ទីក្រុងតេអេរ៉ង់៖ រដ្ឋមន្ត្រីការពារជាតិអ៊ីរ៉ង់ ឧត្ដមសេនីយ៍ទោអាមៀ ហាតាមី (Amir Hatami) និងមេបញ្ជាការឆ្នាំបដិវត្តអ៊ីរ៉ង់ លោកមហាម៉ាត់ ប៉ាកប៉ូ (Mohammed…
ទីក្រុងតេអេរ៉ង់៖ រដ្ឋមន្ត្រីការពារជាតិអ៊ីរ៉ង់ ឧត្ដមសេនីយ៍ទោអាមៀ ហាតាមី (Amir Hatami) និងមេបញ្ជាការឆ្នាំបដិវត្តអ៊ីរ៉ង់ លោកមហាម៉ាត់ ប៉ាកប៉ូ (Mohammed Pakpour) ត្រូវគេជឿជាក់ថាបានស្លាប់ហើយ។ នេះបើយោងតាមទីភ្នាក់ងារព័ត៌មានរ៉យទ័រដែលដកស្រង់ប្រភព២នាក់ដែលដឹងអំពីប្រតិបត្តិការសឹករបស់អ៊ីស្រាអែល និងយោងតាមប្រភពម្នាក់ទៀតដែលធ្វើការផ្នែកស៊ើបការណ៍សម្ងាត់នៅមជ្ឈិមបូព៌ា។
ឥឡូវនេះ ជោគវាសនារបស់រដ្ឋមន្ត្រីការពារជាតិអ៊ីរ៉ង់ស្លាប់ ឬរស់មិនទាន់ដឹងច្បាស់នៅឡើយទេ។ ប្រភពខ្លះអះអាងថាគាត់បានស្លាប់ហើយ ខណៈដែលមន្ត្រីរដ្ឋាភិបាលអ៊ីរ៉ង់អះអាងថាគាត់នៅមានជីវិតរស់នៅ និងកំពុងបញ្ជាកងទ័ពយ៉ាងអង់អាចក្លាហាន។ មន្ត្រីរដ្ឋាភិបាលអ៊ីរ៉ង់ចាត់ទុកថាពាក្យចចាមអារ៉ាមដែលផ្សព្វផ្សាយតាមសារព័ត៌មានខ្លះមិនមែនជាការពិតទេ។
ទូរទស្សន៍ឥណ្ឌា WION បានដកស្រង់ប្រភពពីសារព័ត៌មានអ៊ីរ៉ង់មកផ្សាយថារដ្ឋមន្ត្រីរូបនេះស្លាប់នៅក្នុងហេតុការណ៍វាយប្រហារតាមអាកាសពីសំណាក់យោធាអ៊ីស្រាអែល និងអាមេរិក។ ប៉ុន្តែរបាយការណ៍នោះមិនទាន់ផ្ទៀងផ្ទាត់ថាជាការពិតនៅឡើយទេ។ គេដឹងថាថ្ងៃនេះអាមេរិក និងអ៊ីស្រាអែលសម្រុកវាយប្រហារយ៉ាងខ្លាំងទៅលើទីក្រុងនានារបស់អ៊ីរ៉ង់។ នៅរដ្ឋធានីតេអេរ៉ង់ គេឃើញតែផ្សែងខ្មៅងងឹតហោះហើរពេញផ្ទៃអាកាស។
មន្ត្រីរដ្ឋាភិបាលអ៊ីរ៉ង់ចេញមកច្រានចោលការផ្សាយរបស់សារព័ត៌មាន និងអ្នកធ្វើអត្ថាធិប្បាយតាមបណ្ដាញសង្គមខ្លះដែលថារដ្ឋមន្ត្រីរបស់ខ្លួនស្លាប់។ មន្ត្រីអ៊ីរ៉ង់ថានោះជាការចុះផ្សាយ ឬធ្វើអត្ថាធិប្បាយដែលគ្មានមូលដ្ឋានច្បាស់លាស់។ នៅថ្ងៃនេះដំណឹងស្ដីពីការស្លាប់របស់រដ្ឋមន្ត្រីការពារជាតិអ៊ីរ៉ង់ត្រូវគេបង្ហោះព្រោងព្រាតតាមបណ្ដាញសង្គមនានាមិនថាហ្វេសប៊ុក, បណ្ដាញអ៊ិច (X) និងរ៉េឌីត (Reddit) នោះទេ។
រដ្ឋមន្ត្រីអ៊ីរ៉ង់ លោកអាមៀ ហាតាមី (Amir Hatami) កើតនៅឆ្នាំ១៩៦៦ នៅទីក្រុងតេអេរ៉ង់។ ក្នុងវ័យ១៤ឆ្នាំ លោកបានចូលបម្រើនៅក្នុងជួរកងទ័ពស្ម័គ្រចិត្ត (Basij), ចូលបម្រើការនៅក្នុងអង្គភាពទ័ពជើងគោកនៅឆ្នាំ១៩៨៤ និងប្រឡូកនៅក្នុងសង្គ្រាមអ៊ីរ៉ាក់-អ៊ីរ៉ង់។ ក្រោយមកនៅខែមិថុនា ឆ្នាំ២០២៥ លោកឡើងតំណែងជាអគ្គបញ្ជាការកងទ័ពអ៊ីរ៉ង់ដែលតែងតាំងផ្ទាល់ដោយមេដឹកនាំកំពូលអ៊ីរ៉ង់ អាយ៉ាតូឡា អាលី ខាមេនី (Ayatollah Ali Khamenei)៕ ប្រភព៖ រ៉យទ័រ (Reuters), វ៉ាយអន (WION) និងប្រភពដទៃទៀត
ចែករំលែកព័តមាននេះ