អ៊ីរ៉ង់-អាមេរិក ៖ កងឆ្មាំបដិវត្តន៍អ៊ីរ៉ង់ចាប់ផ្ដើមធ្វើសមយុទ្ធជើងទឹកនៅឈូងសមុទ្រពែរ្ស៍ដោយផ្ដោតលើតំបន់ឆ្នេរភាគខាងត្បូងប្រទេស ព្រមទាំងបណ្ដាកោះនៅតាមតំបន់ឆ្នេរទាំងនេះ ។
ច្បាស់ណាស់ កងទ័ពអ៊ីរ៉ង់ផ្ដោតខ្លាំងជុំវិញច្រកសមុទ្រORMUZដែលបណ្ដាអ្នកទទួលខុសត្រូវនយោបាយរបស់ប្រទេសនេះ គំរាមបិទខ្តប់ជាច្រើនលើក ។ គឺតាមច្រកសមុទ្រនេះដែលមានការដឹកប្រេងឆ្លងកាត់ដល់២០%នៃផលិតកម្មប្រេងពិភពលោក ។ ក្នុងសមយុទ្ធនោះ មានការបាញ់គ្រាប់មីស៊ីល បាញ់កាំភ្លើងធំ និងបង្ហោះដ្រូនវាយប្រហារ។ សមយុទ្ធចូលរួមដោយកងកម្លាំងពិសេស និងរថពាសដែក ។ សារព័ត៌មានអ៊ីរ៉ង់មិនបានបញ្ជាក់ពីរយៈពេលនៃសមយុទ្ធនោះឡើយ ។
មេបញ្ជាការកងទ័ពជើងគោករបស់កងឆ្មាំបដិវត្តន៍ឧត្ដមសេនីយ ម៉ូហាម៉ាដការីមី បញ្ជាក់ថា សមយុទ្ធនោះ ធ្វើឡើងដោយសារតែមានការគំរាមកំហែងជាប់ជាប្រចាំ ។ ចាប់តាំងពីច្រើនសប្ដាហ៍មកហើយ ប្រធានាធិបតីអាមេរិក លោកដូណាល់ត្រាំ គំរាមប្រើកម្លាំងយោធាប្រឆាំងអ៊ីរ៉ង់ បើមិនសម្រេចបានកិច្ចព្រមព្រឿងមួយស្ដីពីកម្មវិធីនុយក្លេអ៊ែរអ៊ីរ៉ង់ទេនោះ ។ អាមេរិកក៏បានដាកពង្រាយកងទ័ពដ៏ច្រើនដែលរួមមាននាវាផ្ទុកយន្តហោះដល់២គ្រឿងនៅក្បែរអ៊ីរ៉ង់ ។
ការចរចាវគ្គថ្មីរវាងអាមេរិក និងអ៊ីរ៉ង់ នឹងធ្វើនាថ្ងៃទី២៦ កុម្ភៈ នៅក្រុងហ្ស៊ឺណែវ ។ រដ្ឋមន្ត្រីការបរទេសអ៊ីរ៉ង់លើកឡើង កាលពីថ្ងៃទី២២ កុម្ភៈ ថា លោកមានបំណងជួបជាមួយបេសកជនពិសេសអាមេរិក លោកSTEVE WITKOFF នាឱកាសនោះ។ ប្រមុខការទូតអរ៉ង់សម្ដែងក្ដីសង្ឃឹមថា ការចរចាថ្មីនឹងឈានទៅសម្រេចបានដំណោះស្រាយការទូតឈ្នះ-ឈ្នះៗមួយ ។ អ៊ីរ៉ង់លើកឡើងពីសិទ្ធិការពារខ្លួនក្នុងករណីមានការវាយប្រហាររបស់អាមេរិក ។
នៅអ៊ីរ៉ង់បាតុកម្មថ្មីប្រឆាំងរដ្ឋអំណាចនៅក្រុងតេហេរ៉ង់ កើតមាន៤ថ្ងៃជាប់គ្នាមកហើយនៅតាមសាកលវិទ្យាល័យប្រមាណជា១០។ ក្នុងបាតុកម្មនោះ ពួកនិស្សិតបាននាំគ្នាស្រែកពាក្យទាំងឡាយប្រឆាំងរដ្ឋាភិបាល។ បាតុកម្មថ្មីបណ្ដាលឲ្យមានការប៉ះទង្កិចគ្នារវាងពួកអ្នកគាំទ្ររដ្ឋអំណាចនិងពួកប្រឆាំង ៕
ចែករំលែកព័តមាននេះ