ខេត្តបាត់ដំបង ៖ ភ្ញៀវកិត្តិយសចំនួន០២ក្រុមដែលក្លាយជាភ្ញៀវបំផ្លាញកិត្តិយស ដោយសារប្រើហិង្សាពេល «រាំឌឺដង» វ៉ៃតប់ផ្អើលពេញរោងការ ហើយត្រូវកម្លាំងសមត្ថកិច្ចតាមឃាត់ខ្លួនទាំង០២ភាគីបានចំនួន០៨នាក់ ពេលនេះ ត្រូវកម្លាំងការិយាល័យជំនាញនៃស្នងការខេត្ត កសាងសំណុំរឿងបញ្ជូនទៅសាលាដំបូងខេត្ត…
ខេត្តបាត់ដំបង ៖ ភ្ញៀវកិត្តិយសចំនួន០២ក្រុមដែលក្លាយជាភ្ញៀវបំផ្លាញកិត្តិយស ដោយសារប្រើហិង្សាពេល «រាំឌឺដង» វ៉ៃតប់ផ្អើលពេញរោងការ ហើយត្រូវកម្លាំងសមត្ថកិច្ចតាមឃាត់ខ្លួនទាំង០២ភាគីបានចំនួន០៨នាក់ ពេលនេះ ត្រូវកម្លាំងការិយាល័យជំនាញនៃស្នងការខេត្ត កសាងសំណុំរឿងបញ្ជូនទៅសាលាដំបូងខេត្ត នៅរសៀលថ្ងៃទី២៤ កុម្ភៈ នេះហើយ ។ នេះបើសមត្ថកិច្ចបានផ្ដល់ព័ត៌មាន ក្រោយបញ្ចប់ការសួរនាំ ។
ភ្ញៀវកិត្តិយសដែលអុកឡុកផ្អើលពេញរោងការទាំង០២ក្រុមនោះ មានមួយក្រុមមានគ្នា០៤នាក់ និងមួយក្រុមទៀតមានគ្នា០៦នាក់ តែចាប់បាន០៤នាក់ រត់រួច០២នាក់ ។ ទាំង០២ក្រុមនេះ ត្រូវបានកម្លាំងការិយាល័យជំនាញសហការតាមមន្ត្រីមូលដ្ឋាន ធ្វើការស្រាវជ្រាវតាមចាប់ខ្លួនបានជាបន្តបន្ទាប់រួមមាន៖ ក្រុមទី១៖ ១-ឈ្មោះ ប៉ែន ឃាង អាយុ៣២ឆ្នាំ ២-ឈ្មោះ ថា សេងថាវ អាយុ១៧ឆ្នាំ ៣-ឈ្មោះ ពឿត សឿន អាយុ៣៩ឆ្នាំ និង៤-ឈ្មោះ ពឿត ពិសិទ្ធ អាយុ៣២ឆ្នាំ ។ ក្រុមទី១នេះ រស់នៅភូមិសម្ដេច ឃុំតាប៉ុន ស្រុកសង្កែ ។
ដោយឡែក ក្រុមទី២៖ ១-ឈ្មោះ ជាតិ វី អាយុ២០ឆ្នាំ ២-ឈ្មោះ ឃឿន ខេមរ៉ាក់ ហៅ ចុម អាយុ១៨ឆ្នាំ ៣-ឈ្មោះ កយ វៃ អាយុ២០ឆ្នាំ ៤-ឈ្មោះ សុខុន ឃុន អាយុ១៩ឆ្នាំ ជនទាំង០៤នាក់នេះ រស់នៅភូមិបឹងទឹម ឃុំតាប៉ុន ស្រុកសង្កែ ។ រីឯជន០២នាក់ទៀត នៅក្នុងក្រុមនេះដែរ ដែលបានរត់គេចខ្លួន ម្នាក់ឈ្មោះ សុខ សៀងហេង អាយុ២១ឆ្នាំ នៅភូមិសា្វយស ឃុំតាប៉ុន និង ឈ្មោះ ចុច រ៉ាប៉ា អាយុ២៥ឆ្នាំ នៅភូមិបឹងទឹម ឃុំតាប៉ុន ។
បើតាមសមត្ថកិច្ច ជនអន្ធពាលទាំង០២ក្រុមនេះ គ្មានភាគីណាមួយជាក្រុមជនរងគ្រោះទេ ។ ពួកគេសុទ្ធជាក្រុមជនបង្កអុកឡុកក្នុងរោងការ ។ រីឯជនរងគ្រោះពិតប្រាកដ គឺម្ចាស់ដើមការ និងម្ចាស់រោង ឬចុងភៅ ។ ព្រោះក្រុមនេះ បានវាយបំផ្លេចបំផ្លាញកែវ តុ កៅអី និងបំផ្លាញកិត្តិយសម្ចាស់ដើមការ ។
ពាក់ព័ន្ធនឹងករណីនេះ បើយោងតាមរបាយការណ៍អធិការស្រុកសង្កែបានឲ្យដឹងថា ជនទាំង០២ក្រុមនេះ បានប្រើប្រាស់ហិង្សាដោយចេតនា (វ៉ៃតប់គ្នា) នៅក្នុងកម្មវិធី «មង្គលការ»មួយកន្លែង កាលពីវេលាម៉ោង១០ និង៣០នាទីយប់ថ្ងៃទី២២ កុម្ភៈ នៅភូមិបឹងទឹម ឃុំតាប៉ុន ស្រុកសង្កែ ។
របាយការណ៍ដដែលបានបញ្ជាក់ថា ខណៈដែលកម្មវិធីកំពុងរាំលេងកម្សាន្តចុងម៉ោង នៃកម្មវិធី ស្រាប់តែមានព្រឹត្តិការណ៍ផ្ទុះឡើងផ្អើលឈុលពេញរោង ដោយសារតែជនទាំង០២ក្រុមនេះ ដេញវាយគ្នាដោយខ្លះទាញកៅអីវាយ អ្នកខ្លះយកកែវគប់គ្នា ។
បើតាមសាក្សីនៅទីនោះនិយាយថា ក្នុងពេលនោះ គេឃើញភ្ញៀវកិត្តិយសផ្អើលរត់ប្រសេកប្រសាចពេញរោងការយ៉ាងច្របូកច្របល់ លាយឡំជាមួយក្រុមជនអន្ធពាល ដែលកំពុងដែលកំពុងដេញវាយគ្នាយ៉ាងព្រហើន ។
សាក្សីដដែលបានបន្ថែមថា ពេលនោះ គេមិនដឹងថា តើមានភ្ញៀវប៉ុន្មានបានចងដៃ ហើយមានភ្ញៀវប៉ុន្មាននាក់ដែលមិនបានចងដៃ ដោយសារភ័យស្លន់ស្លោ រត់ក្នុងភ្លើងសង្គ្រាមយ៉ាងច្របូកច្របល់របស់ពួកជនអន្ធពាល ដែលកំពុងផ្ទុះផ្អើលពេញរោងការ ។ តាមរយៈរបាយការណ៍អធិការស្រុកសង្កែ លោក យុត តុងហូ បាននិយាយថា អំពើហិង្សាដ៏ព្រហើន ដែលបង្កឡើងដោយក្រុមភ្ញៀវកិត្តិយសចំនួន០២ក្រុមខាងលើនេះ បានធ្វើឲ្យបាត់បង់កិត្តិយសម្ចាស់កម្មវិធី «មង្គលការ» យ៉ាងធ្ងន់ធ្ងរ ។ ធ្វើឲ្យខូខាត តុ កៅអី និងកែវ ចាន របស់ចុងភៅមួយចំនួនទៀត ។
លោក យុត តុងហូ បានបញ្ជាក់ថា ក្រោយផ្ទុះអំពើហិង្សា និងក្រោយទទួលបណ្ដឹងជនរងគ្រោះ នៅថ្ងៃទី២៣ កុម្ភៈ កម្លាំងជំនាញអធិការស្រុក ដែលមានកិច្ចសហការពីកម្លាំងការិយាល័យជំនាញនៃស្នងការខេត្តផង បានធ្វើការស្រាវរហូតកំណត់មុខសញ្ញាក្រុមជនប្រព្រឹត្តបាន ទើបឃាត់ខ្លួនជនបង្កទាំង០២ក្រុមបានចំនួន០៨នាក់ តែរត់គេចខ្លួនចំនួន០២នាក់ ។ បើតាមចម្លើយសារភាពរបស់លោកភ្ញៀវកិត្តិយសទាំង០២ក្រុមនេះ បានឆ្លើយប្រហាក់ប្រហែលគ្នា ដែលគេអាចសន្និដ្ឋានយ៉ាងខ្លីថា ក្រុមជនពាលទាំង០២ក្រុមនេះ ផ្ទុះហិង្សាផ្អើលពេញរោងការ ផ្ដើមចេញពីការ «រាំឌឺដងដាក់គ្នា»ទើបស្ទុះទៅវ៉ៃគ្នាប្រាវ ធ្វើឲ្យភ្ញៀវផ្អើលឈុលពេញរោងការតែម្ដង ។
លោក ឈឿង គឹមសុង ស្នងការរងទទួលផែនព្រហ្មទណ្ឌបានបញ្ជាក់ដែរថា ជនទាំង០២ក្រុមនេះ គ្មានភាគីណាមួយជាជនរងគ្រោះទេ ។ ពួកគេសុទ្ធតែជាក្រុមជនទំនើងបង្ករឿងទាំងអស់ ។ ដូច្នេះ មានតែម្ចាស់ដើមការ និងម្ចាស់រោង (ចុងភៅ) ទេ ទើបជាជនរងគ្រោះ។ ប៉ុន្តែយ៉ាងណា លោកបានបន្ថែមថា លោកស្នងការខេត្តបានបញ្ជាឲ្យកម្លាំងការិយាល័យជំនាញ កសាងសំណុំរឿងបញ្ជូនក្រុមអុកឡុករោងការទាំង០៨នាក់នេះ ទៅកាន់សាលាដំបូងខេត្ត នៅរសៀលថ្ងៃទី២៤ កុម្ភៈ នេះ ដើម្បីចាត់ការតាមនីតិវិធីហើយ ៕
ចែករំលែកព័តមាននេះ