ទីក្រុងស៊ីដនី៖ នៅទីបញ្ចប់ នាយករដ្ឋមន្ត្រីអូស្ត្រាលី លោកអាល់បានីស បានវិលត្រឡប់ទៅនិវាសនដ្ឋានរបស់លោកនៃទីក្រុងកង់ប៊ែរ៉ាវិញហើយបន្ទាប់ពីលោកជម្លៀសខ្លួនអស់មួយរយៈពេលដោយសារបារម្ភអំពីបញ្ហាសន្តិសុខ និងសុវត្ថិភាព។ កាលពីមុននោះ មានការគំរាមកំហែងផ្នែកសន្តិសុខ ហើយត្រូវកម្លាំងនគរបាលចាត់វិធានការឆ្លើយតបទាន់ពេលវេលា។ ប៉ុន្តែពួកគេមិនបានបញ្ជាក់លម្អិតថាតើការគំរាមកំហែងនោះមានអ្វីខ្លះទេ។
សមត្ថកិច្ចបានចុះឆែកឆេរលំនៅដ្ឋានរបស់លោកអាល់បានីសគ្រប់ទីកន្លែងដោយភាពហ្មត់ចត់ ប៉ុន្តែពួកគេមិនបានរកឃើញមានអ្វីដែលគួរឱ្យសង្ស័យនោះទេ។ អ្នកនាំពាក្យនគរបាលសហព័ន្ធថ្លែងថាសម្រាប់ពេលនេះអស់អ្វីជាក្ដីបារម្ភតទៅទៀតហើយព្រោះគេមិនបានរកឃើញអ្វីដែលជាការគំរាមកំហែងសម្រាប់អ្នករស់នៅក្នុងសហគមន៍ និងសាធារណៈនោះឡើយ។
សូមរំលឹកថានៅក្នុងស្ថានភាពដែលមានការសង្ស័យថាមានការគំរាមកំហែងនោះ អូស្ត្រាលីបានបញ្ជូនកម្លាំងនគរបាលដើម្បីចុះទៅឆែកឆេរគេហដ្ឋានរបស់លោកអាល់បានីស។ ពួកគេបានជម្លៀសលោកចេញពីផ្ទះទៅកាន់ទីកន្លែងមួយទៀតសម្រាប់ស្នាក់នៅជាបណ្ដោះអាសន្នអស់រយៈពេលប៉ុន្មានម៉ោងដើម្បីទុកពេលឱ្យសមត្ថកិច្ចដើរត្រួតពិនិត្យនៅក្នុងផ្ទះ។
សារព័ត៌មានក្នុងស្រុកផ្សាយថាការប្រកាសអាសន្នអំពីបញ្ហាសន្តិសុខនោះគឺពាក់ព័ន្ធនឹងការគំរាមដាក់គ្រាប់បែក។ ប៉ុន្តែនៅទីបញ្ចប់ គេមិនបានរកឃើញអ្វីដែលគួរឱ្យសង្ស័យទេ។ ខុទ្ទកាល័យនាយករដ្ឋមន្ត្រីអូស្ត្រាលីបានថ្លែងប្រាប់ទូរទស្សន៍អេប៊ីស៊ីរបស់អូស្ត្រាលីថាពួកគេជឿទុកចិត្តទៅលើការនិយាយរបស់នគរបាល ហើយពួកគេសូមអរគុណចំពោះការបំពេញការងាររបស់នគរបាល៕ ប្រភព៖ ឆេនណល ញូស៍ អេស៊ា និងប្រភពដទៃទៀត
ចែករំលែកព័តមាននេះ