ខេត្តព្រៃវែង ៖ នៅថ្ងៃទី២៧ កុម្ភៈ រដ្ឋបាលក្រុងព្រៃវែង បានរៀបចំកម្មវិធីធ្វើអនាម័យសម្អាតទីក្រុង ដើម្បីចូលរួមអបអរសាទរ ទិវាជាតិទីក្រុងស្អាតលើកទី១៣ ឆ្នាំ២០២៦ ក្រោមប្រធានបទ«សាមគ្គីដើម្បីទីក្រុងស្អាត»…
ខេត្តព្រៃវែង ៖ នៅថ្ងៃទី២៧ កុម្ភៈ រដ្ឋបាលក្រុងព្រៃវែង បានរៀបចំកម្មវិធីធ្វើអនាម័យសម្អាតទីក្រុង ដើម្បីចូលរួមអបអរសាទរ ទិវាជាតិទីក្រុងស្អាតលើកទី១៣ ឆ្នាំ២០២៦ ក្រោមប្រធានបទ«សាមគ្គីដើម្បីទីក្រុងស្អាត» ក្រោមអធិបតីភាពលោកស្រី សេង ទៀង អភិបាលរងខេត្ត តំណាងដ៏ខ្ពង់ខ្ពស់លោក សួន សុម៉ាលីន អភិបាល នៃគណៈអភិបាលខេត្តព្រៃវែង ដោយមានការចូលរួមពីអាជ្ញាធរ កងកម្លាំងទាំងបី ព្រមទាំងប្រជាពលរដ្ឋ ក្នុងក្រុងព្រៃវែងយ៉ាងច្រើនកុះករ ។
លោកស្រី សេង ទៀង អភិបាលរងខេត្ត មានប្រសាសន៍លើកឡើងថា យុទ្ធនាការសម្អាតអនាម័យបរិស្ថាននេះ ធ្វើឡើងក្នុងគោលបំណងបង្កើនការយល់ដឹងដល់បងប្អូនប្រជាពលរដ្ឋ ដែលរស់នៅខេត្តព្រៃវែង អំពីបញ្ហាបរិស្ថាន និងលើកទឹកចិត្តដល់បងប្អូនប្រជាពលរដ្ឋ ចូលរួមថែរក្សាអនាម័យបរិស្ថាន វេចខ្ចប់សំរាមឱ្យបានត្រឹមត្រូវ ទាំងនៅគេហដ្ឋាន និងសហគមន៍។ ហើយការដោះស្រាយបញ្ហានេះ មិនមែនជាការងាររបស់បុគ្គលណាម្នាក់ ឬស្ថាប័នណាមួយនោះទេ ប៉ុន្តែជាការទទួលខុសត្រូវរួមរបស់យើងទាំងអស់គ្នា ដើម្បីក្រុងព្រៃវែងមានភាពស្អាត ភាពបៃតង និងចីរភាពស្របតាមពាក្យស្លោក «កម្ពុជាស្អាត ខ្មែរធ្វើបាន» ។
លោកស្រី អភិបាលរងខេត្ត បានបន្ថែមថា សំរាម និងសំណល់ប្លាស្ទិក គឺជាបញ្ហាដ៏ធ្ងន់ធ្ងរ ដោយសារតែការកើនឡើង នៃការប្រើប្រាស់ផលិតផលប្លាស្ទិក ក្នុងជីវភាពរស់នៅប្រចាំថ្ងៃ។ កាកសំណល់សំរាម និងថង់ប្លាស្ទិក មិនត្រឹមតែប៉ះពាល់ដល់សោភ័ណភាពទីក្រុង ប៉ុណ្ណោះទេ តែថែមទាំងបង្កផលប៉ះពាល់យ៉ាងធ្ងន់ធ្ងរដល់បរិស្ថាន ប្រព័ន្ធអេកូឡូស៊ី សុខភាពសាធារណៈ និងសេដ្ឋកិច្ចជាតិផងដែរ។
លោកស្រី អភិបាលរងខេត្ត បានអំពាវនាវដល់ប្រជាពលរដ្ឋទាំងអស់ ឈប់បោះសំរាមចោលតាមដងផ្លូវ ហើយសូមឱ្យចូលរួមសាមគ្គីគ្នាសម្អាតបរិស្ថាន និងថែរក្សាបរិស្ថានទាំងអស់គ្នា ដើម្បីខេត្តព្រៃវែង មានសោភណភាពស្អាត ពោរពេញទៅដោយពណ៌បែតង និងគ្មានសំរាមនៅតាមទីសាធារណៈ ៕
ចែករំលែកព័តមាននេះ