ប្រទេសអ៊ីស្រាអែល ៖ ប្រទេសអ៊ីស្រាអែលបានបើកការវាយប្រហារតាមអាកាសថ្មីដែលផ្តោតលើទីក្រុងតេហេរ៉ង់ ប្រទេសអ៊ីរ៉ង់ និងបានពង្រីកយុទ្ធនាការយោធារបស់ខ្លួននៅថ្ងៃទី២ ខែមីនា ឆ្នាំ២០២៦ ដើម្បីរួមបញ្ចូលការវាយប្រហារលើពួកសកម្មប្រយុទ្ធហេសបូឡា (Hezbollah) ដែលគាំទ្រដោយអ៊ីរ៉ង់នៅក្នុងប្រទេសលីបង់…
ប្រទេសអ៊ីស្រាអែល ៖ ប្រទេសអ៊ីស្រាអែលបានបើកការវាយប្រហារតាមអាកាសថ្មីដែលផ្តោតលើទីក្រុងតេហេរ៉ង់ ប្រទេសអ៊ីរ៉ង់ និងបានពង្រីកយុទ្ធនាការយោធារបស់ខ្លួននៅថ្ងៃទី២ ខែមីនា ឆ្នាំ២០២៦ ដើម្បីរួមបញ្ចូលការវាយប្រហារលើពួកសកម្មប្រយុទ្ធហេសបូឡា (Hezbollah) ដែលគាំទ្រដោយអ៊ីរ៉ង់នៅក្នុងប្រទេសលីបង់ ខណៈប្រធានាធិបតីអាមេរិក លោក ដូណាល់ ត្រាំ បានបង្ហាញសញ្ញាថា ការវាយប្រហារយោធារវាងសហរដ្ឋអាមេរិក និងអ៊ីស្រាអែលលើគោលដៅអ៊ីរ៉ង់អាចបន្តរយៈពេលជាច្រើនសប្តាហ៍។ នេះបើតាមប្រភពពី Reuters បានចេញផ្សាយ។
អ៊ីស្រាអែលបានអះអាងថា ខ្លួនកំពុងវាយប្រហារទីតាំងទាក់ទងជាមួយក្រុមប្រដាប់អាវុធ ហេសបូឡារបស់លីបង់ ដែលជាសម្ព័ន្ធមិត្តសំខាន់របស់អ៊ីរ៉ង់នៅមជ្ឈិមបូព៌ា បន្ទាប់ពីហេសបូឡាបានទទួលស្គាល់ការវាយប្រហារដោយមីស៊ីល និងដ្រូនលើអ៊ីស្រាអែលដើម្បីសងសឹកចំពោះការសម្លាប់មេដឹកនាំកំពូលអ៊ីរ៉ង់ លោក អាយ៉ាតូឡា អាលី ខាមេនី។
អ៊ីស្រាអែលធ្វើការវាយប្រហារតាមអាកាសលើតំបន់ជាយក្រុងភាគខាងត្បូងទីក្រុងបេរូត (Beirut) ដែលគ្រប់គ្រងដោយក្រុមហេសបូឡា ជាមួយស្នូរផ្ទុះជាង១០ដងបានរញ្ជួយរដ្ឋធានីរបស់ប្រទេសលីបង់មួយនេះ។ អ៊ីស្រាអែលបានប្រកាសថា ខ្លួនក៏បានវាយប្រហារពួកសកម្មប្រយុទ្ធហេសបូឡាជាន់ខ្ពស់នៅជិតទីក្រុងបេរូតផងដែរ។
ការវាយប្រហារតបតគ្នារវាងក្រុមហេសបូឡា និងអ៊ីស្រាអែលបានពង្រីកជម្លោះដែលបានរីករាលដាលពាសពេញមជ្ឈិមបូព៌ា ចាប់តាំងពីសហរដ្ឋអាមេរិក និងអ៊ីស្រាអែលបានបើកការវាយប្រហារលើអ៊ីរ៉ង់ កាលពីថ្ងៃទី២៨ ខែកុម្ភៈ ឆ្នាំ២០២៦ ដែលបណ្តាលឱ្យតម្លៃប្រេងឡើងថ្លៃ និងរំខានដល់ការធ្វើដំណើរតាមផ្លូវអាកាសជាច្រើន។
យោធាអ៊ីស្រាអែលនៅថ្ងៃទី១ ខែមីនា បានបញ្ជាក់ថា កងទ័ពអាកាសរបស់ខ្លួនបានបង្កើតការវាយប្រហារផ្លូវអាកាសដ៏ខ្លាំងលើទីក្រុងតេអេរ៉ង់ ហើយការវាយប្រហារនៅទូទាំងរដ្ឋធានីនេះបានកំណត់គោលដៅមជ្ឈមណ្ឌលស៊ើបការណ៍សម្ងាត់ សន្តិសុខ និងបញ្ជាការយោធា៕
ចែករំលែកព័តមាននេះ