ទីក្រុងយេរូសាឡឹម៖ នៅពេលមានសញ្ញាថាសង្គ្រាមនៅអ៊ីរ៉ង់ជិតផ្ទុះឡើងឆាប់ៗនេះ អាមេរិកយល់ព្រមអនុញ្ញាតឱ្យបុគ្គលិកស្ថានទូតរបស់ខ្លួន រួមជាមួយក្រុមគ្រួសាររបស់ពួកគេចាកចេញពីប្រទេសអ៊ីស្រាអែលជាបន្ទាន់កាន់តែឆាប់កាន់តែល្អ។ អាមេរិកទុកតែបុគ្គលិកដែលត្រូវរ៉ាប់រងធ្វើកិច្ចការចាំបាច់បំផុតប៉ុណ្ណោះ។ ខាងលើនេះជាការប្រកាសរបស់ស្ថានទូតអាមេរិកប្រចាំទីក្រុងយេរូសាឡឹមចំពេលដែលគេបារម្ភកាន់តែខ្លាំងឡើងៗថាយោធាអាមេរិកនឹងវាយប្រហារអ៊ីរ៉ង់ឆាប់ៗនេះ។
ស្ថានទូតគ្រាន់តែបញ្ជាក់ដោយខ្លីថាគេបារម្ភអំពីបញ្ហាសុវត្ថិភាព ប៉ុន្តែមិនបានបញ្ជាក់លម្អិតថានឹងមានអ្វីកើតឡើងនោះទេ។ បន្ទាប់ពីថ្នាក់លើចេញសេចក្ដីអនុញ្ញាតឱ្យចាកចេញ បុគ្គលិកស្ថានទូតអាចសម្រេចចិត្តដោយខ្លួនឯងថាត្រូវបន្តនៅសិន ឬក៏ត្រូវចាកចេញជាបន្ទាន់។ កាលពីមុននេះ ស្ថានទូតអាមេរិកប្រចាំប្រទេសលីបង់ក៏ចេញសេចក្ដីប្រកាសស្រដៀងគ្នានេះផងដែរ។ សារព័ត៌មានញូយ៉កថាមស៍ផ្សាយថាឯកអគ្គរដ្ឋទូតអាមេរិកប្រចាំប្រទេសអ៊ីស្រាអែល លោកម៉ាយ ហាក់ខាប៊ី (Mike Huckabee) បានផ្ញើអ៊ីមែលទៅបុគ្គលិកស្ថានទូតថាអ្នកដែលចង់ចាកចេញពីអ៊ីស្រាអែលអាចចាកចេញបានពីថ្ងៃនេះតទៅ។
លោកហាក់ខាប៊ីសរសេររៀបរាប់នៅក្នុងអ៊ីមែលថាមិនចាំបាច់ភ័យស្លន់ស្លោពេកទេ។ ប៉ុន្តែលោកសូមផ្ដាំទៅអ្នកដែលចង់ចាកចេញ បើមុនឬក្រោយគង់តែចាកចេញដដែលទេ គួរណាស់ចាកចេញចាប់ពីពេលនេះទៅប្រសើរជាងនៅបង្អែបង្អង់។ ស្ថានទូតអាមេរិកមិនបានធ្វើអត្ថាធិប្បាយលើការចុះផ្សាយរបស់ញូយ៉កថាមស៍ទេ។ សេចក្ដីប្រកាសនេះធ្វើឡើងចំពេលដែលអាមេរិកបន្តកសាងកម្លាំងយោធាកាន់តែច្រើនឡើងៗនៅមជ្ឈិមបូព៌ា ខណៈដែលប្រទេសនេះបន្តចរចានុយក្លេអ៊ែរជាមួយអ៊ីរ៉ង់។
ឯកអគ្គរដ្ឋទូតអាមេរិកប្រចាំប្រទេសអ៊ីស្រាអែល លោកម៉ាយ ហាក់ខាប៊ី (Mike Huckabee)ការចរចាគ្នាដោយប្រយោលលើកទីបីដែលទើបតែបិទបញ្ចប់កាលពីថ្ងៃព្រហស្បតិ៍នោះគ្មានទទួលបានលទ្ធផលអ្វីទាំងអស់។ អ៊ីរ៉ងធ្លាប់ព្រលយពាក្យថាបើសិនអាមេរិកហ៊ានវាយប្រហារមកលើខ្លួនមែននោះ ខ្លួននឹងចាត់ការមូលដ្ឋានយោធារបស់អាមេរិកនៅមជ្ឈិមបូព៌ា។ បើសង្គ្រាមនេះផ្ទុះឡើងមែន អ៊ីស្រាអែលក៏អាចនឹងចូលរួមជាមួយអាមេរិកដែរ។ ទោះបីប្រទេសអូម៉ង់ដែលជាអ្នកសម្របសម្រួលការចរចាអះអាងថាមានសញ្ញាល្អ ប៉ុន្តែអ៊ីរ៉ង់ប្រកែកដាច់ខាតមិនព្រមឈប់ចម្រាញ់សារធាតុអ៊ុយរ៉ាញ៉ូមទេ។
អាមេរិកថាបើចម្រាញ់ក៏ចម្រាញ់ចុះ។ ប៉ុន្តែត្រូវចម្រាញ់នៅប្រទេសដទៃ រួចហើយសឹមដឹកចូលប្រទេសអ៊ីរ៉ង់។ ត្រង់ចំណុចនេះក៏អ៊ីរ៉ង់មិនព្រមដែរ។ អ៊ីរ៉ង់ចង់ចម្រាញ់អ៊ុយរ៉ាញ៉ូមជាបន្តទៀត ហើយចម្រាញ់នៅលើទឹកដីរបស់ខ្លួនតែម្ដង។ ឥឡូវនេះ គេឃើញថាសារព័ត៌មានរបស់អ៊ីរ៉ង់ចាប់ផ្ដើមបង្ហាញការរសាប់រសល់អន្ទះអន្ទែងនៅក្នុងចិត្ត (anxiety) ព្រោះខ្លាចសង្គ្រាមកើតឡើងឆាប់ៗនេះ។ ទោះបីមន្ត្រីរដ្ឋាភិបាល និងប្រព័ន្ធផ្សព្វផ្សាយរបស់រដ្ឋខិតខំនិយាយបញ្ចុះបញ្ចូលមិនឱ្យមនុស្សមានអារម្មណ៍ភិតភ័យយ៉ាងណាក្ដី ប៉ុន្តែសារព័ត៌មានឯកជនអ៊ីរ៉ង់នៅតែចុះផ្សាយបែបព្រមានទុកជាមុនថាអាមេរិក ឬអ៊ីស្រាអែលអាចនឹងវាយប្រហារឆាប់ៗនេះ៕ ប្រភព៖ ញូស្វីក (Newsweek), រ៉យទ័រ (Reuters) និងប្រភពដទៃទៀត
ចែករំលែកព័តមាននេះ