រាជធានីភ្នំពេញ ៖ បុរសម្នាក់ខណៈជិះម៉ូតូសុខៗស្រាប់តែមានអាការៈមិនស្រួលខ្លួន គាត់ក៏ឈប់ម៉ូតូនៅមុនស្តង់ទិញ លក់អេតចាយមួយកន្លែង រួចតោងឱនទ្រោបលើរ៉ឺម៉កអេតចាយគេ និងរកកលដួលសន្លប់ទៅហើយ ។ ពេលឃើញបែបនេះប្រជាពលរដ្ឋបាននាំគ្នាជួយសង្គ្រោះបឋម រហូតបានធូរស្បើយឡើងវិញ…
រាជធានីភ្នំពេញ ៖ បុរសម្នាក់ខណៈជិះម៉ូតូសុខៗស្រាប់តែមានអាការៈមិនស្រួលខ្លួន គាត់ក៏ឈប់ម៉ូតូនៅមុនស្តង់ទិញ លក់អេតចាយមួយកន្លែង រួចតោងឱនទ្រោបលើរ៉ឺម៉កអេតចាយគេ និងរកកលដួលសន្លប់ទៅហើយ ។ ពេលឃើញបែបនេះប្រជាពលរដ្ឋបាននាំគ្នាជួយសង្គ្រោះបឋម រហូតបានធូរស្បើយឡើងវិញ ប៉ុន្តែគាត់បានវង្វេងខ្លាំងណាស់រកផ្លូវទៅផ្ទះមិនឃើញឡើយ សូម្បីតែឈ្មោះខ្លួនឯងក៏មិនចាំដែរ ។
ហេតុការណ៍នេះបានកើតឡើងកាលពីវេលាម៉ោង១១និង៣០នាទីព្រឹកថ្ងៃទី២៥ ខែកុម្ភៈ ឆ្នាំ២០២៦ នៅតាមផ្លូវបេតុងបុរីសែនមនោរម្យ ត្រង់ចំណុចមុខស្តង់ទិញ លក់អេតចាយស្ថិតនៅក្នុងភូមិកន្ទោកជើង សង្កាត់កន្ទោក ខណ្ឌកំបូល រាជធានីភ្នំពេញ ។
ប្រជាពលរដ្ឋបាននិយាយថា បុរសខាងលើមានវ័យប្រមាណជាង៦០ឆ្នាំ និងមិនត្រូវបានស្គាល់អត្តសញ្ញាណនោះទេ សូម្បីតែគាត់ខ្លួនឯងមិនទាំងចាំឈ្មោះខ្លួនឯងផង ហើយនៅមុនពេលកើតហេតុគាត់បានជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៍ខ្មៅ ពាក់ស្លាកលេខភ្នំពេញ2BD-7605 ធ្វើដំណើរក្នុងទិសដៅពីលិចទៅកើត ។ លុះពេលទៅដល់ត្រង់ចំណុចកើតហេតុ ស្រាប់តែមានអាការៈមិនស្រួលខ្លួន គាត់ក៏បានឈប់ម៉ូតូនៅមុខទីតាំងស្តង់ទិញ លក់អេតចាយមួយកន្លែង រួចតោងទ្រោបលើរ៉ឺម៉កអេតចាយក្នុងស្ថានភាពទ្រេឌទ្រោតខ្លាំងរកកលដួលសន្លប់ទៅហើយ ។
ប្រជាពលរដ្ឋបាននិយាយបន្តទៀតថា ពេលបានបែបនេះពួកគាត់ក៏នាំគ្នាជួយសង្គ្រោះបឋមដល់បុរសនោះ ដោយអ្នកខ្លះជួយធ្វើសសៃ និងកោសខ្យល់ឲ្យ ហើយអ្នកខ្លះទៀតយកផ្លែក្រូចឆ្មារលាយជាមួយទឹកក្ដៅនិងទឹកឃ្មុំ ឲ្យគាត់ផឹក ទើបមួយសន្ទុះក្រោយមកបុរសនោះបានធូរស្បើយឡើងវិញ ។ ពេលនោះពួកគាត់បានសួរនាំទៅកាន់បុរសនោះថា តើគាត់ទៅណាមកណា ? មានផ្ទះសម្បែងនៅឯណា? ប៉ុន្តែបុរសនោះវង្វេងរកផ្លូវទៅផ្ទះវិញមិនឃើញសោះ ហើយពុំដឹងថាខ្លួនគាត់ទៅណាមកណាឡើយ សូម្បីតែឈ្មោះខ្លួនឯងក៏មិនចាំផង ។
ប្រជាពលរដ្ឋបាននិយាយបន្ថែមទៀតបន្ទាប់មកប្រជាការពារភូមិខាងលើបានយករ៉ឺមកម៉ូតូដឹកបុរសនោះនិងម៉ូតូរបស់គាត់យកទៅកាន់សាលាសង្កាត់និងប៉ុស្តិ៍នគរបាលរដ្ឋបាលកន្ទោកដើម្បីឲ្យអាជ្ញាធរនិងនគរបាលជួយធ្វើការស្រាវជ្រាវរកក្រុមគ្រួសារសាច់ញាតិរបស់គាត់ទៅទទួលគាត់ត្រលប់ទៅផ្ទះវិញ ។ ប៉ុន្តែរហូតមកដល់វេលាម៉ោងប្រមាណជិត៣រសៀលថ្ងៃដដែលនោះ នៅពុំទាន់រកក្រុមគ្រួសារគាត់ឃើញនៅឡើយទេ ដូច្នេះបើបងប្អូនណាបាត់ឪពុក បងប្អូន អ៊ុំ ពូ ឬជីតា ដូចដែលមានភិនភាគខាងលើសូមទៅទទួលយកគាត់នៅឯសាលាសង្កាត់និងប៉ុស្តិ៍នគរបាលរដ្ឋបាលកន្ទោកត្រលប់ទៅផ្ទះវិញផង ៕
ចែករំលែកព័តមាននេះ