រាជធានីភ្នំពេញ៖ ​ក្រសួងធនធានទឹក និងឧតុនិយម បានឱ្យដឹងថា ចាប់ពីថ្ងៃទី ២៧ ខែកុម្ភៈ ដល់ថ្ងៃទី ០១ ខែមីនា ឆ្នាំ ២០២៦​ កម្ពុជាអាចនឹងមានភ្លៀងធ្លាក់ លាយឡំខ្យល់កន្ត្រាក់នៅតាមតំបន់មួយចំនួន។

ក្នុងនោះ តំបន់មាត់សមុទ្រដែលរួមមានខេត្តកោះកុង ព្រះសីហនុ កំពត កែប និងជួរភ្នំបូកគោ អាចមានភ្លៀងធ្លាក់និងខ្យល់កន្ត្រាក់គ្របដណ្តប់លើផ្ទៃដីប្រមាណ ៣០%។ ដោយឡែក តំបន់វាលទំនាបដែលរួមមានរាជធានីភ្នំពេញ និងបណ្តាខេត្តចំនួន ១៣ ផ្សេងទៀត អាចមានភ្លៀងធ្លាក់ និងខ្យល់កន្ត្រាក់ក្នុងកម្រិត ២៥% នៃផ្ទៃដី។

សម្រាប់បណ្តាខេត្តនៅតំបន់ខ្ពង់រាប រួមទាំងតំបន់ជួរភ្នំដងរែក និងជួរភ្នំក្រវាញ អាចមានភ្លៀងធ្លាក់ និងខ្យល់កន្ត្រាក់ក្នុងកម្រិតទាបជាងគេគឺប្រមាណ ១៥% នៃផ្ទៃដី។

អាស្រ័យហេតុនេះ ​ប្រជាពលរដ្ឋគប្បីបង្កើនការប្រុងប្រយ័ត្នចំពោះបាតុភូតធម្មជាតិទាំងនេះ​៕