រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី២៤ ខែកុម្ភៈ ឆ្នាំ២០២៦ បានប្រកាសសាលក្រមផ្តន្ទាទោសឈ្មួញគ្រឿងញៀនជាជនជាតិអង់គ្លេសចំនួន២នាក់ ដាក់ពន្ធនាគារ ក្នុងនោះម្នាក់១០ឆ្នាំ និងម្នាក់ទៀត១៤ឆ្នាំ…
រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី២៤ ខែកុម្ភៈ ឆ្នាំ២០២៦ បានប្រកាសសាលក្រមផ្តន្ទាទោសឈ្មួញគ្រឿងញៀនជាជនជាតិអង់គ្លេសចំនួន២នាក់ ដាក់ពន្ធនាគារ ក្នុងនោះម្នាក់១០ឆ្នាំ និងម្នាក់ទៀត១៤ឆ្នាំ និងពិន័យជាទឹកប្រាក់សរុប២៤លានរៀល ។
ជនជាប់ចោទទាំង២នាក់នេះ ម្នាក់ឈ្មោះ HOGG JORDAN JAMES ភេទប្រុស អាយុ២១ឆ្នាំ សាលក្រមផ្តន្ទាទោសដាក់ពន្ធនាគារកំណត់១០ឆ្នាំ និងពិន័យជាប្រាក់ចំនួន១០ លានរៀល ។ ចំណែកជនជាប់ចោទម្នាក់ទៀតឈ្មោះ CRELLIN CIARAN ASHLEY STEPHEN ភេទប្រុស អាយុ២៩ឆ្នាំ សាលក្រមបានផ្តន្ទាទោសដាក់ពន្ធនាគារកំណត់១៤ឆ្នាំ និងពិន័យជាប្រាក់ចំនួន១៤លានរៀល ពីបទដឹកជញ្ជូនដោយខុសច្បាប់នូវសារធាតុញៀន ប្រព្រឹត្តនៅរាជធានីភ្នំពេញ កាលពីពាក់កណ្តាលខែមិថុនា ឆ្នាំ២០២៥ ។
សាលក្រមបានទុកសិទ្ធិឲ្យប្តឹងឧទ្ធរណ៍តាមកំណត់ច្បាប់ បើសិនមិនសុខចិត្តចំពោះការកាត់ក្តីនេះ ។ ជនជាប់ចោទនៅពេលអនុវត្តទោសក្នុងពន្ធនាគារគ្រប់់តាមសាលក្រមកំណត់ អាជ្ញាធរមានសមត្ថកិច្ច នឹងបន្តនីតិវិធីបណ្តេញចេញពីកម្ពុជា ។
សូមជម្រាបថា សំណុំរឿងខាងលើនេះត្រូវបានសាលាដំបូងរាជធានីភ្នំពេញ លើកយកមកបើកសវនាការជំនុំជម្រះកាលពីថ្ងៃទី២៧ ខែមករា ឆ្នាំ២០២៦ ដែលមានលោក ទិត្យ សុទ្ធីបូរ៉ាឆាត ជាប្រធានក្រុមប្រឹក្សាជំនុំជម្រះ ។ ក្រោយពីបញ្ចប់ការសាកសួរដេញដោល ចៅក្រមជំនុំជម្រះ បានលើកពេលប្រកាសសាលក្រមមកថ្ងៃទី២៤ ខែកុម្ភៈ ឆ្នាំ២០២៦ ។
សូមរំលឹកថា ដោយមានការដឹកនាំបញ្ជាផ្ទាល់ពីឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងគ្រឿងញៀន កម្លាំងមន្ទីរប្រឆាំងគ្រឿងញៀន សហការជាមួយសមត្ថកិច្ចគយនិងរដ្ឋាករប្រចាំអាកាសយានដ្ឋានអន្តរជាតិភ្នំពេញ(ច្រកអ្នកដំណើរចេញ) ក្រោមការសម្របសម្រួលពីលោក ស៊ិត វណ្ណ: ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នៅថ្ងៃទី១៧ ខែមិថុនា ឆ្នាំ២០២៥ បានបង្ក្រាបករណីដឹកជញ្ជូនកញ្ឆាក្រៀមជិត២០គីឡូក្រាម បម្រុងលោតឆត្រឆ្លងដែនទៅក្រៅប្រទេសតាមជើងហោះហើរ នៅអាកាសយានដ្ឋានអន្តរជាតិភ្នំពេញ ។
ក្នុងប្រតិបត្តការនោះ ដំបូងឡើយសមត្ថកិច្ចបានឃាត់ខ្លួនឈ្មួញគ្រឿងញឿនម្នាក់ ជាបុរស
ជនជាតិអង់គ្លេស ដោយចាប់យកកញ្ឆាក្រៀមចំនួន២២ដុំ មានទម្ងន់ ១៩ ៩០២ក្រាម (ជិត
២០គីឡូក្រាម) ។ បន្ទាប់មក នៅថ្ងៃដដែល សមត្ថកិច្ចបានស្រាវជ្រាវឈានទៅដល់ការឃាត់
ខ្លួនជនសង្ស័យម្នាក់ទៀត ហើយបានកសាងសំណុំរឿងបញ្ជូនជនសង្ស័យនិងវត្ថុតាងទៅសាលា
ដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ