ទីក្រុងព្យុងយ៉ាង៖ រដ្ឋាភិបាលទីក្រុងព្យុងយ៉ាងចាប់ផ្ដើមបញ្ចេញប្រតិកម្មតបទៅសង្គ្រាមអ៊ីរ៉ង់ជាបណ្ដើរៗហើយ។ ថ្មីៗនេះ អ្នកនាំពាក្យក្រសួងការបរទេសកួរ៉េខាងជើងចេញសេចក្ដីថ្លែងការណ៍ថ្កោលទោសប្រតិបត្តិការសឹករបស់អ៊ីស្រាអែល និងអាមេរិកទៅលើអ៊ីរ៉ង់។ កូរ៉េខាងជើងចាត់ទុកថានេះជា «អំពើឈ្លានពានខុសច្បាប់» និងជាការរំលោភអធិបតេយ្យភាពជាតិរបស់រដ្ឋដទៃ។ នេះបើយោងតាមការផ្សាយរបស់ទូរទស្សន៍កូរ៉េខាងជើង ខេស៊ីអឹនអេ (KCNA)។
អ្នកនាំពាក្យកូរ៉េខាងជើងថ្លែងបន្តទៀតថាប្រតិបត្តិការសឹករបស់អាមេរិកទៅលើអ៊ីរ៉ង់មានទំហំដូចការរំពឹងទុក។ វាជាផលវិបាកដែលកើតឡើងដោយជៀសមិនរួចដោយសារអាមេរិកមានចរិតពីធម្មជាតិជាក្រុមចក្រព័ត្តិនិយម និងជើងកាងនិយម។ កូរ៉េខាងជើងថាខ្លួនមិនអាចទទួលយកបានជាដាច់ខាតនូវសង្គ្រាមឈ្លានរបស់អាមេរិក និងអ៊ីស្រាអែលទោះបីនៅក្នុងកាលៈទេសៈណាក៏ដោយ។
សេចក្ដីថ្លែងការណ៍នោះសរសេររៀបរាប់បន្តទៀតថាបណ្ដាប្រទេសនៅក្នុងតំបន់ និងប្រទេសនៅទីកន្លែងដទៃទៀតគួរមានស្មារតីទទួលខុសត្រូវក្នុងការស្ដារសន្តិភាព និងស្ថិរភាពឡើងវិញនៅតំបន់មជ្ឈិមបូព៌ា។ យោធាអ៊ីស្រាអែលថ្លែងថាខ្លួនវាយប្រហារទ្រង់ទ្រាយធំចំកណ្ដាលបេះដូងរបស់អ៊ីរ៉ង់ដែលនាំទៅដល់ការស្លាប់អគ្គមគ្គុទ្ទេសក៍អ៊ីរ៉ង់ លោកអាយ៉ាតូឡា អាលី ខាមេនី, រដ្ឋមន្ត្រីការពារជាតិ, មេបញ្ជាការកំពូលឆ្មាំបដិវត្តអ៊ីរ៉ង់ និងមន្ត្រីជាន់ខ្ពស់ដទៃទៀត។
កូរ៉េខាងជើង និងអាមេរិកជាគូបដិបក្សនឹងគ្នាជាយូរមកហើយតាំងពីក្រោយសង្គ្រាមកូរ៉េឆ្នាំ១៩៥៣។ ប៉ុន្តែអាមេរិកចង់ប្រើការចរចាគ្នាឱ្យអស់លទ្ធភាពជាមុនសិនដើម្បីដោះស្រាយបញ្ហានុយក្លេអ៊ែរ។ ឥឡូវនេះ នុយក្លេអ៊ែររបស់កូរ៉េខាងជើងឈានចូលដល់ដំណាក់កាលជ្រុលក្បាលក្រពើទៅហើយ។ ដូច្នេះបើឱ្យកូរ៉េខាងជើងរំលាយកម្មវិធីនុយក្លេអ៊ែររបស់ខ្លួនវិញនោះប្រហែលជាមានភាគរយតិចតួចជាទីបំផុត ឬក៏ថាមិនអាចទៅរួចតែម្ដង។
ប៉ុន្មានខែចុងក្រោយនេះ វ៉ាស៊ីនតោនចាប់ផ្ដើមបោះដៃទៅរកកូរ៉េខាងជើងដើម្បីចរចាគ្នាកម្រិតខ្ពស់។ បើអាចធ្វើទៅបាន អាមេរិកចង់រៀបចំកិច្ចជំនួបផ្ទាល់រវាងលោកគីមជុងអ៊ុន និងលោកដូណាល់ត្រាំ។ បន្ទាប់ពីបដិសេធជាច្រើនលើកច្រើនសា ចុងក្រោយនេះលោកគីមជុងអ៊ុនព្រលយពាក្យថាលោកគ្មានរឱសឋានជាមួយអាមេរិកទេ។ សំខាន់ឱ្យតែអាមេរិកទទួលស្គាល់កូរ៉េខាងជើងជារដ្ឋនុយក្លេអ៊ែរ ហើយឈប់ប្រកាន់នយោបាយអរិភាពនឹងគ្នា៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ