្ក្រាបក្រុមជនសង្ស័យខាងលើ គឺដោយអនុវត្តតាមបទបញ្ជាដ៏ខ្ពង់ខ្ពស់របស់លោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ និងដឹកនាំចង្អុលបង្ហាញដោយលោកឧត្តមសេនីយ៍ត្រី សម សាក់ ស្នងការរងទទួលផែនព្រហ្មទណ្ឌ ចុះបញ្ជាផ្ទាល់ដោយលោកឧត្តមសេនីយ៍ត្រី រស់ រដ្ឋា ស្នងការរងទទួលការិយាល័យព្រហ្មទណ្ឌកម្រិតស្រាល នៅថ្ងៃទី២៨ ខែកុម្ភៈ ឆ្នាំ២០២៦ កម្លាំងជំនាញធ្វើការបង្ក្រាបជនសង្ស័យចំនួនពីរនាក់ពាក់ព័ន្ធនឹងករណីគាស់ផ្ទះប្រជាពលរដ្ឋ០៣កន្លែងផ្សេងគ្នា។
នគរបាលស្រុកសំរោងទងបានបន្តដឹងថាជនសង្ស័យដែលឃាត់ខ្លួនបានទី០១មានឈ្មោះ សៅ វ៉ាន់ឌី ហៅវែង ភេទប្រុស អាយុ២៨ឆ្នាំ នៅភូមិមហាលំពាំងទី១ ឃុំសែនដី ស្រុកសំរោងទង ខេត្តកំពង់ស្ពឺ និងទី២-ឈ្មោះ សេង រតនា ហៅរដ្ឋ ភេទប្រុស អាយុ២១ឆ្នាំ នៅភូមិមហាលំពាំងទី២ ឃុំសែនដី ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបន្តថា ករណីទី១ដែលក្រុមជនសង្ស័យធ្វើសកម្មភាពកាលពីវេលាម៉ោង៨និង៤០នាទីយប់ថ្ងៃទី៦ ខែកុម្ភៈ ឆ្នាំ២០២៦ មានឈ្មោះ សុត រ៉ន ភេទប្រុស អាយុ៤០ឆ្នាំ រស់នៅក្នុងភូមិមហាលំពាំងទី១ ឃុំសែនដី ស្រុកសំរោងទង ខេត្តកំពង់ស្ពឺ បានដាក់ពាក្យបណ្ដឹងទៅលើជនសង្ស័យមិនស្គាល់អត្តសញ្ញាណ ។ នៅវេលាម៉ោង ៦និង២៥នាទីព្រឹកថ្ងៃទី៦ ខែកុម្ភៈ ខ្លួនបានចេញពីផ្ទះទៅធ្វើការហើយបានចាក់សោទ្វារផ្ទះទុកចោលគ្មានអ្នកនៅចាំផ្ទះ។ លុះដល់ម៉ោង ១៨និង៣០នាទី បានត្រឡប់មកពីធ្វើការវិញ បានចាក់សោទ្វារចូលក្នុងផ្ទះបានឃើញខោអាវក្នុងទូររញ៉េរញ៉ៃ ក៏បានទៅមើលទ្វារក្រោយផ្ទះក៏បានឃើញស្នាមបែកបាក់ទ្វារកញ្ចក់ ហើយមកមើលលុយទុកក្នុងកាបូប នៅក្នុងទូរលុយចំនួន៤០០ដុល្លា(បួនរយដុល្លា) លុយខ្មែរចំនួន៨០០០០០(ប្រាំបីសែនរៀល ) និងកងដៃផ្លាក់ទីនចំនួន២ ទម្ងន់២ជីកន្លះ ដោយមិនឃើញទើបដឹងថាមានជនសង្ស័យមិនស្គាល់អត្តសញ្ញាណបានគាស់ទ្វារក្រោយផ្ទះចូលលួចយកទៅបាត់ ។
ចំពោះករណីទី២ នៅវេលាម៉ោង០២និង៤០នាទីរសៀលថ្ងៃទី២៧ ខែកុម្ភៈ ឆ្នាំ២០២៦ មានឈ្មោះ តុប វីន ភេទប្រុស អាយុ៣៧ឆ្នាំ រស់នៅភូមិព្រៃក្តី ឃុំរលាំងចក ស្រុកសំរោងទង ខេត្តកំពង់ស្ពឺ បានមកដាក់ពាក្យបណ្តឹងទៅលេីជនសង្ស័យមិនស្គាល់ឈ្មោះ និងអត្តសញ្ញាណ។
នៅវេលាម៉ោង ១៣និង១០នាទីថ្ងៃទី២៧ ខែកុម្ភៈ ខ្លួន បានចេញពីរៀននៅសាលាវិទ្យាស្ថានបច្ចេកទេស យោធាតេជោ ហ៊ុន សែន ស្ថិតនៅភូមិទន្លេកន្ទិល ឃុំសំរោងទង ស្រុកសំរោងទង ខេត្តកំពង់ស្ពឺ បានមកដល់ផ្ទះឃើញស្នាមគាស់ទ្វារផ្ទះបាយពីខាងជើង ហើយបានចូលទៅមើលក្នុងផ្ទះឃើញស្នាមគាស់ទ្វារបន្ទប់រុះរើសម្ភារៈ បាត់បង់ទ្រព្យសម្បត្តិដូចជា៖
– លុយចំនួន ៣០០$ (បីរយដុល្លារ)
– ខ្សែករផ្លាកទីនចំនួន ២ខ្សែ
– ខ្សែដៃផ្លាកទីនចំនួន ១ខ្សែ
– ក្រវិលផ្លាកទីនចំនួន ១គូ
– ចិញ្ចៀនផ្លាកទីន ចំនួន ១វង់
– នាឡិកា ចំនួន ៣
– កាំបិតផ្គាក់ ចំនួន ១
និងករណីទី៣ កាលពីវេលាម៉ោង១៩និង១៥នាទីថ្ងៃទី២៧ ខែកុម្ភៈ ឆ្នាំ២០២៦កន្លងទៅ មានឈ្មោះ ខែត យឿន ភេទប្រុស អាយុ៤២ឆ្នាំ រស់នៅភូមិផ្លូវជ្រូក ឃុំសែនដី ស្រុកសំរោងទង ខេត្តកំពង់ស្ពឺ បានមកដាក់ពាក្យបណ្ដឹងទៅលើជនសង្ស័យមិនស្គាល់អត្តសញ្ញាណ។ យោងតាមកាមេរ៉ាសុវត្ថិភាព នៅវេលាម៉ោង ១២និង៥០នាទីថ្ងៃត្រង់ ថ្ងៃទី២៧ ខែកុម្ភៈ ឆ្នាំ២០២៦ មានជនសង្ស័យមិនស្គាល់អត្តសញ្ញាណ បានឡើងតាមរបងពីខាងជើង យកកាំបិតផ្គាក់កាប់ទ្វារក្រោយផ្ទះចូលលួចយកលុយក្នុងកូនជ្រូកប្រហែលចំនួន ៥០០,០០០ (ហាសិបម៉ឺនរៀល) កាតគ្រីរថយន្ត ម៉ាកតូយ៉ូតា និងចុងសន្លឹកឆៀករថយន្ត ដែលទុកក្នុងទូដាក់សម្លៀកបំពាក់»ផ្ទះទាំងពីរខាងលើមិនមានអ្នកនៅចាំ។
នគរបាលស្រុកសំរោងទងបានឱ្យដឹងទៀតថា ក្រោយពីទទួលបានពាក្យបណ្ដឹងរបស់ជនរងគ្រោះទាំងបីនាក់ខាងលើនៅវេលាម៉ោង ០២និង៣០នាទីរសៀលថ្ងៃទី២៨ ខែកុម្ភៈ ឆ្នាំ២០២៦ កម្លាំងនគរបាលស្រុកសំរោងទង បានសហការជាមួយកម្លាំងការិយាល័យព្រហ្មទណ្ឌកម្រិតស្រាល បានចុះស្រាវជ្រាវលើករណីចោរលួចគាស់ផ្ទះ បានឃាត់ខ្លួនមុខសញ្ញាសង្ស័យបានចំនួន ២ នាក់
១-ឈ្មោះ សៅ វ៉ាន់ឌី ហៅវែង ភេទប្រុស អាយុ២៨ឆ្នាំ នៅភូមិមហាលំពាំងទី១ ឃុំសែនដី ស្រុកសំរោងទង ខេត្តកំពង់ស្ពឺ និងទី២-ឈ្មោះ សេង រតនា ហៅរដ្ឋ ភេទប្រុស អាយុ២១ឆ្នាំ នៅភូមិមហាលំពាំងទី២ ឃុំសែនដី ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបានបន្តឲ្យដឹងទៀតថា ក្រោយសួរនាំជនសង្ស័យ ពួកគេបានឆ្លើយសារភាពថា ខ្លួនពិតជាបានធ្វើសកម្មភាពគាស់ផ្ទះខាងលើបានចំនួន៣លើក និងបានលួចយកទ្រព្យសម្បត្តិនិងសម្ភារៈខាងលើពិតប្រាកដមែន ។ក្រោយឃាត់ខ្លួនកម្លាំងនគរបាលដករហូតវត្ថុតាង៖
-ម៉ូតូ ១ គ្រឿង ម៉ាក CRF ពណ៍ស ពាក់ផ្លាកលេខ ភ្នំពេញ1HZ-5296
-កាំបិតផ្គាក់១
-ក្រវិល១ចំហៀង
-ខ្សែករចំនួន១ខ្សែ
-ចិញ្ចៀន១វង់
-ខ្សែជើង១ខ្សែផងដែរ។
នគរបាលស្រុកសំរោងទងបានបញ្ជាក់ថា ក្រោយឃាត់ខ្លួនជនសង្ស័យទាំងពីរនាក់ខាងលើរួមជាមួយវត្ថុតាងនគរបាលជំនាញកំពុងសាកសួរ និងកសាងសំណុំរឿងបញ្ជូនបន្តទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺដើម្បីចាត់ការបន្តតាមផ្លូវច្បាប់ ៕
ចែករំលែកព័តមាននេះ