ខេត្តបាត់ដំបង ៖ គួរឲ្យសោកស្ដាយបំផុតដែលកសិករម្នាក់ ត្រូវបានអគ្គិភ័យលេបត្របាក់យកគ្រឿងកសិកម្ម និងទ្រព្យសម្បត្តិដទៃទៀតអស់ស្ទើរទាំងស្រុង កាលពីវេលាម៉ោង២រំលងអធ្រាត្រឈានចូលថ្ងៃទី២៨ កុម្ភៈ ដែលស្ថិតនៅខាងមុខ «វត្តភ្នំកាច់ផ្កា» ក្នុងភូមិស្រះថត…
ខេត្តបាត់ដំបង ៖ គួរឲ្យសោកស្ដាយបំផុតដែលកសិករម្នាក់ ត្រូវបានអគ្គិភ័យលេបត្របាក់យកគ្រឿងកសិកម្ម និងទ្រព្យសម្បត្តិដទៃទៀតអស់ស្ទើរទាំងស្រុង កាលពីវេលាម៉ោង២រំលងអធ្រាត្រឈានចូលថ្ងៃទី២៨ កុម្ភៈ ដែលស្ថិតនៅខាងមុខ «វត្តភ្នំកាច់ផ្កា» ក្នុងភូមិស្រះថត ឃុំព្រៃត្រឡាច ស្រុករុក្ខគិរី ។
មន្ត្រីជំនាញបានរាយការណ៍ថា អគ្គិភ័យនោះបានផ្ដើមចេញ «ភ្លើងទៀន ឬ ធូប» ដែលម្ចាស់ដុតទុកចោលលើ «រានម្រេញគង្វាល» ហើយកម្ទេចភ្លើងបានធ្វើលើពុំនូកចំបើងនៅក្បែរនោះ ទើបបង្កជាអគ្គិភ័យយ៉ាងសន្ធោសន្ធៅ នៅវេលារំលងអធ្រាត្រ ដែលមិនអាចគ្រប់គ្រងបាន ។
របាយការណ៍បានបញ្ជាក់ថា បើតាមជនរងគ្រោះឈ្មោះ គីម គឿង ហៅគឹង ភេទប្រុសអាយុ២៧ឆ្នាំ បានប្រាប់ថា អគ្គិភ័យនេះ បានឆេះរាលដាលដល់សំយ៉ាបរោងដាក់គ្រឿងយន្ត សម្ភារៈ កសិកម្ម ស្រូវ និងទ្រព្យសម្បត្តិផ្សេងៗទៀត ។ តុល្យការនៃការខូចខាតដោយអគ្គិភ័យដែលផ្ដើមចេញពីភ្លើងធូបទៀនលើរានម្រេញគង្វាលនេះ ហាក់មិនធ្ងន់ធ្ងរប៉ុន្មានទេ ព្រោះឆេះអគ្គិភ័យឆេះត្រឹមសំយ៉ាបរោង ។ ប៉ុន្តែបើពិនិត្យទៅលើសម្ភារសម្រាប់ប្រើប្រាស់ផ្នែកកសិកម្មរបស់គ្រួសារកសិករមួយនេះ ហាក់ខូចខាតធ្ងន់ធ្ងរគូរសមដែរ ។
យោងតាមរបាយការណ៍បានឲ្យដឹងថា សម្ភារដែលខូចខាតរួមមាន៖ ១-គោយន្តកន្ត្រៃចំនួន០២គ្រឿង ២-ម៉ាស៊ីនបូបទឹកចំនួន០២គ្រឿង ៣-ម៉ាស៊ីនបាញ់ថ្នាំចំនួន០៣គ្រឿង ៤-ធុងបាស់០១ឈុត ៥-ប៉ុស្ដិ៍ផ្សាដែក០១ឈុត ៦-ម៉ាស៊ីនកិនដំឡូង០១គ្រឿង ៧-ម៉ាស៊ីនកាត់ស្មៅ០១គ្រឿង ៨-តង់កៅស៊ូចំនួន៥០ដុំ ៩-ស្រូវចំនួន០២តោន និង ១០-ស័ង្កសីចំនួន៥០សន្លឹក ។
មន្ត្រីបាននិយាយថា ករណីអគ្គិភ័យខាងលើនេះ មានម្ចាស់រោង និងប្រជាពលរដ្ឋនៅក្បែរៗនោះទេ ដែលបានប្រឹងប្រែងពន្លត់ ខណៈរថយន្តពន្លត់អគ្គិភ័យរបស់សមត្ថកិច្ចមិនចេញជួយអន្តរាគមន៍ទាន់ពេលទេ ដោយហេតុផ្លូវឆ្ងាយ ហើយម្យ៉ាងទៀតអគ្គិភ័យនោះ ហាក់ឆេះលឿនបំផុត លុះនៅព្រឹកថ្ងៃបន្ទាប់ ទើបមន្ត្រីមូលដ្ឋានចូលទៅពិនិត្យទីតាំងកើតហេតុ ដើម្បីសួរនាំធ្វើរបាយការណ៍ជូនថ្នាក់លើបានជ្រាប ៕
ចែករំលែកព័តមាននេះ