សង្គ្រាមអ៊ុយក្រែន ៖ អាជ្ញាធររុស្ស៊ីរាយការណ៍ថា មនុស្ស៧នាក់បានត្រូវស្លាប់ និង១០នាក់ទៀតរងរបួស ក្នុងការវាយប្រហារដោយដ្រូនរបស់អ៊ុយក្រែន ប្រឆាំងរោងចក្រផលិតជីគីមីDOROGOBOUJ តំបន់ស្មូឡែនស្ក៍ ។ រោងចក្រគីមីនោះ…
សង្គ្រាមអ៊ុយក្រែន ៖ អាជ្ញាធររុស្ស៊ីរាយការណ៍ថា មនុស្ស៧នាក់បានត្រូវស្លាប់ និង១០នាក់ទៀតរងរបួស ក្នុងការវាយប្រហារដោយដ្រូនរបស់អ៊ុយក្រែន ប្រឆាំងរោងចក្រផលិតជីគីមីDOROGOBOUJ តំបន់ស្មូឡែនស្ក៍ ។
រោងចក្រគីមីនោះ ស្ថិតនៅច្រកចូលទីក្រុងមានឈ្មោះដូចគ្នានេះ ចម្ងាយប្រមាណជា២៩០គីឡូម៉ែត្រពីព្រំដែនអ៊ុយក្រែន ។ លោកវ៉ាស៊ីលីអាណូឃីន អភិបាលតំបន់ស្មុឡែនស្ក៍ថ្លែងថា ជនរងគ្រោះនិងអ្នករបួសទាំងអស់ ជានិយោជិតនៃរោងចក្រនោះ។ បណ្ដារូបភាពផ្សាយតាមបណ្ដាញសង្គមបង្ហាញរោងចក្រកំពុងត្រូវភ្លើងឆេះ មុនព្រឹកព្រលឹមថ្ងៃទី២៥ កុម្ភៈ ជាមួយផ្សែងខ្មៅខ្មួលខ្មាញ់ហុយទៅលើអាកាសនាពេលយប់ ។
រោងចក្រDOROGOBOUJ ផលិតជីគីមីសារធាតុអាហ្សូត ព្រមទាំងផលិតផលឧស្សាហកម្មនានាទៀត ។ រោងចក្រនេះ ជាផ្នែកមួយនៃក្រុមហ៊ុនឧស្សាហកម្មACRON។ នោះជាសហគ្រាសឧស្សាហកម្មដ៏ធំបំផុតមួយនៃតំបន់ស្មូឡែនស្ក៍ដែលធានាដល់ការចែកចាយ និងការនាំចេញធំជាងគេប្រចាំតំបន់នោះ ។ បណ្ដាផលិតផលគីមីរបស់រោងចក្រនោះ ពិសេសនីត្រាតអាម៉ូនីញ៉ូម និងសមាសភាពអាហ្សូតដទៃៗទៀត ត្រូវបានប្រើប្រាស់ជាវត្ថុធាតុផលិតគ្រឿងផ្ទុះ ។
ដូច្នេះ អ៊ុយក្រែនចាត់ទុករោងចក្រនេះថា បម្រើសង្ក្រាមដែលជាគោលដៅវាយប្រហារសមស្រប ។ អ៊ុយក្រែនបានប្រើដ្រូនបំពាក់គ្រឿងផ្ទុះយ៉ាងតិច៣០គ្រឿង វាយប្រហាររោងចក្រនេះ ដោយបង្កការខូចខាតធ្ងន់ធ្ងរ ។ អភិបាលតំបន់លើកឡើងថា អាជ្ញាធរគ្រោងជម្លៀសមនុស្សចេញពីភូមិជិតខាង ជាវិធានការបង្ការគ្រោះថ្នាក់ ។
ចាប់តាំងពីមានការវាយលុករបស់រុស្ស៊ីពីឆ្នាំ២០២២មក អ៊ុយក្រែនបានបញ្ជូនដ្រូនច្រើនពាន់គ្រឿងវាយប្រហាររុស្ស៊ី ដោយដ្រូនមួយចំនួនបានហោះចូលដល់យ៉ាងជ្រៅក្នុងដែនដីរុស្ស៊ីចម្ងាយច្រើនរយគីឡូម៉ែត្រ ។ ការវាយបប្រហារទាំងនេះសំដៅជាពិសេស ឧស្សាហកម្មប្រេង និងឧស្ម័នរុស្ស៊ី ព្រមទាំងទីតាំងឧស្សាហកម្មដទៃៗទៀត បណ្ដាលឲ្យមានការខូចខាតច្រើនបពាន់លានដុល្លារ ។
ក្រុងគៀវអះអាងថា ការវាយប្រហារទាំងនេះ គឹជាការតបតវិញដ៏សមស្របចំពោះការវាយប្រហាររបស់រុស្ស៊ីប្រឆាំងជនស៊ីវិលខ្លួន បណ្ដាលឲ្យស្លាប់ច្រើនរយនាក់និងធ្វើឲ្យស្ទះដល់បណ្ដាហេដ្ឋារចនាសម្ព័ន្ធថាមពលអ៊ុយក្រែន ៕
ចែករំលែកព័តមាននេះ