ប្រទេសវៀតណាម ៖ ពលរដ្ឋវៀតណាមជាច្រើនកុះករតម្រង់ជួរតាំងពីមុនថ្ងៃរះនៅក្រោមដំណក់ភ្លៀងត្រជាក់ ដើម្បីទិញមាសនៅព្រលឹមថ្ងៃទី២៦ ខែកុម្ភៈ ឆ្នាំ២០២៦ ដែលជាថ្ងៃទេវតាទ្រព្យ «God of Wealth»…
ប្រទេសវៀតណាម ៖ ពលរដ្ឋវៀតណាមជាច្រើនកុះករតម្រង់ជួរតាំងពីមុនថ្ងៃរះនៅក្រោមដំណក់ភ្លៀងត្រជាក់ ដើម្បីទិញមាសនៅព្រលឹមថ្ងៃទី២៦ ខែកុម្ភៈ ឆ្នាំ២០២៦ ដែលជាថ្ងៃទេវតាទ្រព្យ «God of Wealth» ដោយទំនៀមទម្លាប់វៀតណាម ថ្ងៃទេវតាទ្រព្យ ដែលប្រារព្ធឡើងនៅថ្ងៃទី១០ ខែទី១ នៃប្រតិទិនចន្ទគតិ គេជឿថា នាំមកនូវលាភសំណាង និងវិបុលភាពដល់អ្នកទិញមាស។ នេះបើតាមប្រភពពីសារព័ត៌មានវៀតណាម Znews និង Tuoi Tre បានចេញផ្សាយ។
បើទោះបីជាមានភ្លៀងធ្លាក់ឥតឈប់ និងអាកាសធាតុត្រជាក់នៅថ្ងៃទី២៥ ខែកុម្ភៈ ដែលជាថ្ងៃទី៩ ខែទី១ នៃប្រតិទិនចន្ទគតិយ៉ាងណាក៏ដោយ ក៏ពលរដ្ឋវៀតណាមជាច្រើនបានចាប់ផ្តើមតម្រង់ជួរតាំងពីម៉ោងប្រហែល ៤ ទៀបភ្លឺ នៅតាមផ្លូវ ត្រាន់ ញ៉ាន់ តុង (Tran Nhan Tong) សង្កាត់ ហៃ បា ទ្រុង (Hai Ba Trung) ជាផ្លូវមានហាងលក់មាសធំៗជាច្រើននៅទីក្រុងហាណូយ (Hanoi) ដើម្បីតម្រង់ជួរចាំទិញមាសចំថ្ងៃទេវតាទ្រព្យ នៅព្រឹកព្រលឹមថ្ងៃទី២៦ ខែកុម្ភៈ។
ដោយសារតែអតិថិជនទិញមាសមានចំនួនច្រើនជាងឆ្នាំមុន និងមកដល់មុនម៉ោង ហាងជាច្រើនបានអនុវត្តការតម្រង់ជួរ និងចាប់លេខរៀង ដើម្បីធានាថា ដំណើរការទិញមាសដើម្បីទទួលបានលាភសំណាងរបស់អតិថិជន ប្រព្រឹត្តទៅដោយរលូន។ យុវជនជាច្រើនក៏ត្រូវបានឃើញមកដល់មុនផងដែរ ដោយចាប់លេខ និងតម្រង់ជួរជាមួយក្តីសង្ឃឹមថានឹងក្លាយជាមនុស្សដំបូងគេទិញបានដុំមាសចំថ្ងៃទេវតាទ្រព្យ។
បុគ្គលិកនៅតាមហាងមាសមមាញឹកយ៉ាងខ្លាំងរៀបចំមាសមុនពេលបើកហាង ហើយនៅម៉ោង ៦ ព្រឹកចូលមកដល់ មនុស្សយ៉ាងច្រើនបានសម្រុកចូលហាងលក់មាសតែម្តង។ លុះម៉ោងប្រហែល ៧:០០ ព្រឹក ហាងលក់មាសជាច្រើននៅតាមផ្លូវត្រាន់ ញ៉ាន់ តុង ពោរពេញទៅដោយអតិថិជនដែលកំពុងរង់ចាំទិញមាសយ៉ាងច្រើនកុះករ។
ដោយសារតម្រូវការខ្ពស់សម្រាប់ការទិញ និងលក់មាស នៅថ្ងៃទេវតាទ្រព្យឆ្នាំនេះ ហាងលក់មាសខ្លះ ថែមទាំងបានដាក់ដំណើរការជាលើកដំបូងនូវម៉ាស៊ីនទិញ និងលក់មាសដោយស្វ័យប្រវត្តិ ដើម្បីកាត់បន្ថយពេលវេលារង់ចាំសម្រាប់អតិថិជន។
អ្នកវិភាគមួយចំនួនបានលើកឡើងថា ការកើនឡើងនេះ បានឆ្លុះបញ្ចាំងទាំងតម្រូវការតាមរដូវកាលដែលផ្សារភ្ជាប់ទៅនឹងថ្ងៃទេវតាទ្រព្យ ក៏ដូចជាការប្រែប្រួលនៃតម្លៃមាសសកល ដែលបន្ថែមកំដៅដល់ទីផ្សារមាសរបស់ប្រទេសវៀតណាម។
សូមជម្រាបថា តម្លៃមាសអន្តរជាតិ ថ្ងៃទី២៦ ខែកុម្ភៈ ឆ្នាំ២០២៦ ឈរនៅតម្លៃ ៥ ១៨៧ ដុល្លារក្នុង១អោន ឬស្មើនឹង ៦ ២៤៩ ដុល្លារក្នុង១តម្លឹង គិតត្រឹមម៉ោង ១០ ព្រឹក (ម៉ោងនៅកម្ពុជា)៕
ចែករំលែកព័តមាននេះ