ទីក្រុងយេរូសាឡឹម៖ បន្ទាប់ពីទទួលរងការវាយប្រហារពីអាមេរិកផង និងអ៊ីស្រាអែលផងកាលពីព្រឹកមិញ ប្រទេសអ៊ីរ៉ង់ចាប់ផ្ដើមវាយប្រហារសងសឹកវិញយ៉ាងខ្លាំងក្លា។ អ៊ីរ៉ង់វាយប្រហារទាំងមូលដ្ឋានយោធាអាមេរិកផង និងអ៊ីស្រាអែលផង។ គេស្ដាប់ឮសំឡេងផ្ទុះយ៉ាងកក្រើកព្រះធរណីនៅក្នុងប្រទេសដែលមានមូលដ្ឋានយោធាអាមេរិកនៅមជ្ឈិមបូព៌ា។ ឧទាហរណ៍ប្រទេសបារ៉េន, អារ៉ាប់រួម និងកាតាជាដើម។
សារព័ត៌មានអ៊ីរ៉ង់អះអាងថាយោធាអ៊ីរ៉ង់ពិតជាវាយប្រហារមូលដ្ឋានយោធាអាមេរិកនៅប្រទេសប៉ារ៉េនមែន។ នៅក្នុងស្ថានភាពនេះ ក្រសួងមហាផ្ទៃបារ៉េនអំពាវនាវឱ្យប្រជាជនស្វែងរកទីកន្លែងជ្រកកោនជាបន្ទាន់។ ប្រទេសបារ៉េនជាសម្ព័ន្ធមិត្តរបស់អាមេរិកនៅតំបន់ឈូងសមុទ្រពែក្ស (Persian Gulf) ហើយក៏ជាបញ្ជាការដ្ឋានកងនាវាចរណ៍ទី៥របស់អាមេរិកផងដែរ។
រដ្ឋាភិបាលកាតាអះអាងថាយោធារបស់ខ្លួនបានបាញ់ទម្លាក់មីស៊ីល២គ្រាប់ដែលបាញ់ចេញពីប្រទេសអ៊ីរ៉ង់។ ក្រៅពីវាយប្រហារអាមេរិក អ៊ីរ៉ង់ក៏ចាត់វិធានការសងសឹកទៅលើអ៊ីស្រាអែលផងដែរ។ អ៊ីរ៉ង់បាញ់មីស៊ីលជាច្រើនគ្រាប់ចូលដែនអាកាសអ៊ីស្រាអែល។ ក្រសួងការពារជាតិអ៊ីស្រាអែលទទួលស្គាល់ថាអ៊ីរ៉ង់ពិតជាវាយប្រហារមែន។ ហេតុនេះ អាជ្ញាធរអ៊ីស្រាអែលបានបន្លឺសំឡេងស៊ីរ៉ែនប្រកាសអាសន្នទូទាំងប្រទេសដើម្បីដាស់អារម្មណ៍ប្រជាជនឱ្យប្រុងប្រយ័ត្ន។ រដ្ឋាភិបាលក៏បានប្រកាសដាក់ប្រទេសនៅក្នុងគ្រាអាសន្នផងដែរ។ សារព័ត៌មានក្នុងស្រុកផ្សាយថាអ៊ីរ៉ង់បាញ់មីស៊ីលជាង៧៥គ្រាប់ចូលអ៊ីស្រាអែល។ ជាតាក់ទិចរបស់អ៊ីរ៉ង់ អ៊ីរ៉ង់ច្រើនប្រើយុទ្ធសាស្ត្របាញ់មីស៊ីលច្រើនគ្រាប់ទៅលើគោលដៅជាច្រើនកន្លែងនៅក្នុងពេលតែមួយ។
ហេតុដូច្នេះ ខែលការពារដែនអាកាសរបស់អាមេរិក និងអ៊ីស្រាអែលត្រូវជាប់រវល់ខ្លាំងដើម្បីតាមប្រមាញ់មីស៊ីលទាំងនោះ។ ទោះជាយ៉ាងណាក្ដី ប្រព័ន្ធការពារដែនអាកាសរបស់ប្រទេសណាក៏ដោយមិនអាចការពារបាន១០០%នោះទេ។ នៅអ៊ីស្រាអែល មីស៊ីលរបស់អ៊ីរ៉ង់បាញ់ឆេះអាគារជាច្រើនកន្លែង។ គេឃើញផ្សែងខ្មៅងងឹតហោះហើរទៅលើអាកាសនៃប្រទេសអ៊ីស្រាអែល៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ