សង្គ្រាមអីុស្រាអែលនិងអាមេរិកលើអីុរ៉ង់ ៖ អគ្គលេខាធិការអ.ស.ប លោកអានតូនីញ៉ូហ្កូទ័ររេស បានថ្កោលទោសការវាយប្រហារតាមអាកាសរបស់អីុស្រាអែលនិងអាមេរិកលើអីុរ៉ង់ និងអំពាវនាវឲ្យមានការវិលត្រឡប់ជាបន្ទាន់ មករកការចរចាដើម្បីឲ្យតំបន់និងពិភពលោកចាកផុតពីគ្រោះមហន្តរាយ។
ក្នុងកិច្ចប្រជុំបន្ទាន់មួយរបស់ក្រុមប្រឹក្សាសន្តិសុខ លោកអានតូនីញ៉ូហ្កូទ័ររេស ថ្លែងនាថ្ងៃ២៨កុម្ភៈថា អ្វីៗត្រូវធ្វើដើម្បីរារាំងការកើនឡើងនៃជម្លោះថ្មី។ លោកបានព្រមានថាជម្លោះនឹងកាន់តែរីកធំជាមួយនឹងផលវិបាកធ្ងន់ធ្ងរបំផុតសម្រាប់ជនសីុវិលនិងអស្ថេរភាពតំបន់។
លោកគូសបញ្ជាក់ថា ការវាយប្រហាររបស់អីុស្រាអែលនិងអាមេរិក រំលោភបំពានច្បាប់អន្តរជាតិ ក្នុងនោះរួមទាំងធម្មនុញ្ញអ.ស.បផងដែរ។ លោកក៏ថ្កោលទោសដែរការវាយប្រហារសងសឹករបស់អីុរ៉ង់ ដែលរំលោភបំពានអធិបតេយ្យភាពនិងបូរណភាពដែនដីបារ៉ែន អីុរ៉ាក់ ហ្ស៊កដានី គុយវ៉ែត កាតា អារ៉ាប៊ីសាអូឌីតនិងអេមីរ៉ាត់អារ៉ាប់រួម។
ឯកអគ្គរដ្ឋទូតអាមេរិកប្រចាំអ.ស.បលោកMIKE WALTZ អះអាងថាសកម្មភាពយោធាអាមេរិកលើអីុរ់ង់គឹស្របច្បាប់។ លោកថ្លែងក្នុងក្រុមប្រឹក្សាសន្តិសុខថា អីុរ់ង់មិនអាចមានអាវុធនុយក្លេអ៊ែរឡើយ។ គោលការណ៍នេះមិនមែនជាបញ្ហានយោបាយឡើយតែជាបញ្ហាសន្តិសុខរបស់ពិភពលោក។
ក្នុងបំណងនោះហើយបានជាសហរដ្ឋអាមេរិកចាត់វិធានការស្របច្បាប់នានា។ ចំណែកឯកអគរដ្ឋទូតអីុស្រាអែលប្រចាំំអ.ស.បលោកដានីដាណុនវិញថ្លែងទៅកាន់បណ្ដាអ្នកកាសែត មុនកិច្ចប្រជុំក្រុមប្រឹក្សាសន្តិសុខថា ជាអំពើពុតត្បុតដែលថ្កោលទោសការវាយប្រហារតាមអាកាសរបស់យើង។ លោកថាអីុរ៉ង់ជាអ្នកទទួលខុសត្រូវចំពោះបណ្ដាសកម្មភាពរបស់ខ្លួននៅមជ្ឈឹមបូព៌៌ា និងកម្មវិធីនុយក្លេអ៊ែរព្រមទាំងបាលីស្ទិករបស់ខ្លួននិងថា អីុស្រាអែលព្រមទាំងអាមេរិកបានធ្វើសកម្មភាពដើម្បីបង្ការ ការគំរាមកំហែងមិនអាចប្រែក្រឡាស់បាននិងបន្ទាន់។
ការសម្លាប់មេដឹកនាំកំពូលអីុរ៉ង់លោកអាយ៉ាតុលាអាលីខាមេនី ដែលនៅមិនទាន់មានការជ្រើសរើសអ្នកបន្តវេន នាំឲ្យមានការភ័យខ្លាចលើសង្គ្រាមដែលអូសបន្លាយពេលយូរដោយសារការគំរាមសងសឹករបស់់អីុរ៉ង់។
រុស្សុីនិងចិនថ្កោលទោសការវាយប្រហារឯកអគ្ករដ្ឋទូតរុស្សុីប្រចាំអ.ស.បលោកវ៉ាស់សីុលីនេបេនហ្សា បានថ្កោលទោសការវាយប្រហាររបស់អាមេរិកនិងអីុស្រាអែលលើអីុរ៉ង់។ លោកថាយើងទាមទារឲ្យអាមេរិកនិងអីុស្រាអែលបញ្ឈប់ជាបន្ទាន់សកម្មភាពឈ្លានពាន ។ យើងទទូចឲ្យមានការវិលត្រឡប់វិញភ្លាមៗ ការខិតខំប្រឹងប្រែងស្វែងរកដំណោះស្រាយខាងនយោបាយនិងការទូត ផ្អែកលើច្បាប់អន្តរជាតិនិងគោរពផលប្រយោជន៍គ្នាទៅវិញទៅមក។ ចំណែកឯកអគ្គរដ្ឋទូតចិនប្រចាំអ.ស.បលោក ហ្វូកុងលើកឡើងថា ចិនពិតជាមានការបារម្ភខ្លាំងចំពោះការកើនឡើងភ្លាមៗនៃភាពតានតឹងតំបន់ ហើយគាំទ្រការអំពាវនាវរបស់រុស្សុី ឲ្យមានការវិលត្រឡប់មករកតុចរចាខាងការទូតវិញ។
ចំណែករដ្ឋមន្ត្រីការបរទេសអីុរ៉ង់លោកអាប់បាស់អារ៉ាសជី បានចោទប្រកាន់អីុស្រាអែលនិងអាមេរិកថា រំលោភបំពានជាក់ស្ដែងលើអធិបតេយ្យភាពនិងបូរណភាពដែនដីអីុរ៉ង់ព្រមទាំងធម្មនុញ្ញអ.ស.ប។ លោកថ្លែងថាអីុរ៉ង់មានសិទ្ធិស្របច្បាប់ក្នុងការការពារខ្លួនស្របតាម ្មធម្មនុញ្ញអ.ស.ប៕ ប្រភព ៖ Yahoo
ចែករំលែកព័តមាននេះ