ប្រទេសសិង្ហបុរី ៖ អាជ្ញាធរអន្តោប្រវេសន៍ និងច្រកត្រួតពិនិត្យប្រទេសសិង្ហបុរី (ICA) បានថ្លែង កាលពីថ្ងៃទី២៣ ខែកុម្ភៈ ឆ្នាំ២០២៦ ថា…
ប្រទេសសិង្ហបុរី ៖ អាជ្ញាធរអន្តោប្រវេសន៍ និងច្រកត្រួតពិនិត្យប្រទេសសិង្ហបុរី (ICA) បានថ្លែង កាលពីថ្ងៃទី២៣ ខែកុម្ភៈ ឆ្នាំ២០២៦ ថា ភ្ញៀវទេសចរបរទេសចំនួន៤៥ ៧០០នាក់ ត្រូវបានបដិសេធមិនឱ្យចូលទឹកដីប្រទេសសិង្ហបុរីក្នុងឆ្នាំ ២០២៥ ដែលជាការកើនឡើងគួរឱ្យកត់សម្គាល់ ៣៨,៣% ធៀបនឹងឆ្នាំ ២០២៤ បន្ទាប់ពីវិធានការសន្តិសុខព្រំដែនត្រូវបានរឹតបន្តឹងកាន់តែខ្លាំងឡើង។ នេះបើតាមប្រភពពីសារព័ត៌មាន Channel News Asia (CNA) បានចេញផ្សាយ។
អាជ្ញាធរបានអះអាងថា បណ្តាភ្ញៀវបរទេសត្រូវបានបដិសេធមិនឱ្យចូលប្រទេសសិង្ហបុរី ដោយសារតែបង្កហានិភ័យអន្តោប្រវេសន៍ ដូចជា លទ្ធភាពនៃការស្នាក់នៅហួសកាលកំណត់ ឬធ្វើការខុសច្បាប់ និងការព្រួយបារម្ភអំពីសន្តិសុខ រួមទាំងសកម្មភាពឧក្រិដ្ឋកម្មដែលអាចកើតមានផងដែរ។
នៅឆ្នាំ ២០២៥ ICA បានពង្រឹងសន្តិសុខព្រំដែនតាមរយៈការបង្កើនការកំណត់គោលដៅដោយមជ្ឈមណ្ឌលកំណត់គោលដៅរួមបញ្ចូលគ្នា (ITC) របស់ខ្លួន រួមទាំងការប្រើប្រាស់ព័ត៌មានជាមុន និងការវិភាគទិន្នន័យ ដើម្បីកំណត់អត្តសញ្ញាណអ្នកដំណើរ យានយន្ត និងទំនិញដែលមានហានិភ័យខ្ពស់ សម្រាប់ការត្រួតពិនិត្យកាន់តែប្រសើរឡើងនៅពេលមកដល់ច្រកត្រួតពិនិត្យ។
ស្របពេលការអនុញ្ញាតឱ្យឆ្លងកាត់ដោយមិនបាច់មានលិខិតឆ្លងដែន (Passport-free clearance) នៅតាមចក្រត្រួតពិនិត្យសំខាន់ៗ ក៏បានធ្វើឱ្យបណ្តាមន្ត្រីអន្តោប្រវេសន៍កាត់បន្ថយការពឹងផ្អែកលើដំណើរការរាប់ដោយដៃផងដែរ ដែលអនុញ្ញាតឱ្យពួកគេផ្តោតទៅកាន់ភារកិច្ចផ្សេងទៀត ដូចជាការស្រង់ទិន្នន័យអ្នកធ្វើដំណើរ និងបទសម្ភាសន៍ស៊ើបអង្កេត។
ជាលទ្ធផលនៃការអនុវត្តនេះ ភ្ញៀវទេសចរបរទេសកាន់តែច្រើនត្រូវបានឆ្លងកាត់ការត្រួតពិនិត្យបន្ថែមនៅឆ្នាំ ២០២៥។
សូមជម្រាបថា ប្រទេសសិង្ហបុរី ដែលត្រូវបានអន្តរជាតិស្គាល់យ៉ាងទូលំទូលាយសម្រាប់កម្រិតឧក្រិដ្ឋកម្មទាប និងស្តង់ដារសុវត្ថិភាពសាធារណៈដ៏រឹងមាំ ហើយនៅតែជាគោលដៅទេសចរណ៍ដ៏ពេញនិយមសម្រាប់អ្នកធ្វើដំណើរអន្តរជាតិ៕
ចែករំលែកព័តមាននេះ