តម្លៃទុរេនដែលគេចុះទៅទិញដល់ចម្ការនៅវៀតណាមត្រូវបានគេអះអាងថា ឡើងថ្លៃខ្ពស់បំផុត ពោលគឺចូលរង្វង់៦ដុល្លារនៅក្នុងមួយគីឡូក្រាម ប៉ុន្តែអ្នកលក់ផ្លែឈើនៅភ្នំពេញបានអះអាងថា វាពិតជាថ្លៃ ពីព្រោះវាជាទុរេនខុសរដូវ ហើយនៅកម្ពុជាក៏ថ្លៃដែរ ។ សារព័ត៌មាន VN…
តម្លៃទុរេនដែលគេចុះទៅទិញដល់ចម្ការនៅវៀតណាមត្រូវបានគេអះអាងថា ឡើងថ្លៃខ្ពស់បំផុត ពោលគឺចូលរង្វង់៦ដុល្លារនៅក្នុងមួយគីឡូក្រាម ប៉ុន្តែអ្នកលក់ផ្លែឈើនៅភ្នំពេញបានអះអាងថា វាពិតជាថ្លៃ ពីព្រោះវាជាទុរេនខុសរដូវ ហើយនៅកម្ពុជាក៏ថ្លៃដែរ ។
សារព័ត៌មាន VN Express បានរាយការណ៍ថា តម្លៃផ្លែទុរេនកម្រិតលេខ១ដែលគេចុះទៅទិញដល់ចម្ការនៅពេលនេះឡើងថ្លៃខ្ពស់បំផុត មិនធ្លាប់មាននៅក្នុងរយៈពេល៣ឆ្នាំកន្លងមកនេះ ពោលគឺដល់៦ដុល្លារនៅក្នុងមួយគីឡូក្រាម ។
តាមសេចក្តីរាយការណ៍ តម្លៃទុរេនឡើងនេះ វាអាចមកពីកត្តារួមច្រើន ដូចជាវាជាទុរេនដើមរដូវ ការឡើងថ្លៃជី និងកំណើនតម្រូវការពីប្រទេសផ្សេងក្រៅពីចិន ដូចជាជប៉ុន កាណាដា និងសហរដ្ឋអាមេរិកជាដើម ។
ពាក់ព័ន្ធនឹងតម្លៃទុរេននេះ អ្នកលក់ផ្លែឈើនៅរាជធានីភ្នំពេញមួយរូបបាននិយាយដោយមិនបញ្ចេញឈ្មោះថា មិនថា វៀតណាមទេ នៅខ្មែរក៏ថ្លៃដែរ ។ លោកស្រីបានអះអាងថា នៅខែនេះ ទុរេនដែលមានលក់ គឺជាទុរេនខុសរដូវ ហើយមិនច្រើនទេ ហើយតម្លៃវាមួយគីឡូក្រោមមិនក្រោម១០ដុល្លារទេ ។
លោកស្រីបានអះអាងថា «មានគេយកមកលក់ តែខ្ញុំមិនហ៊ានទេ ខ្លាចខាត ពីព្រោះវាថ្លៃបន្តិច ។ ១គីឡូថ្លៃ១០ដុល្លារ មួយផ្លែអាចពី២គីឡូឡើង អ៊ីចឹងមួយផ្លែជាង២០ដុល្លារ ពិបាករកម៉ូយហ៊ានហូបណាស់» ។
លោកស្រីបានបន្តថា ទុរេនខែនេះ នរណាអាចប្រមូលផលទុរេនខុសរដូវបែបនេះ គឺដឹងតែបានថ្លៃហើយ ពីព្រោះរដូវទុរេនទុំច្រើន គឺពីរង្វង់ខែឧសភា ដល់ខែសីហាអី គឺអស់ហើយ ។
ចែករំលែកព័តមាននេះ