រាជធានីភ្នំពេញ ៖ ប្រមុខការទូតកម្ពុជាបានបញ្ជាក់នៅក្នុងសម័យប្រជុំលើកទី៦១ នៃក្រុមប្រឹក្សាសិទ្ធិមនុស្ស អង្គការសហប្រជាជាតិ នៅទីក្រុងហ្សឺណែវ ប្រទេសស្វីសថា កម្ពុជាខិតខំប្រឹងប្រែងរបស់យើងក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែន ជាពិសេស ការបោកប្រាស់តាមប្រព័ន្ធអ៊ីនធើរណេត និងការជួញដូរមនុស្ស ។
ដកស្រង់ចេញពីបទអន្តរាគមន៍របស់ឯកឧត្តមឧបនាយករដ្ឋមន្ត្រី ប្រាក់ សុខុន ក្នុងសម័យប្រជុំលើកទី៦១នៃក្រុមប្រឹក្សាសិទ្ធិមនុស្ស អង្គការសហប្រជាជាតិ នៅទីក្រុងហ្សឺណែវ ប្រទេសស្វីសចេញផ្សាយដោយទីភ្នាក់ងារសារព័ត៌មានកម្ពុជា(AKP)យ៉ាងដូច្នេះថា «យើងកំពុងពង្រឹងកិច្ចខិតខំប្រឹងប្រែងរបស់យើងក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែន ជាពិសេស ការបោកប្រាស់តាមប្រព័ន្ធអ៊ីនធើរណេត និងការជួញដូរមនុស្ស ។ ការឆបោកតាមប្រព័ន្ធអ៊ីនធើរណេតជាបញ្ហាសកលដែលបំផ្លាញសិទ្ធិមនុស្សឆ្លងព្រំដែន»។
ឯកឧត្តមប្រមុខការទូតកម្ពុជាបានលើកឡើងថា ចាប់តាំងពីការបង្កើតក្រុមការងារថ្នាក់ជាតិដឹកនាំដោយសម្តេចនាយករដ្ឋមន្ត្រីរបស់យើង អាជ្ញាធរបានពិនិត្យ និងបំបែកបណ្តាញឧក្រិដ្ឋជនជាច្រើន ដោយបានជួយសង្គ្រោះជនរងគ្រោះរាប់ពាន់នាក់ និងចាប់ខ្លួនជនល្មើសជាច្រើននាក់ ។ នៅចំពោះមុខឯកឧត្តមឧបនាយករដ្ឋមន្ត្រី ប្រាក់ សុខុន បានគូសបញ្ជាក់ថា «យើងក៏កំពុងបញ្ចប់ច្បាប់ពិសេសមួយ ដើម្បីប្រយុទ្ធប្រឆាំងនឹងការបោកប្រាស់តាមអ៊ីនធើរណេត ដែលនេះបញ្ជាក់ពីការប្តេជ្ញាចិត្តយ៉ាងមុតមាំរបស់យើងក្នុងការលុបបំបាត់ឧក្រិដ្ឋកម្មនេះ»។
ឯកឧត្តមបន្ថែមថា ដើម្បីដោះស្រាយបញ្ហាប្រឈមសកលនេះ កម្ពុជាបានខិតខំប្រឹងប្រែងរួមជាមួយភាគីពាក់ព័ន្ធទាំងថ្នាក់ជាតិ ទ្វេភាគី និងពហុភាគី ដោយការប្រយុទ្ធប្រឆាំងនេះទាមទារឱ្យមានកិច្ចសហប្រតិបត្តិការ មិនមែនសកម្មភាពប៉ូលិសបរទេសជាឯកតោភាគី ឬសកម្មភាពយោធា ដែលបម្រើឱ្យតែបិទបាំងសកម្មភាពឈ្លានពាន និងការកាន់កាប់ទឹកដីប៉ុណ្ណោះ» ៕
ចែករំលែកព័តមាននេះ