ទីក្រុងឆៀងម៉ៃ៖ ថ្មីៗនេះ មានបាតុភូតចម្លែកកើតឡើងទៅលើសត្វខ្លានៅសួនសត្វ២កន្លែងនៃខេត្តឆៀងម៉ៃ ប្រទេសថៃ បណ្ដាលឱ្យស្លាប់ខ្លាឡើងពាយ។ ឥឡូវនេះ អាជ្ញាធរផ្នែកពេទ្យសត្វកំពុងចុះទៅកន្លែងកើតហេតុដើម្បីចង់ដឹងថាតើមូលហេតុអ្វីដែលបណ្ដាលឱ្យខ្លា៧២ក្បាលស្លាប់ត្រឹមតែរយៈពេលជាងមួយសប្ដាហ៍ប៉ុណ្ណោះចាប់ពីថ្ងៃទី៨-១៩ ខែកុម្ភៈ។
ការិយាល័យពេទ្យសត្វខេត្តឆៀងម៉ៃបានយកសំណាករបស់សាកសពខ្លាទាំងនោះទៅធ្វើពិសោធ។ លទ្ធផលបង្ហាញថាមានមេរោគដែលរស់នៅក្នុងសត្វចតុប្បាទពពួកសុនខ និងសំពោច។ ប៉ុន្តែអាជ្ញាធរមិនទាន់បញ្ជាក់ថាតើមេរោគនោះឆ្លងចូលទៅក្នុងខ្លួនរបស់សត្វខ្លាតាមវិធីណាទេ។ សម្រាប់ពេលនេះ មេរោគនោះលែងរាតត្បាតតទៅទៀតហើយ ហើយសត្វខ្លាក៏លែងស្លាប់ទៀតដែរ។
សាកសពសត្វខ្លាទាំងនោះត្រូវគេយកទៅកប់យ៉ាងត្រឹមត្រូវនៅកន្លែងដ៏សមគួរដើម្បីទប់ស្កាត់មិនឱ្យមេរោគរាតត្បាត និងមិនឱ្យមានការជួញដូរសាកសពខ្លាទាំងខុសច្បាប់។ មុនពេលមានឧបទ្ទវហេតុនេះ ខ្លានៅឆៀងម៉ៃមានចំនួនសរុបជាង២៤០ក្បាលរស់នៅក្នុងតំបន់អភិរក្សសត្វ២កន្លែង។ មេរោគដែលឆ្លងទៅសត្វខ្លានេះច្រើនវាយប្រហារទៅលើប្រព័ន្ធដង្ហើម, ប្រព័ន្ធរំលាយអាហារ និងប្រព័ន្ធប្រសាត។ មេរោគនេះច្រើនរស់នៅក្នុងខ្លួនសត្វសុនខ។ ប៉ុន្តែវាក៏អាចឆ្លងទៅសត្វខ្លាផងដែរ។
ក្រៅពីមេរោគរស់នៅក្នុងសត្វសុនខ ការិយាល័យពេទ្យសត្វនៃខេត្តឆៀងម៉ៃអះអាងកាលពីសប្ដាហ៍មុនថាខ្លួនរកឃើញនៅក្នុងសាកសពសត្វខ្លាទាំងនោះនូវបាក់តេរីមួយប្រភេទដែលវាយលុកប្រព័ន្ធផ្លូវដង្ហើម។ ទម្រាំតែដឹងរឿងនេះគឺអ្វីៗបានហួសពេលអស់ទៅហើយ។ នេះបើយោងតាមប្រធាននាយកដ្ឋានពេទ្យសត្វជាតិថ្លែងប្រាប់អ្នកសារព័ត៌មាន។ លោកកត់សម្គាល់ថាវាមិនមែនជារឿងងាយស្រួលទេក្នុងការកំណត់រោគសញ្ញានៅក្នុងខ្លួនសត្វខ្លា។ ពោលគឺមិនមែនដូចសត្វសុនខ ឬសត្វឆ្មានោះឡើយ។
ចំពោះពាក្យចចាមអារ៉ាមដែលថាសត្វខ្លាទាំងនោះស្លាប់ដោយសារជំងឺផ្ដាសាយបក្សីនោះមិនពិតទេ។ នេះបើយោងតាមការអះអាងរបស់អាជ្ញាធរ។ ការថ្លែងដូច្នេះដើម្បីឆ្លើយតបទៅមតិខ្លះដែលលើកឡើងថាមុនពេលស្លាប់ សត្វខ្លាទាំងនោះត្រូវគេផ្ដល់សាច់មាន់ឱ្យពួកវាស៊ី។ ហេតុនេះ អ្នកខ្លះសង្ស័យថាប្រហែលជាមានមេរោគផ្ដាសាយបក្សីនៅក្នុងសាច់មាន់។ លុះពេលសត្វខ្លាស៊ីសាច់មាន់ទាំងនោះក៏ឆ្លងមេរោគផ្ដាសាយបក្សីចូលទៅក្នុងខ្លួន៕ ប្រភព៖ ប៊ីប៊ីស៊ី និងប្រភពដទៃទៀត
ចែករំលែកព័តមាននេះ