ទីក្រុងយេរូសាឡឹម៖ នៅទីបំផុត អាមេរិក និងអ៊ីស្រាអែលបើកការវាយប្រហារទៅលើអ៊ីរ៉ង់ហើយកាលពីមុននេះបន្តិចនៅក្នុងអ្វីដែលរដ្ឋាភិបាលអ៊ីស្រាអែលហៅថាជា «ការវាយប្រហារការពារខ្លួនទុកជាមុន»។ អ៊ីស្រាអែលប្រកាសថាខ្លួនបានត្រៀមខ្លួនរួចហើយដើម្បីទប់ទល់នឹងលទ្ធភាពនៃការវាយសងសឹកវិញពីសំណាក់ប្រទេសអ៊ីរ៉ង់។ ការវាយប្រហារនេះកើតឡើងបន្ទាប់ពីលោកដូណាល់ត្រាំទើបតែប្រកាសកាលពីយប់មិញថាលោកមិនទាន់សម្រេចចិត្តនៅទឹកផ្ដាច់ព្រ័ត្រថាយោធាអាមេរិកត្រូវវាយប្រហារអ៊ីរ៉ង់ ឬយ៉ាងណាទេ។
គេស្ដាប់ឮសំឡេងផ្ទុះគ្រាប់បែក និងមីស៊ីលយ៉ាងកងរំពងពាសពេញផ្ទៃអាកាសនៃរដ្ឋធានីតេអេរ៉ង់ និងទីក្រុងដទៃទៀត (សរុប៥ទីក្រុងដែលរងការវាយប្រហារ)។ នេះបើយោងតាមការផ្សាយរបស់សារព័ត៌មានរដ្ឋអ៊ីរ៉ង់។ ទីភ្នាក់ងារព័ត៌មានហ្វា (Fars) រាយការណ៍ថាគេស្ដាប់ឮសំឡេងផ្ទុះនៅទីក្រុងអ៊ីសហ្វាហាន (Isfahan), កូម (Qom), ការ៉ាច (Karaj) និងខឺម៉ាន់សា (Kermanshah)។ ទីភ្នាក់ងារព័ត៌មានដដែលនេះផ្សាយបន្តទៀតថាមីស៊ីលជាច្រើនគ្រាប់ក៏បានធ្លាក់នៅមណ្ឌលសាកលវិទ្យាល័យ និងទីលានសាធារណរដ្ឋផងដែរស្ថិតនៅក្នុងរដ្ឋធានីតេអេរ៉ង់។ គេឃើញផ្សែងខ្មៅងងឹតហោះហើរពេញផ្ទៃអាកាសនៃទីក្រុងនេះ។
ទីភ្នាក់ងារព័ត៌មានថាស់នីម (Tasnim) រាយការណ៍ថាសំឡេងផ្ទុះគ្រាប់កាំភ្លើងក៏កើតមាននៅតំបន់សាយេត ខាន់ដាន់ (Sayyed Khandan) ដែលស្ថិតនៅភាគខាងជើងទីក្រុងតេអេរ៉ង់ផងដែរ។ សារព័ត៌មានអ៊ីរ៉ង់ដទៃទៀតផ្សាយថាអាមេរិក និងអ៊ីស្រាអែលវាយប្រហារគ្រប់ទីកន្លែងទូទាំងប្រទេសអ៊ីរ៉ង់រួមទាំងខេត្តអ៊ីឡាម (Ilam) នៅភាគខាងលិចផងដែរ។ លោកដូណាល់ត្រាំប្រកាសនៅលើបណ្ដាញសង្គមថាការវាយប្រហារផ្គួបគ្នាពីអ៊ីស្រាអែល និងអាមេរិកលើកនេះគោលដៅដើម្បីកម្ចាត់ចោលទាំងស្រុងនូវការគំរាមកំហែងពីសំណាក់របបដឹកនាំនៅអ៊ីរ៉ង់។
លោកសរសេររៀបរាប់បន្តទៀតថា «កាលពីមុននេះបន្តិច យោធាអាមេរិកចាប់ផ្ដើមបើកប្រតិបត្តិការសឹកទ្រង់ទ្រាយធំទៅលើអ៊ីរ៉ង់។ គោលដៅរបស់យើងគឺការពារអាយុជីវិតរបស់ប្រជាជនអាមេរិកតាមរយៈការកម្ចាត់ចោលនូវអ្វីដែលជាការគំរាមកំហែងពីសំណាក់របបដឹកនាំនៅអ៊ីរ៉ង់»។ រដ្ឋមន្ត្រីការពារជាតិអ៊ីស្រាអែល លោកអ៊ីស្រាអែល ខាត់ (Israel Katz) អះអាងថាយោធាអ៊ីស្រាអែលបានបាញ់មីស៊ីលចូលដែនអាកាសអ៊ីរ៉ង់ពិតមែនដើម្បីកម្ចាត់ចោលនូវការគំរាមកំហែងពីសំណាក់អ៊ីរ៉ង់ទៅលើប្រទេសអ៊ីស្រាអែល។
កាលពីប៉ុន្មានថ្ងៃមុន លោកត្រាំថ្លែងថាលោកមិនសប្បាយចិត្តទាល់តែសោះចំពោះស្ថានការណ៍បច្ចុប្បន្ននេះ។ លោកព្រមានថាការប្រើប្រាស់កម្លាំងយោធា និងការផ្លាស់ប្ដូររបបដឹកនាំនៅអ៊ីរ៉ង់នៅតែជាជម្រើសដែលមាននៅក្នុងដៃ។ គួរកត់សម្គាល់ថាមុនការវាយប្រហារអ៊ីរ៉ង់ថ្ងៃនេះ អាមេរិក និងអ៊ីរ៉ង់បានចរចាគ្នាជាលើកទីបីដើម្បីដោះស្រាយបញ្ហានុយក្លេអ៊ែរ។ ប៉ុន្តែការចរចាដោយប្រយោលនោះបានបិទបញ្ចប់ដោយគ្មានទទួលបានលទ្ធផលអ្វីទាំងអស់។
គេនៅចាំបានថាកាលពីមុននេះប៉ុន្មានថ្ងៃ លោកត្រាំទុកពេលឱ្យអ៊ីរ៉ង់ចន្លោះពី១០-១៥ថ្ងៃដើម្បីចរចាគ្នាឱ្យមានកិច្ចព្រមព្រៀងនុយក្លេអ៊ែរ។ បើមិនដូច្នេះទេ លោកប្រើពាក្យថា «ហេតុការណ៍អាក្រក់នឹងកើតឡើង»។ អ៊ីរ៉ង់ចោទប្រកាន់ថាអាមេរិកប្រើភាសាភូតកុហកពាក់ព័ន្ធនឹងកម្មវិធីមីស៊ីលបន្ទាប់ពីលោកត្រាំ និងមន្ត្រីជាន់ខ្ពស់អាមេរិករួមទាំងអនុប្រធានាធិបតី និងរដ្ឋមន្ត្រីការបរទេសផងដែរអះអាងថាអ៊ីរ៉ង់មានផែនការផលិតអាវុធនុយក្លេអ៊ែរ និងមីស៊ីលអន្តរទ្វីបសម្រាប់វាយប្រហារប្រទេសអាមេរិក។ លោកត្រាំចាត់ទុកអ៊ីរ៉ង់ជាអ្នកជួយជ្រោមជ្រែងធំជាងគេ (ផ្នែកអាវុធយុទ្ធភ័ណ្ឌ និងលុយកាក់) ចំពោះក្រុមភេរវកម្មនានានៅលើសាកលលោក។ មិនតែប៉ុណ្ណោះ លោកអះអាងថាកាលពីអំឡុងពេលផ្ទុះបាតុកម្មខែមករានៅអ៊ីរ៉ង់ ក្រុមអ្នកតវ៉ាស្លាប់យ៉ាងរង្គាលរហូតដល់៣២០០០នាក់យ៉ាងតិច។
អ្នកនាំពាក្យអ៊ីរ៉ង់ច្រានចោលការអះអាងទាំងនេះ។ លោកបានបង្ហោះសារនៅលើបណ្ដាញអ៊ិចថាទោះបីពួកគេនិយាយអ្វីពាក់ព័ន្ធនឹងកម្មវិធីនុយក្លេអ៊ែររបស់អ៊ីរ៉ង់, ទោះបីពួកគេនិយាយអ្វីពាក់ព័ន្ធនឹងមីស៊ីលអន្តរទ្វីប និងទោះបីពួកគេនិយាយថាបាតុករស្លាប់ប៉ុន្មាននាក់ក៏ដោយ នោះសុទ្ធតែជាការនិយាយភូតកុហកទាំងអស់។ តាមពិត ផែនការវាយប្រហារអ៊ីរ៉ង់បានរៀបចំជាច្រើនខែមកហើយ ហើយការកំណត់ថាត្រូវវាយប្រហារនៅពេលណានោះគឺត្រូវបានសម្រេចចិត្តកាលពីប៉ុន្មានសប្ដាហ៍មុននេះ។ លោកត្រាំបានបង្ហោះវីឌីអូឃ្លីបមានរយៈពេល៨នាទីនៅលើបណ្ដាញសង្គមដើម្បីបញ្ជាក់ថាអាមេរិកពិតជាចូលរួមនៅក្នុងការវាយប្រហារនេះមែន៕ ប្រភព៖ រ៉យទ័រ (Reuters), ដឹហ្កាឌាន (The Guardian) និងប្រភពដទៃទៀត
ចែករំលែកព័តមាននេះ