ខេត្តសៀមរាប ៖ កម្លាំងជំនាញកងរាជអាវុធហត្ថខេត្តសៀមរាប បានប្រាប់កាលពីល្ងាចថ្ងៃទី១ ខែមីនា ឆ្នាំ២០២៦ថា ដោយមានការចង្អុលបង្ហាញពីលោកឧត្តមសេនីយ៍ត្រី សៀ ទីន មេបញ្ជាការកងរាជអាវុធហត្ថខេត្ត…
ខេត្តសៀមរាប ៖ កម្លាំងជំនាញកងរាជអាវុធហត្ថខេត្តសៀមរាប បានប្រាប់កាលពីល្ងាចថ្ងៃទី១ ខែ
មីនា ឆ្នាំ២០២៦ថា ដោយមានការចង្អុលបង្ហាញពីលោកឧត្តមសេនីយ៍ត្រី សៀ ទីន មេបញ្ជាការកងរាជអាវុធហត្ថខេត្ត បានឱ្យកម្លាំងជំនាញចុះសហការជាមួយកម្លាំងមូលដ្ឋានអាវុធហត្ថក្រុងសៀមរាប និងមានការសម្របសម្រួលនីតិវិធីពី លោក ង៉ិល សុវណ្ណារិទ្ធ ព្រះរាជអាជ្ញារងអមសាលាដំបូងខេត្តសៀមរាប បានចុះប្រតិបត្តិការបង្ក្រាបជាបន្តបន្ទាប់ និងបានចាប់យកវត្ថុតាងរួមមាន ៖ រថយន្ត ម៉ាកLexus CT200h ពណ៌.ស ពាក់ស្លាកលេខសៀមរាប ២D៤៣២១ ជារបស់ជនសង្ស័យ, ម៉ាស៊ីនចម្រុះម៉ាក សរុបចំនួន១០,១៦៨គ្រឿង ក្នុងនោះ មានម៉ាស៊ីនជក់៤,២៦៨ដើម, ក្បាលជក់ចម្រុះម៉ាកចំនួន៥,៩០០ក្បាល ព្រមទាំងឃាត់ខ្លួនជនសង្ស័យប្រុសចំនួន២នាក់ ជា អ្នកលក់ និងម្ចាស់ទីតាំងបញ្ជូនទៅបញ្ជាការដ្ឋានកងរាជអាវុធហត្ថខេត្តសៀមរាប និង រៀបចំកសាងសំណុំ រឿងបញ្ជូនទៅកាន់តុលាការ ដើម្បីចាត់ការតាមនីតិវិធីច្បាប់ ។
ហេតុការណ៍ចុះបង្ក្រាបទីតាំងស្តុកមួយកន្លែងនោះ កាលពីវេលាម៉ោង១៦ និង៣០នាទីរសៀលថ្ងៃទី២៨ កុម្ភៈ ឆ្នាំ២០២៦ ស្ថិតនៅចំណុចភូមិថ្មី សង្កាត់ស្វាយដង្គំ ក្រុងសៀមរាប ខេត្តសៀមរាប ។
ប្រភពពីមន្ត្រីជំនាញកងរាជអាវុធហត្ថខេត្តសៀមរាបបានបញ្ជាក់ថា ចំពោះអ្នកលួចលក់ឧបករណ៍អេឡិចត្រូនិក សម្រាប់ជក់សារធាតុគីមី និងទីតាំងស្តុក ឧបករណ៍អេឡិចត្រូនិកនិងសារធាតុគីមីសម្រាប់ជក់ និងស៊ីហ្សាគ្រប់ប្រភេទមួយកន្លែង ស្ថិតនៅកណ្តាលក្រុងសៀមរាបបង្កការភ្ញាក់ផ្អើលនោះ កម្លាំងជំនាញនៃកងរាជអាវុធហត្ថខេត្ត បានធ្វើការឃាត់ខ្លួនយកមកសួរនាំនៅទីបញ្ជាការកងរាជអាវុធហត្ថខេត្តហើយ ។
សូមបញ្ជាក់ថា ចំពោះឧបករណ៍អេឡិចត្រូនិក និងសារធាតុគីមីសម្រាប់ជក់ និងស៊ីហ្សា គ្រប់ប្រភេទ ត្រូវបានរាជរដ្ឋាភិបាល ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដាក់បទបញ្ជាហាមឃាត់ដាច់ខាត មិនឱ្យនាំចូល ចែកចាយ ផ្សាយពាណិជ្ជកម្ម ប្រើប្រាស់កាន់កាប់ ផលិត និងស្តុកទុកឡើយ ក្នុងគោលបំណងទប់ស្កាត់បង្ការដោះស្រាយបញ្ហាឱ្យបានទាន់ពេលវេលា និងដើម្បីរក្សាសណ្តាប់ធ្នាប់សង្គម ការពារសុខភាពសាធារណៈ ជាពិសេស សុខភាពរបស់អ្នកសិក្សានិងបុគ្គលិកអប់រំ ។
បច្ចុប្បន្ន ជនសង្ស័យទាំង២នាក់ និងវត្ថុតាងទាំងអស់ កម្លាំងជំនាញនៃកងរាជអាវុធហត្ថខេត្តសៀមរាប កំពុងរៀបចំកសាងសំណុំបញ្ជូនទៅកាន់តុលាការខេត្ត ដើម្បីចាត់ការបន្តតាមនីតិវិធីច្បាប់ ៕
ចែករំលែកព័តមាននេះ