ចំណេះដឹង៖ យោងតាមការចុះផ្សាយពីប្រភពបរទេស ទំនុកចិត្តពិតប្រាកដមិនមែនបានមកពីតែសម្លៀកបំពាក់ថ្លៃៗនោះទេ ប៉ុន្តែវាបញ្ចេញមកពីខាងក្នុង និងការត្រៀមខ្លួនបានយ៉ាងល្អ។ មិនថាអ្នកត្រូវចូលរួមក្នុងកិច្ចប្រជុំសំខាន់ ឬជួបមនុស្សថ្មីៗ យុទ្ធសាស្ត្រទាំង ៦ នេះនឹងជួយឱ្យអ្នកលេចធ្លោ និងមានភាពទាក់ទាញបំផុត៖

ជំហានដំបូងគឺ ការរៀបចំខ្លឹមសារឱ្យបានច្បាស់លាស់ ព្រោះភាពភ័យខ្លាចច្រើនតែកើតចេញពីការមិនច្បាស់លាស់លើព័ត៌មាន។ នៅពេលអ្នកយល់ច្បាស់ពីប្រធានបទដែលត្រូវនិយាយ ទំនុកចិត្តនឹងបញ្ចេញមកតាមរយៈទឹកមុខ និងសម្តីដោយឯកឯង។ បន្ទាប់មក គឺការប្រើ ភាសាកាយវិការ ដោយរក្សាឥរិយាបថឱ្យត្រង់ បើកទ្រូង និងមិនបត់ដៃ ដែលជាសញ្ញាបង្ហាញពីភាពម្ចាស់ការលើស្ថានការណ៍។

ការកសាងទំនាក់ទំនងតាមរយៈ ការសម្លឹងភ្នែក​ ក៏ជារឿងមិនអាចរំលងបាន ព្រោះវាបង្ហាញពីភាពស្មោះត្រង់ និងភាពជឿជាក់លើខ្លួនឯង។ ទន្ទឹមនឹងនេះ អ្នកត្រូវ គ្រប់គ្រងសំឡេង ដោយនិយាយយឺតៗ ច្បាស់ៗ និងមានការផ្អាកឱ្យចំចំណុច ដែលបង្ហាញពីចរិតជាអ្នកដឹកនាំ។ បន្ថែមពីលើនេះ ការស្លៀកពាក់ឱ្យមានរបៀបរៀបរយ និងស័ក្តិសមនឹងកាលៈទេសៈ នឹងជួយពង្រឹងស្មារតីឱ្យកាន់តែរឹងមាំ។

ជាចុងក្រោយ ការគិតវិជ្ជមាន មុនពេលចាប់ផ្ដើមការងារ គឺជាថាមពលដ៏សំខាន់។ ការស្រមៃមើលរូបភាពជោគជ័យ និងការលើកទឹកចិត្តខ្លួនឯង នឹងជួយឱ្យអ្នកដោះស្រាយរាល់សម្ពាធដោយភាពស្ងប់ស្ងាត់។ ទំនុកចិត្តគឺជាជំនាញដែលត្រូវការការអនុវត្តជាប្រចាំ ហើយនៅពេលដែលអ្នកជឿជាក់លើសមត្ថភាពខ្លួនឯង អ្នកនឹងក្លាយជាមនុស្សម្នាក់ដែលមានឥទ្ធិពលបំផុតនៅក្នុងបន្ទប់​៕