ខេត្តពោធិ៍សាត់ ៖ កាលពីថ្ងៃទី២៥ ខែកុម្ភៈ ឆ្នាំ២០២៦កន្លងទៅ លោក ពៅ ពិសិដ្ឋ អភិបាលរងខេត្ត បានអញ្ជើញជាអធិបតីភាពក្នុងទិវាជាតិបង្ការនិងពន្លត់អគ្គិភ័យលើកទី៧…
ខេត្តពោធិ៍សាត់ ៖ កាលពីថ្ងៃទី២៥ ខែកុម្ភៈ ឆ្នាំ២០២៦កន្លងទៅ លោក ពៅ ពិសិដ្ឋ អភិបាលរងខេត្ត បានអញ្ជើញជាអធិបតីភាពក្នុងទិវាជាតិបង្ការនិងពន្លត់អគ្គិភ័យលើកទី៧ ដែលបានប្រារព្ធធ្វើនៅបរិវេណពហុកីឡដ្ឋានខេត្ត ។
លោកឧត្តមសេនីយ៍ត្រី ស្វាយ វាសនា ស្នងការរងនគរបាលខេត្ត ទទួលផែនការងារគ្រប់គ្រងអាវុធជាតិផ្ទុះ និងអគ្គិភ័យ បានថ្លែងថា ការរៀបចំទិវាជាតិបង្ការនិងពន្លត់អគ្គិភ័យនេះ គឺជាព្រឹត្តិការណ៍មួយដ៏មានសារៈសំខាន់ក្រៃលែង ដែលបានបញ្ជាក់ជូនប្រជាពលរដ្ឋយើងទូទាំងខេត្ត អំពីការខិតខំយកចិត្តទុកដាក់របស់រាជរដ្ឋាភិបាល ក្រសួងមហាផ្ទៃ គណៈបញ្ជាការឯកភាពរដ្ឋបាលខេត្ត បណ្ដាស្ថាប័នពាក់ព័ន្ធ កងកម្លាំងនគរបាលបង្ការ ពន្លត់អគ្គិភ័យ និងសង្គ្រោះក្នុងការងារបង្ការនូវមហន្តរាយ ការពារនិងសង្គ្រោះអាយុជីវិត ទ្រព្យសម្បត្តិដែលបង្កឡើងដោយអគ្គិភ័យ ក៏ជាផ្នែកមួយនៃការចូលរួមចំណែកកាត់បន្ថយភាពក្រីក្ររបស់ប្រជាពលរដ្ឋផងដែរ ។
ការជំរុញផ្សព្វផ្សាយអប់រំពីច្បាប់ស្ដីពីការបង្ការនិងពន្លត់អគ្គិភ័យ ត្រូវបានយកចិត្តទុកដាក់ផ្សព្វផ្សាយតាមគ្រប់មធ្យោបាយ ជាពិសេសតាមរយៈវេទិកាសាធារណៈ វេទិកាផ្សព្វផ្សាយគោលនយោបាយភូមិ ឃុំ-សង្កាត់មានសុវត្ថិភាព ឲ្យប្រជាពលរដ្ឋបានដឹង និងចូលរួមក្នុងការប្រុងប្រយ័ត្ននិងបង្កាជាមុន ។
ការរៀបចំចាត់តាំងហ្វឹកហាត់ដល់កម្លាំងបង្ការពន្លត់អគ្គិភ័យស្ម័គ្រចិត្ត តាមបណ្ដាស្ថាប័នរដ្ឋ ឯកជន ក្រុមហ៊ុន រោងចក្រ និងគោលដៅងាយរងគ្រោះ ឲ្យមានចំណេះដឹង និងមានលទ្ធភាពម្ចាស់ការពន្លត់អគ្គិភ័យបឋម ដែលអាចទប់ស្កាត់ការឆេះរាលដាលបាន ។
លោកស្នងការរងបានថ្លែងថា យើងមានរថយន្តពន្លត់អគ្គិភ័យរបស់ក្រសួងមហាផ្ទៃចំនួន៨គ្រឿង ត្រូវបានដាក់ពង្រាយលើគោលដៅតាមបណ្ដាស្រុកចំនួន៥ និងក្នុងស្នងការដ្ឋាននគរបាលខេត្ត ។ ថ្មីៗនេះ ក្រោមការយកចិត្តទុកដាក់របស់ឯកឧត្តមអភិបាលខេត្ត បានប្រគល់រថយន្តពន្លត់អគ្គិភ័យចំនួន១គ្រឿងបន្ថែមទៀត ដែលទទួលបានពីប្រទេសកូរ៉េ ជូនអធិការដ្ឋាននគរបាលស្រុកតាលោសែនជ័យ ។
ជំនួសមុខឲ្យឯកឧត្តមអភិបាលខេត្ត លោក ពៅ ពិសិដ្ឋ បានថ្លែងថា ការប្រារព្ធពិធីនេះឡើង គឺសំដៅរំឭកឲ្យប្រជាពលរដ្ឋយើងនៅទូទាំងខេត្ត មានការយល់ដឹងនិងចងចាំបានថា អគ្គិភ័យគឺជាគ្រោះថ្នាក់ដ៏សាហាវមួយ ដែលអាចបំផ្លិចបំផ្លាញអាយុជីវិត និងទ្រព្យសម្បត្តិរបស់ប្រជាពលរដ្ឋគ្រប់ពេល ប្រសិនបើមានការធ្វេសប្រហែស ។ ករណីអគ្គិភ័យនៅតែកើតមានជាបន្តបន្ទាប់ ដែលចាំបាច់ត្រូវតែមានការគិតគូរបន្ថែមទៀត ដើម្បីដោះស្រាយមូលហេតុនៃការបង្កគ្រោះថ្នាក់អគ្គិភ័យកន្លងមក ឲ្យមានប្រសិទ្ធភាព ។
ជាពិសេស ការតចរន្តអគ្គិសនីមិនត្រឹមត្រូវតាមលក្ខណៈបច្ចេកទេស និងការធ្វេសប្រហែសក្នុងការប្រើភ្លើងទៀន ធូប និងការដុតសំរាមផ្សេងៗ ។ លោកសូមអំពាវនាវដល់គ្រប់អ្នកពាក់ព័ន្ធ មន្ទីរអង្គភាព អង្គការសង្គមស៊ីវិល គ្រឹះស្ថានរដ្ឋឯកជន និងប្រជាពលរដ្ឋគ្រប់មជ្ឈដ្ឋាន សូមចូលរួមបង្ការនិងទប់ស្កាត់គ្រោះអគ្គិភ័យ កុំឲ្យកើតមានជាយថាហេតុ ដើម្បីបញ្ចៀសនូវបញ្ហាគ្រោះមហន្តរាយ ដែលបង្កឡើងដោយអគ្គិភ័យនេះ ។
លោកបានជំរុញដល់ស្នងការនគរបាលខេត្ត ត្រូវពង្រីកការបណ្ដុះបណ្ដាលជំនាញបង្ការ ទប់ស្កាត់ ពន្លត់អគ្គិភ័យ និងសង្គ្រោះទៅកាន់អាជ្ញាធរមូលដ្ឋាន ប្រជាការពារ ប្រជាពលរដ្ឋ និងរោងចក្រ សហគ្រាស ដើម្បីឱ្យពួកគាត់បានយល់ដឹង ហើយនៅពេលដែលមូលដ្ឋានរបស់គាត់កើតមានអគ្គិភ័យ ពួកគាត់អាចធ្វើអន្តរាគមន៍ជួយពន្លត់បានទាន់ពេលវេលា ឬកាត់បន្ថយការរីករាលដាលនៃអគ្គិភ័យបន្ថែមទៀត ។
លោកអភិបាលរងខេត្ត ក៏បានអំពាវនាវដល់បងប្អូនប្រជាពលរដ្ឋទាំងអស់ មានការប្រុងប្រយ័ត្ននៅរដូវប្រាំងនេះ សូមបង្ការគ្រោះអគ្គិភ័យនៅក្នុងលំនៅឋានរបស់ខ្លួន រួមគ្នាកាត់បន្ថយឲ្យបានជាអតិបរមានូវគ្រោះអគ្គិភ័យគ្រប់ទីកន្លែង៕
ចែករំលែកព័តមាននេះ