ទីក្រុងតេអេរ៉ង់៖ អ៊ីរ៉ង់អះអាងថាអាមេរិក និងអ៊ីស្រាអែលវាយប្រហារចំសាលារៀនសម្រាប់សិស្សស្រីមួយកន្លែងនៅភាគខាងត្បូងបណ្ដាលឱ្យស្លាប់មនុស្សយ៉ាងតិច៥១នាក់។ ក្នុងនោះក៏មានកូនសិស្សមួយចំនួនផងដែរ។ ក្រៅពីនេះ មនុស្ស៤៨នាក់រងរបួសធ្ងន់ និងស្រាល។ ហេតុការណ៍នេះកើតឡើងនៅទីក្រុងមីណាប (Minab) ស្ថិតនៅខេត្តហ័រម៉ូសហ្កាន…
ទីក្រុងតេអេរ៉ង់៖ អ៊ីរ៉ង់អះអាងថាអាមេរិក និងអ៊ីស្រាអែលវាយប្រហារចំសាលារៀនសម្រាប់សិស្សស្រីមួយកន្លែងនៅភាគខាងត្បូងបណ្ដាលឱ្យស្លាប់មនុស្សយ៉ាងតិច៥១នាក់។ ក្នុងនោះក៏មានកូនសិស្សមួយចំនួនផងដែរ។ ក្រៅពីនេះ មនុស្ស៤៨នាក់រងរបួសធ្ងន់ និងស្រាល។ ហេតុការណ៍នេះកើតឡើងនៅទីក្រុងមីណាប (Minab) ស្ថិតនៅខេត្តហ័រម៉ូសហ្កាន (Hormozgan)។ គេដឹងថានៅក្នុងទីក្រុងនេះមានមូលដ្ឋានកងទ័ពឆ័ត្រយោងរបស់អ៊ីរ៉ង់។ នេះបើយោងតាមការផ្សាយរបស់ទីភ្នាក់ងារព័ត៌មានអ៊ីរ៉ង់អាយអ័រអឹនអេ (IRNA)។
រហូតមកដល់ពេលនេះ ទាំងអាមេរិក និងអ៊ីស្រាអែលមិនទាន់បានបូកសរុបរបាយការណ៍លម្អិតអំពីប្រតិបត្តិការសឹករបស់ខ្លួននៅឡើយទេ។ ប៉ុន្តែគេដឹងថានៅទូទាំងប្រទេសអ៊ីរ៉ង់ឱ្យតែមានមូលដ្ឋានយោធា ឬទីតាំងយោធាតាំងនៅគឺសុទ្ធតែរងការវាយប្រហារទាំងអស់។ ការវាយប្រហារជុំទីមួយទំនងជាសំដៅទៅលើកន្លែងស្នាក់នៅរបស់អគ្គមគ្គុទ្ទេសក៍អ៊ីរ៉ង់ លោកអាយ៉ាតូឡា អាលី ខាមេនី (Ayatollah Ali Khamenei) នៅរដ្ឋធានីតេអេរ៉ង់។ ប៉ុន្តែនៅពេលវាយប្រហារនោះ គេមិនបានដឹងច្បាស់ថាតើគាត់ស្ថិតនៅទីនោះឬយ៉ាងណា។
លោកត្រាំកាលពីព្រឹកមិញបានបង្ហោះវីឌីអូឃ្លីបរយៈពេល៨នាទីដែលមានសេចក្ដីជាអាទិ៍ថា៖ អស់រយៈពេល៤៧ឆ្នាំហើយ របបដឹកនាំនៅអ៊ីរ៉ង់ស្រែកដាក់បណ្ដាសាឱ្យអាមេរិករលាយហិនហោច និងបើកយុទ្ធនាការកាប់សម្លាប់មនុស្សគ្មានថ្ងៃបញ្ចប់, វាយប្រហារតែអាមេរិក, ទាហានអាមេរិក និងប្រជាជនស្លូតត្រង់។ នៅក្នុងវីឌីអូដែលបង្ហោះនៅលើបណ្ដាញសង្គមនោះ ត្រាំអំពាវនាវឱ្យប្រជាជនអ៊ីរ៉ង់ស្វែងរកទីកន្លែងសុវត្ថិភាពដើម្បីលាក់ខ្លួនពួនអាត្មានៅអំឡុងពេលវាយប្រហារគ្នាទៅវិញទៅមក។ នៅពេលយើងបិទបញ្ចប់ប្រតិបត្តិការនេះ អ្នកអាចចូលគ្រប់គ្រងរដ្ឋាភិបាល (អ៊ីរ៉ង់), រដ្ឋាភិបាលជារបស់អ្នក។ ខ្សែអាត់វីឌីអូនោះត្រូវគេគិតថាជាសារនយោបាយដើម្បីបង្ហាញពីភាពសមហេតុផលដែលលោកត្រូវតែវាយប្រហារអ៊ីរ៉ង់ក្រោមកិច្ចសហការយ៉ាងពេញទំហឹងជាមួយអ៊ីស្រាអែល។
ការវាយប្រហារនេះបានរីករាលដាលហួសពីព្រំដែនប្រទេសអ៊ីរ៉ង់បាត់ទៅហើយបន្ទាប់ពីអ៊ីរ៉ង់វាយសងសឹកទៅលើមូលដ្ឋានយោធារបស់អាមេរិកនៅប្រទេសជាច្រើននៃតំបន់មជ្ឈិមបូព៌ា និងក៏វាយប្រហារទីក្រុងនានារបស់អ៊ីស្រាអែលផងដែរ។ កងទ័ពឆ័ត្រយោងបដិវត្តរបស់អ៊ីរ៉ង់ថ្លែងថាខ្លួនបានឆ្លើយតបលើកទីមួយដោយបញ្ជូនដ្រូន និងមីស៊ីលទៅវាយប្រហារអ៊ីស្រាអែល។ នៅប្រទេសបារ៉េន អាជ្ញាធរនិយាយថាអ៊ីរ៉ង់បាញ់មីស៊ីលមួយគ្រាប់ចូលបញ្ជាការដ្ឋានកងនាវាចរណ៍ទី៥របស់អាមេរិក។ នៅប្រទេសគុយវែត សាក្សីនៅនឹងកន្លែងកើតហេតុស្ដាប់ឮសំឡេងផ្ទុះយ៉ាងកក្រើក និងឮសំឡេងស៊ីរ៉ែនប្រកាសអាសន្នស្រែកកងរំពងពេញផ្ទៃអាកាស។ នៅប្រទេសកាតា ក៏មានសំឡេងផ្ទុះយ៉ាងខ្លាំងក្លាផងដែរ។ នៅប្រទេសអារ៉ាប់រួម ជនស៊ីវិលម្នាក់ស្លាប់ដោយសារអំបែងគ្រាប់មីស៊ីលរបស់អ៊ីរ៉ង់។ ប្រទេសទាំងនេះសុទ្ធតែមានមូលដ្ឋានយោធារបស់អាមេរិក។
ក្រុមហ៊ូទីដែលជាចលនាប្រដាប់អាវុធមានមូលដ្ឋាននៅប្រទេសយេម៉ែន (Yemen) និងដែលទទួលការទំនុកបម្រុងពីអ៊ីរ៉ង់ដើម្បីប្រឆាំងអ៊ីស្រាអែល ក៏ចង់ចូលរួមនៅក្នុងសង្គ្រាមនេះផងដែរ។ គេនៅចាំបានថាក្រុមនេះធ្លាប់បានចុះកិច្ចព្រមព្រៀងលើបទឈប់បាញ់ជាមួយអាមេរិក និងសន្យាឈប់រំខានច្រកសមុទ្រក្រហមតទៅទៀត។ ប៉ុន្តែថ្ងៃនេះ ពួកគេប្រកាសថានឹងចាប់ផ្ដើមធ្វើសកម្មភាពរំខាននាវាដឹកទំនិញនៅច្រកសមុទ្រនោះឡើងវិញ។ ម៉្យាងទៀត ពួកគេក៏ត្រៀមចាត់ការអ៊ីស្រាអែលផងដែរ។ នេះបើយោងតាមការបង្ហើបឱ្យដឹងពីមន្ត្រីជាន់ខ្ពស់ហ៊ូទី២រូប៕ ប្រភព៖ អេកូណូមិច ថាមស៍ (Economic Times) និងប្រភពដទៃទៀត
ចែករំលែកព័តមាននេះ