ទីក្រុងព្យុងយ៉ាង៖ ប្រធានាធិបតីកូរ៉េខាងជើង លោកគីមជុងអ៊ុន ឡើងប្ដេជ្ញាចិត្តនៅក្នុងពេលថ្លែងសុន្ទរកថាបិទបញ្ចប់មហាសន្និបាតបក្សពលករកូរ៉េថាលោកនឹងខិតខំផលិតអាវុធនុយក្លេអ៊ែរឱ្យបានច្រើនថែមទៀត។ ចំពោះទំនាក់ទំនងជាមួយអាមេរិក លោកអះអាងថាគ្មានអ្វីចោទជាបញ្ហាទេ យើងអាចរាប់អានគ្នាបាន សំខាន់អាមេរិកត្រូវទទួលស្គាល់កូរ៉េខាងជើងជារដ្ឋនុយក្លេអ៊ែរ ហើយឈប់ប្រកាន់នយោបាយអរិភាពជាមួយកូរ៉េខាងជើង។
ចំពោះទំនាក់ទំនងជាមួយកូរ៉េខាងត្បូងវិញ លោកយល់ថាគ្មានអ្វីដែលត្រូវនិយាយគ្នាទេ។ កូរ៉េខាងជើងចាត់ទុកកូរ៉េខាងត្បូងដែលធ្លាប់ជាបងប្អូននឹងគ្នានោះជាសត្រូវលេខមួយរបស់ខ្លួន។ លោកថ្លែងថាលុះត្រាតែស្ថានភាពភូមិសាស្ត្រផ្សេងពីបច្ចុប្បន្ន, លុះត្រាតែកូរ៉េទាំង២គ្មានព្រំប្រទល់ជាប់គ្នា។ បើមិនដូច្នេះទេ យកល្អកូរ៉េខាងត្បូងកុំនិយាយ ឬធ្វើសកម្មភាពអ្វីប៉ះពាល់កូរ៉េខាងជើង។ យើងរស់ដោយយើង គេរស់ដោយគេ។ ទាល់តែធ្វើដូច្នេះទើបអាចរស់នៅសុខសាន្តនឹងគ្នា។
មហាសន្និបាតបក្សពលករលើកទី៩នេះរៀបចំឡើងរយៈពេលមួយសប្ដាហ៍ និងបិទបញ្ចប់ទៅវិញដោយការហែក្បួនព្យុហយាត្រាដ៏សម្បើមអស្ចារ្យជាមួយនឹងកងទ័ពចូលរួមហែក្បួន១៤០០០នាក់។ គេកត់សម្គាល់ថានៅដំណាក់កាលចុងក្រោយនេះ កូរ៉េខាងជើងកាន់តែលេចលេចមាត់នៅលើឆាកអន្តរជាតិ។ នៅក្នុងមហាសន្និបាតនេះ កូរ៉េខាងជើងក៏បានដាក់ចេញផែនការ៥ឆ្នាំជាបន្តទៀតដើម្បីសម្រេចឱ្យបាននូវគោលដៅនៃកម្មវិធីនយោបាយធំៗរបស់ខ្លួន។
កូរ៉េខាងជើងសព្វថ្ងៃនេះមានក្បាលគ្រាប់នុយក្លេអ៊ែរប្រហែល៥០គ្រាប់, មានឥន្ធនៈគ្រប់គ្រាន់អាចផលិតក្បាលគ្រាប់បាន៤០គ្រាប់បន្ថែមទៀត និងកំពុងពន្លឿនការផលិតឆ្នួនគ្រាប់បែកនុយក្លេអ៊ែរ។ នៅក្នុងការថ្លែងសុន្ទរកថាបិទបញ្ចប់មហាសន្និបាតនោះ លោកគីមក៏បានប្រកាសផែនការអភិវឌ្ឍមីស៊ីលអន្តរទ្វីបកាន់តែទំនើប និងខ្លាំងពូកែជាងមុនទៅទៀត។ ក្នុងនោះ ក៏មានផែនការផលិតមីស៊ីលអន្តរទ្វីបដែលអាចបើកប្រតិការនៅក្នុងទឹកផងដែរ៕ ប្រភព៖ អាសាហ៊ី ស៊ីមប៊ុន (Asahi Shimbun) និងប្រភពដទៃទៀត
ចែករំលែកព័តមាននេះ