ទីក្រុងម៉ិកស៊ីកូស៊ីធី៖ សហព័ន្ធបាល់ទាត់ពិភពលោកហ្វ៊ីហ្វា (FIFA)យល់ថាគ្មានអ្វីដែលត្រូវព្រួយបារម្ភទេពាក់ព័ន្ធនឹងគម្រោងប្រកួតបាល់ទាត់ពិភពលោកវើលខាប់ (World Cup) នៅប្រទេសម៉ិកស៊ីកូ។ វើលខាប់ឆ្នាំ២០២៦នេះនឹងរៀបចំឡើងនៅក្នុងប្រទេសបីនៃតំបន់អាមេរិកខាងជើងគឺអាមេរិក, កាណាដា និងម៉ិកស៊ីកូ។ ការចេញមកបញ្ជាក់របស់ហ្វ៊ីហ្វាបន្ទាប់ពីមានអំពើហិង្សាដ៏ខ្លាំងក្លានៅផ្នែកខ្លះនៃប្រទេសម៉ិកស៊ីកូ។ ក្នុងនោះ សមត្ថកិច្ចបើកប្រតិបត្តិការបាញ់សម្លាប់មេខ្លោងគ្រឿងញៀនដ៏ល្បីឈ្មោះអែល មេនឆូ (El Mencho)។
ប្រធានហ្វ៊ីហ្វា លោកដ្យានី អាំងហ្វង់ទីណូ (Gianni Infantino) ហ៊ាននិយាយដោយទំនុកចិត្តថាម៉ិកស៊ីកូអាចរៀបចំការប្រកួតវើលខាប់ឆ្នាំ២០២៦ដោយគ្មានបញ្ហា។ ទីក្រុងក្វាដាឡាហារ៉ា (Guadalajara) ដែលត្រៀមរៀបចំការប្រកួតដែរនោះកំពុងកើតមានអំពើហិង្សាយ៉ាងកក្រើកដោយសារក្រុមឈ្មួញគ្រឿងញៀន ឬកាថែល (cartel) វាយប្រហារសងសឹកឱ្យគ្នារបស់ពួកគេ។ នៅតាមផ្លូវហាយវេ និងផ្លូវធំៗ គេឃើញរថយន្តត្រូវបានដុតបំផ្លាញគ្មានសល់។
ប៉ុន្តែប្រធានហ្វ៊ីហ្វាធានាថាអ្វីៗនឹងដំណើរការបានល្អ, ការប្រកួតនឹងក្លាយជាព្រឹត្តិការណ៍ដ៏អស្ចារ្យ។ នៅក្នុងប្រតិបត្តិការកម្ចាត់មេខ្លោងគ្រឿងញៀននោះ មនុស្សយ៉ាងតិច៧៤នាក់ត្រូវពលីជីវិត។ នៅក្នុងចំណោមនោះភាគច្រើនបំផុតជាកងកម្លាំងប្រដាប់អាវុធ។ មានតែម្នាក់ប៉ុណ្ណោះជាជនស៊ីវិល។ នៅពេលបើកប្រតិបត្តិការនោះ ប្រជាជនធម្មតា និងអ្នកទេសចរភ័យស្លន់ស្លោ និងស្វែងរកកន្លែងលាក់ខ្លួនគ្រប់ៗគ្នានៅពេលក្រុមកាថែលដាក់រនាំងបិទផ្លូវនៅក្នុងរដ្ឋចំនួនម្ភៃរបស់ម៉ិកស៊ីកូ។ បន្ទាប់មក ពួកគេដុតបំផ្លាញរថយន្តរបស់ជនស៊ីវិលដែលចតនៅស្ងៀម។
នៅសល់មិនដល់៤ខែទៀតទេ ការប្រកួតវើលខាប់នឹងចាប់ផ្ដើម។ ជនជាតិម៉ិកស៊ីកូម្នាក់ឈ្មោះហ្សាវីយេ ប៉េរ៉េ (Javier Perez) ប្រាប់ថានៅថ្ងៃផ្ទុះអាវុធនោះ កន្លែងកើតហេតុប្រៀបបាននឹងសមរភូមិយោធាយ៉ាងពិតប្រាកដ។ ប៉ុន្តែប្រធានហ្វ៊ីហ្វាយល់ថាប្រិយមិត្តដែលគាំទ្រវិស័យបាល់ទាត់អាចទៅទស្សនាដល់ទីកន្លែងបានព្រោះគ្មានហានិភ័យចំពោះពួកគេទេ។ ប្រធានាធិបតីម៉ិកស៊ីកូក៏ថ្លែងស្រដៀងគ្នានេះដែរ។ លោកស្រីថាសភាពការណ៍ចាប់ផ្ដើមវិលត្រឡប់ទៅរកភាពប្រក្រតីវិញហើយ៕ ប្រភព៖ អាល់ចាស៊ីរ៉ា (Al Jazeera) និងប្រភពដទៃទៀត
ចែករំលែកព័តមាននេះ