ទីក្រុងតូក្យូ ៖ យោងតាមទិន្នន័យផ្លូវការបានបង្ហាញនៅថ្ងៃ២៦ ខែកុម្ភៈ ឆ្នាំ២០២៦ បានបង្ហាញថា អត្រាកំណើតនៅក្នុងប្រទេសជប៉ុនបានធ្លាក់ចុះនៅក្នុងរយៈពេល ១០ ឆ្នាំជាប់គ្នានៅក្នុងឆ្នាំ ២០២៥…
ទីក្រុងតូក្យូ ៖ យោងតាមទិន្នន័យផ្លូវការបានបង្ហាញនៅថ្ងៃ២៦ ខែកុម្ភៈ ឆ្នាំ២០២៦ បានបង្ហាញថា អត្រាកំណើតនៅក្នុងប្រទេសជប៉ុនបានធ្លាក់ចុះនៅក្នុងរយៈពេល ១០ ឆ្នាំជាប់គ្នានៅក្នុងឆ្នាំ ២០២៥ ដោយបានបង្ហាញពីបញ្ហាប្រឈមសម្រាប់លោកស្រីនាយករដ្ឋមន្ត្រី សាណាអេ តាកាអ៊ីឈី (Sanae Takaichi)។
ទិន្នន័យបឋមរបស់ក្រសួងសុខាភិបាលជប៉ុនបង្ហាញថា ទារកសរុបចំនួន ៧០៥ ៨០៩ នាក់បានកើតនៅក្នុងប្រទេសជប៉ុន ដែលធ្លាក់ចុះ ២,១% បើធៀបទៅនឹងឆ្នាំ ២០២៤។ ទិន្នន័យនេះរួមមានកំណើតរបស់ជនជាតិជប៉ុននៅក្នុងប្រទេសជប៉ុន កំណើតជនបរទេសនៅក្នុងប្រទេសជប៉ុន និងទារកកើតពីជនជាតិជប៉ុននៅបរទេស។
តួលេខកាលពីឆ្នាំមុនក៏បានបង្ហាញថា ចំនួនមនុស្សដែលមានអាយុ ១០០ ឆ្នាំឡើងទៅមានចំនួនជិត ១០ ម៉ឺននាក់ ដែលក្នុងនោះជិត ៩០% ជាស្ត្រី។ ចំនួនប្រជាជនដែលកំពុងថយចុះក៏កំពុងបំផ្លាញសហគមន៍ជនបទផងដែរ ដោយចំនួនផ្ទះសម្បែងដែលគេបោះបង់ចោលនៅក្នុងប្រទេសជប៉ុនឥឡូវនេះមានប្រហែល ៤ លានខ្នង។
ជប៉ុន ដែលជាប្រទេសសេដ្ឋកិច្ចធំលំដាប់ទី ៤ ពិភពលោក ស្ថិតនៅក្នុងប្រទេសមានអត្រាកំណើតទាបបំផុតមួយរបស់ពិភពលោក និងចំនួនប្រជាជនធ្លាក់ចុះ ដែលកំពុងនាំឱ្យមានបញ្ហាជាច្រើនរួចទៅហើយ រួមទាំង កង្វះខាតកម្លាំងពលកម្ម សេវាសន្តិសុខសង្គមកើនឡើងខ្ពស់ និងកម្មករតិចជាងមុនដែលបង់ពន្ធ។ បញ្ហានេះកំពុងបន្ថែមទៅលើបំណុលដ៏ច្រើនរបស់ប្រទេសជប៉ុន ដោយវាមានសមាមាត្របំណុលខ្ពស់បំផុតក្នុងចំណោមប្រទេសសេដ្ឋកិច្ចធំៗ។
មេដឹកនាំជប៉ុនពីមុនៗ រួមទាំងលោកស្រី សាណាអេ តាកាអ៊ីឈី ដែលជានាយករដ្ឋមន្ត្រីស្ត្រីដំបូងរបស់ប្រទេសនេះ បានសន្យាថានឹងបង្កើនអត្រាកំណើត ប៉ុន្តែការសន្យាទទួលបានជោគជ័យមានកម្រិតនៅឡើយ។ លោកស្រីនាយករដ្ឋមន្ត្រី តាកាអ៊ីឈី បានថ្លែងនៅក្នុងសភាកាលពីពេលថ្មីៗនេះថា អត្រាកំណើតធ្លាក់ចុះ និងចំនួនប្រជាជនថយចុះ គឺជាស្ថានភាពអាសន្នដ៏ស្ងប់ស្ងាត់មួយ ដែលនឹងធ្វើឱ្យប្រទេសជប៉ុនចុះខ្សោយបន្តិចម្តងៗ។
គណបក្សប្រជាធិបតេយ្យសេរី (LDP) ដែលកំពុងកាន់អំណាចរបស់លោកស្រី តាកាអ៊ីឈី បានឈ្នះសំឡេងភាគច្រើន ២ ភាគ ៣ នៅក្នុងការបោះឆ្នោតមុនកាលកំណត់នៅថ្ងៃទី៨ ខែកុម្ភៈ កន្លងទៅ។
ការបង្កើនអត្រាអន្តោប្រវេសន៍នឹងរួមចំណែកជួយបញ្ច្រាសចំនួនប្រជាជនធ្លាក់ចុះរបស់ប្រទេសជប៉ុន និងបញ្ហាពាក់ព័ន្ធក្នុងទីផ្សារការងារ។ ប៉ុន្តែទោះយ៉ាងណាក៏ដោយ ក្រោមសម្ពាធពីគណបក្ស Sanseito នោះ លោកស្រីតាកាអ៊ីឈី បានសន្យាថានឹងចាត់វិធានការកាន់តែតឹងរ៉ឹងលើសកម្មភាពអន្តោប្រវេសន៍។
ដ្បិតរដ្ឋាភិបាលជប៉ុនបានប្រកាសកាលពីថ្ងៃទី២៦ ខែកុម្ភៈ ថា ខ្លួនកំពុងតែខិតខំកសាងសេដ្ឋកិច្ចឱ្យកាន់តែរឹងមាំ ដើម្បីកាត់បន្ថយបន្ទុកសេដ្ឋកិច្ចនៃការថែទាំកុមារសម្រាប់គ្រួសារកម្មករ៕ ប្រភព ៖ AFP
ចែករំលែកព័តមាននេះ