ការវាយប្រហាររបស់សហរដ្ឋអាមេរិក និងអ៊ីស្រាអែល ទៅលើអ៊ីរ៉ង់ មានឫសគល់នៅក្នុងការប្រឈមមុខដាក់គ្នាអស់រយៈពេលជាច្រើនឆ្នាំ លើកម្មវិធីនុយក្លេអ៊ែររបស់ទីក្រុងតេអេរ៉ង់ និងឥទ្ធិពលក្នុងតំបន់ នេះបើតាមការចេញផ្សាយរបស់ Al Jazeera ។…
ការវាយប្រហាររបស់សហរដ្ឋអាមេរិក និងអ៊ីស្រាអែល ទៅលើអ៊ីរ៉ង់ មានឫសគល់នៅក្នុងការប្រឈមមុខដាក់គ្នាអស់រយៈពេលជាច្រើនឆ្នាំ លើកម្មវិធីនុយក្លេអ៊ែររបស់ទីក្រុងតេអេរ៉ង់ និងឥទ្ធិពលក្នុងតំបន់ នេះបើតាមការចេញផ្សាយរបស់ Al Jazeera ។
សម្ព័ន្ធមិត្តទាំងពីរ(សហរដ្ឋអាមេរិក និងអ៊ីស្រាអែល) បានជជែកវែកញែកជាយូរមកហើយថា សកម្មភាពបង្កើនប្រសិទ្ធភាព និងសមត្ថភាពមីស៊ីលរបស់អ៊ីរ៉ង់ បង្កការគំរាមកំហែងដល់អត្ថិភាព ហើយបានគំរាមកំហែងម្តងហើយម្តងទៀត ថានឹងប្រើកម្លាំងដើម្បីបញ្ឈប់វា ។
កាលពីខែមិថុនា កងកម្លាំងអ៊ីស្រាអែល និងសហរដ្ឋអាមេរិក បានវាយប្រហារទីតាំងនុយក្លេអ៊ែរ និងយោធារបស់អ៊ីរ៉ង់ រួមទាំងការធ្វើឃាតមេបញ្ជាការជាន់ខ្ពស់ និងការវាយប្រហារលើទីតាំងនានា នៅក្នុងប្រទេសអ៊ីរ៉ង់ ។
មន្ត្រីអ៊ីរ៉ង់ រួមទាំងប្រធានាធិបតី Masoud Pezeshkian បាននិយាយម្តងហើយម្តងទៀត ថាពួកគេនឹងមិនអភិវឌ្ឍអាវុធនុយក្លេអ៊ែរឡើយ ។
ទីភ្នាក់ងារស៊ើបការណ៍សម្ងាត់របស់សហរដ្ឋអាមេរិក និងអង្គការឃ្លាំមើលនុយក្លេអ៊ែររបស់អង្គការសហប្រជាជាតិ មិនបានរកឃើញភស្តុតាង ដែលបង្ហាញថាអ៊ីរ៉ង់កំពុងស្វែងរកអាវុធបរមាណូយ៉ាងសកម្មនោះទេ ប៉ុន្តែអ៊ីស្រាអែល និងឥស្សរជនមួយចំនួននៅក្នុងរដ្ឋបាលលោក Trump បានបន្តផ្សព្វផ្សាយការអះអាងនោះថា ទីក្រុងតេអេរ៉ង់ កំពុងបង្កើនកម្មវិធីនុយក្លេអ៊ែររបស់ខ្លួន ។
ក្នុងរយៈពេលប៉ុន្មានឆ្នាំមកនេះ កម្មវិធីនុយក្លេអ៊ែររបស់អ៊ីរ៉ង់ បានក្លាយជាចំណុចសំខាន់ នៃភាពតានតឹងការទូត ការដាក់ទណ្ឌកម្ម និងការចរចាកម្រិតខ្ពស់ ដោយក្នុងនោះអ្វីដែលគួរឲ្យយកចិត្តទុកដាក់គឺសន្ធិសញ្ញានុយក្លេអ៊ែរ JCPOA (Joint Comprehensive Plan of Action) ឆ្នាំ២០១៥ ជាមួយមហាអំណាចពិភពលោកចំនួន៦ មានដូចជា អាមេរិក អង់គ្លេស បារាំង ចិន រុស្ស៊ី និងអាល្លឺម៉ង់។ អ៊ីរ៉ង់បានយល់ព្រមកំណត់កម្រិតសកម្មភាពនុយក្លេអ៊ែររបស់ខ្លួន និងអនុញ្ញាតឲ្យមានការត្រួតពិនិត្យអន្តរជាតិដ៏រឹងមាំជាថ្នូរនឹងការបន្ធូរបន្ថយទណ្ឌកម្ម ។
យ៉ាងណាមិញ កិច្ចព្រមព្រៀងបានដួលរលំនៅពេលដែលអាមេរិកដកខ្លួននៅឆ្នាំ២០១៨ ក្រោមការដឹកនាំរបស់លោកប្រធានាធិបតី ដូណាល់ ត្រាំ ដោយបានអនុវត្តទណ្ឌកម្មធ្ងន់ធ្ងរឡើងវិញ លើទីក្រុងតេអេរ៉ង់ ។
មកទល់នឹងបច្ចុប្បន្ននេះ កម្មវិធីនុយក្លេអ៊ែររបស់អ៊ីរ៉ង់ កំពុងបង្កើនសារធាតុអ៊ុយរ៉ាញ៉ូមរហូតដល់កម្រិតភាពសុទ្ធ ៦០% ខណៈកម្រិតគ្រោះថ្នាក់ ដែលអាចផលិតអាវុធនុយក្លេអ៊ែរបានគឺ ៩០%។ យោងតាម IAEA ពេលនេះ អ៊ីរ៉ង់មានសម្ភារៈគ្រប់គ្រាន់ហើយ ហើយបើបន្តបែបនេះទៀតនោះអ៊ីរ៉ង់នឹងអាចផលិតអាវុធនុយក្លេអ៊ែរជាច្រើនគ្រាប់ ។
ថ្វីត្បិតមានការខិតខំប្រឹងប្រែងពីសំណាក់សហរដ្ឋអាមេរិក មហាអំណាចអឺរ៉ុប និង IAEA ដើម្បីចាប់ផ្តើមកិច្ចសន្ទនាប្រកបដោយអត្ថន័យឡើងវិញក៏ដោយ ក៏កិច្ចពិភាក្សាបានជាប់គាំង។ អ៊ីរ៉ង់ទទូចថា កម្មវិធីរបស់ខ្លួននៅតែមានលក្ខណៈសន្តិភាព ប៉ុន្តែសហគមន៍អន្តរជាតិ នៅតែមិនជឿជាក់ ជាពិសេស នៅពេលដែលក្រុងតេអេរ៉ង់បង្កើនសមត្ថភាពមីស៊ីលរបស់ខ្លួន និងពង្រឹងទំនាក់ទំនងការពារជាតិកាន់តែជិតស្និទ្ធជាមួយរុស្ស៊ី និង ចិន ៕
ចែករំលែកព័តមាននេះ