ទីក្រុងរ៉ង់ហ្គូន៖ ថ្មីៗនេះ យោធាមីយ៉ាន់ម៉ាបើកការវាយប្រហារតាមអាកាសទៅលើមូលដ្ឋានរបស់ក្រុមប្រឆាំងនៅរដ្ឋរ៉ាក់ខាញបណ្ដាលឱ្យស្លាប់មនុស្សយ៉ាងតិច១៧នាក់ និងរបួស១៤នាក់។ នេះបើយោងតាមការផ្សាយរបស់សារព័ត៌មានក្នុងស្រុក។ នៅក្នុងចំណោមអ្នកស្លាប់ទាំងនោះក៏មានស្ត្រី និងកុមារមួយចំនួនផងដែរ។ ទីតាំងដែលរងការវាយប្រហារនោះស្ថិតនៅភូមិយឹងហ្គូ (Yoengu) ស្រុកផុនណាគ្យុន…
ទីក្រុងរ៉ង់ហ្គូន៖ ថ្មីៗនេះ យោធាមីយ៉ាន់ម៉ាបើកការវាយប្រហារតាមអាកាសទៅលើមូលដ្ឋានរបស់ក្រុមប្រឆាំងនៅរដ្ឋរ៉ាក់ខាញបណ្ដាលឱ្យស្លាប់មនុស្សយ៉ាងតិច១៧នាក់ និងរបួស១៤នាក់។ នេះបើយោងតាមការផ្សាយរបស់សារព័ត៌មានក្នុងស្រុក។ នៅក្នុងចំណោមអ្នកស្លាប់ទាំងនោះក៏មានស្ត្រី និងកុមារមួយចំនួនផងដែរ។ ទីតាំងដែលរងការវាយប្រហារនោះស្ថិតនៅភូមិយឹងហ្គូ (Yoengu) ស្រុកផុនណាគ្យុន (Ponnagyun)។ នេះបើតាមការផ្សាយរបស់វិទ្យុសំឡេងប្រជាធិបតេយ្យភូមា (DVB)។
ភូមិនេះស្ថិតចម្ងាយ៣៣គីឡូម៉ែត្រភាគឦសានទីក្រុងសិតថ្វេ (Sittwe) ដែលជារដ្ឋធានីរបស់រដ្ឋរ៉ាក់ខាញ។ ទីក្រុងនេះត្រូវកងទ័ពអារ៉ាខាន់ (Arakan Army) វាយដណ្ដើមយកបានពីរបបសឹកមីយ៉ាន់ម៉ាកាលពីខែមីនា ឆ្នាំ២០២៤ និងបន្តកាន់កាប់រហូតដល់សព្វថ្ងៃ។ អារ៉ាខាន់ជាចលនាប្រដាប់អាវុធរបស់ជនជាតិភាគតិចដែលប្រឆាំងនឹងរបបសឹកមីយ៉ាន់ម៉ា។ ពួកគេបានផ្សព្វផ្សាយឈ្មោះជនរងគ្រោះទាំង១៧នាក់ដែលសុទ្ធសឹងជាជនស៊ីវិល។ ក្នុងនោះមានកុមារ៣នាក់។
ចាប់តាំងពីមានរដ្ឋប្រហារយោធាកាលពីដើមឆ្នាំ២០២១ រហូតមកដល់ពេលនេះ មនុស្សរាប់ពាន់នាក់បានស្លាប់ ខណៈដែលមនុស្ស៣,៦លាននាក់ត្រូវផ្លាស់ប្ដូរកន្លែងរស់នៅ (នៅក្នុងប្រទេសមីយ៉ាន់ម៉ា) ដើម្បីគេចចេញពីការប្រយុទ្ធគ្នា។ នេះបើយោងតាមរបាយការណ៍របស់អង្គការសហប្រជាជាតិ។ សាក្សីដែលបានឃើញហេតុការណ៍វាយប្រហារនោះផ្ទាល់ភ្នែកបានរៀបរាប់ថាទិដ្ឋភាពនៅពេលនោះគឺពិតជាសាហាវណាស់។ អគារបួន ឬប្រាំខ្នងត្រូវភ្លើងឆេះ។
អ្នកខ្លះស្រែកយំយ៉ាងកងរំពង ខណៈដែលសាកសពមនុស្សរាយប៉ាយពាសពេញដីដោយសារអានុភាពនៃគ្រាប់បែកទម្លាក់ពីលើអាកាស។ រដ្ឋរ៉ាក់ខាញកាលពីមុនមានឈ្មោះថាអារ៉ាខាន់ (Arakan)។ រដ្ឋនេះជាទីតាំងដែលរងការវាយប្រហារខ្លាំងក្លាជាងគេ។ យោធាមីយ៉ាន់ម៉ាពិបាកវាយប្រហារតាមជើងគោកដោយសារកងទ័ពអារ៉ាខាន់បិទខ្ទប់យ៉ាងជិតឈឹង។ ហេតុនេះយោធាមីយ៉ាន់ម៉ាច្រើនជ្រើសរើសការវាយប្រហារតាមផ្លូវអាកាស៕ ប្រភព៖ អាល់ចាស៊ីរ៉ា (Al Jazeera) និងប្រភពដទៃទៀត
ចែករំលែកព័តមាននេះ