ទីក្រុងយេរូសាឡឹម៖ នៅក្នុងប្រតិបត្តិការសឹកវាយប្រហារគ្នាទៅវិញទៅមករវាងអ៊ីរ៉ង់ទល់នឹងអាមេរិក និងអ៊ីស្រាអែលរយៈពេល២ថ្ងៃ អាមេរិកអះអាងថាទាហានរបស់ខ្លួន៣នាក់បានស្លាប់ ខណៈដែល៥នាក់ទៀតរងរបួសធ្ងន់។ នេះបើយោងតាមអ្វីដែលអគ្គបញ្ជាការដ្ឋានយោធាអាមេរិកបង្ហោះសារនៅលើបណ្ដាញអ៊ិច។ អាមេរិកអះអាងបន្តទៀតថាទាហានរបស់ខ្លួនរងរបួសមួយចំនួនទៀត ប៉ុន្តែរបួសស្រាលដោយសារអំបែងគ្រាប់។ នៅពេលពួកគេជាសះស្បើយពីមុខរបួសអាចចូលបំពេញការងារជាធម្មតា។
បញ្ជាការដ្ឋានយោធាអាមេរិកសរសេររៀបរាប់បន្តទៀតថាគិតត្រឹមម៉ោង៩:៣០ព្រឹកមិញ ពលទាហានរបស់ខ្លួនបីនាក់បានពលីជីវិតនៅពេលបំពេញបេសកកម្ម និង៥នាក់រងរបួសធ្ងន់។ នេះជាផ្នែកមួយនៃប្រតិបត្តិការសឹកដែលមានឈ្មោះថាអូប៉ឺរ៉េសិន អេពីក ព្ជូរី (Operation Epic Fury)។ នេះជាលើកដំបូងបំផុតដែលគេទទួលដំណឹងស្ដីពីការស្លាប់របស់ទាហានអាមេរិកបន្ទាប់ពីគេទទួលដំណឹងតែខាងអ៊ីរ៉ង់ថាស្លាប់មេដឹកនាំកំពូល និងមន្ត្រីជាន់ខ្ពស់របស់ខ្លួនរួមទាំងរដ្ឋមន្ត្រីការពារជាតិ និងមេបញ្ជាការឆ្មាំបដិវត្ត។
អត្តសញ្ញាណរបស់ទាហានអាមេរិកដែលបានពលីជីវិតទាំងនោះមិនទាន់បង្ហាញជាសាធារណៈនៅឡើយទេ ហើយរង់ចាំក្រុមគ្រួសាររបស់ពួកគេទៅទទួលសាកសព និងផ្ទៀងផ្ទាត់ឌីអឹនអេ។ ដំណឹងស្ដីពីការពលីជីវិតយុទ្ធជនអាមេរិកនេះក៏កើតឡើងបន្ទាប់ពីលោកដូណាល់ត្រាំប្រកាសកាលពីព្រឹកម្សិលមិញ (ក្រោយពេលបើកប្រតិបត្តិការសឹកបានបន្តិច) ថាសង្គ្រាមលើកនេះមិនសាមញ្ញពេកទេ ហើយយើងត្រៀមពលីជីវិតយុទ្ធជនមិនតិចនាក់នោះឡើយ។ លោកអះអាងបន្តទៀតថាអ្វីដែលយើងកំពុងធ្វើនៅពេលនេះមិនមែនសម្រាប់ថ្ងៃនេះទេ ប៉ុន្តែសម្រាប់ពេលអនាគត។
ប្រភពខ្លះរាយការណ៍ថាការស្លាប់យុទ្ធជនរបស់អាមេរិកកើតឡើងបន្ទាប់ពីអ៊ីរ៉ង់ផ្ទុះកំហឹងយ៉ាងខ្លាំងដែលស្លាប់មេដឹកនាំកំពូលរបស់ខ្លួន។ ដូចនេះ អ៊ីរ៉ង់វាយប្រហារសងសឹកវិញដោយប្រើប្រាស់សុទ្ធតែមីស៊ីលផ្លោងប្រភេទបលលីសស្ទីក (ballistic)។ នៅក្នុងស្ថានភាពដែលខ្លួនកំពុងតែក្រពុលមុខខ្លាំង អ៊ីរ៉ង់សម្រុកវាយប្រហារគ្រប់ទីកន្លែង។ មិនត្រឹមតែទីតាំងយោធារបស់អាមេរិក និងអ៊ីស្រាអែលប៉ុណ្ណោះទេ ទីកន្លែងណាក៏ដោយដែលអាចវាយប្រហារបានគឺអ៊ីរ៉ង់វាយទាំងអស់។
បណ្ដាប្រទេសមួយចំនួននៅមជ្ឈិមបូព៌ាដែលជាសម្ព័ន្ធមិត្តរបស់អាមេរិក ឬមានមូលដ្ឋានយោធារបស់អាមេរិកតាំងនៅត្រូវអ៊ីរ៉ង់បាញ់មីស៊ីលដាក់ទាំងអស់។ នៅតាមទីក្រុងនានានៃប្រទេសទាំងនោះ គេស្ដាប់ឮសំឡេងផ្ទុះគ្រាប់មីស៊ីល និងឃើញផ្សែងខ្មៅងងឹតហោះហើរនៅលើអាកាស។ តាមមើលទៅ ភាគីទាំងសងខាងហាក់ដូចជាមិនទាន់បង្ហាញសញ្ញាដកថយ និងបោះដៃរកគ្នាដើម្បីចរចាបញ្ចប់ជម្លោះនៅឡើយទេ។ អ៊ីរ៉ង់មិននៅបង្អែបង្អង់យូរទេ។ គ្រាន់តែប្រកាសទទួលស្គាល់ការស្លាប់លោកអាយ៉ាតូឡា អាលី ខាមេនីមិនបានប៉ុន្មានផង អ៊ីរ៉ង់ក៏ចាប់ផ្ដើមតែងតាំងសមាសភាពរដ្ឋាភិបាលជាបន្ទាន់ និងបន្តធ្វើសង្គ្រាមមួយទល់នឹងពីរ។
ឥឡូវនេះ ក្រុមអ្នកវិភាគ ក្រុមអ្នកជួញដូរភាគហ៊ុន និងថ្នាក់ដឹកនាំនៅមជ្ឈិមបូព៌ាកំពុងតាមដានសភាពការណ៍នេះដោយយកចិត្តទុកដាក់។ ពួកគេចង់ដឹងថាតើក្រោយពេលស្លាប់មេដឹកនាំកំពូលរួចហើយ មេដឹកនាំបណ្ដោះអាសន្នថ្មីនឹងប្រកាន់ជំហរបែបណាទៀត ហើយក៏ចង់ដឹងផងដែរថាតើសង្គ្រាមនេះកើតឡើងត្រឹមតែអ៊ីរ៉ង់ និងអ៊ីស្រាអែលទេ ឬក៏រីករាលដាលទៅប្រទេសដទៃទៀត៕ ប្រភព៖ ទូរទស្សន៍ស៊ីអឹនប៊ីស៊ី (CNBC) និងប្រភពដទៃ ទៀត
ចែករំលែកព័តមាននេះ