ខេត្តកំពង់ស្ពឺ៖ ស្ត្រីវ័យ៦២ឆ្នាំនិងយុវជនម្នាក់ទៀតត្រូវបានកម្លាំងនគរបាលស្រុកឱរ៉ាល់ធ្វើការឃាត់ខ្លួនបានបន្តបន្ទាប់ ខណៈដែលកម្លាំងនគរបាលល្បាតតាមមូលដ្ឋានប្រទះឃើញឃាត់សួរនាំឆែកឆេររកឃើញសារធាតុញៀនខុសច្បាប់។
ការឃាត់ខ្លួនមុខសញ្ញារក្សាទុកនិងជួញដូរគ្រឿងញៀនខុសច្បាប់បានកាលពីវេលាម៉ោង០១និង៣០នាទីរសៀលថ្ងៃទី២២ ខែកុម្ភៈ ឆ្នាំ២០២៦ នៅចំណុចក្នុងភូមិជំនាប់ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។
នគរបាលស្រុកឱរ៉ាល់បាននិយាយឱ្យដឹងថា នៅមុនពេលឃាត់ខ្លួនជនសង្ស័យជាមុខសញ្ញាខាងលើ គឺកម្លាំងនគរបាលជំនាញផ្នែកប្រឆាំងបទល្មើសគ្រឿងញៀននៃអធិការដ្ឋាននគរបាលស្រុកឱរ៉ាល់បានដឹកនាំកម្លាំងប៉ុស្តិ៍នគរបាលរដ្ឋបាលឃុំសង្កែសាទបបានធ្វើការល្បាត និងបង្ក្រាបមុខសញ្ញាសង្ស័យពាក់ព័ន្ធនឹងគ្រឿងញៀនបានម្នាក់មានឈ្មោះ ប៊យ សិទ្ធ ភេទប្រុស អាយុ២៤ឆ្នាំ រស់នៅក្នុងភូមិជំនាប់ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ
ក្រោយឃាត់ខ្លួនដកហូតវត្ថុតាងរួមមានដូចខាងក្រោម៖
ទី១-ទូរស័ព្ទចំនួន០១គ្រឿង
ទី២-ម្សៅក្រាមព៌ណសថ្លាសង្ស័យថាជាគ្រឿងញៀនចំនួន០២កញ្ចប់មធ្យម
ទី៣-ម៉ូតូម៉ាកហុងដាសេ១២៥ស៊េរីឆ្នាំ២០២១ ពណ៌ខ្មៅ គ្មានផ្លាកលេខ ចំនួន០១គ្រឿង។
នគរបាលស្រុកឱរ៉ាល់បានបន្តថាក្រោយឃាត់ខ្លួនជនសង្ស័យសួរនាំ យុវជនជា ជនសង្ស័យខាងលើបានឆ្លើយសារភាពថាគ្រឿងញៀនចំនួន០២កញ្ចប់មធ្យមនេះ រូបខ្លួនទិញពីឈ្មោះកែម អឹម ភេទស្រី អាយុ៦២ឆ្នាំ រស់នៅក្នុងភូមិជំនាប់ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ទិញក្នុងតម្លៃ៥០ម៉ឺនរៀល(ហាសិបម៉ឺនរៀល)ទិញនៅចំណុចភូមិជំនាប់ ឃុំសង្កែសាទប ស្រុកឱរ៉ាល់ កាលពីរសៀលថ្ងៃទី២១ ខែកុម្ភៈ ឆ្នាំ២០២៦កន្លងទៅ។
បន្ទាប់ពីទទួលបានចម្លើយរបស់ជនសង្ស័យរួចមក កម្លាំងនគរបាលជំនាញនៃអធិការដ្ឋាននគរបាលស្រុកឱរ៉ាល់ ក៏បន្តសហការជាមួយកម្លាំងនគរបាលប៉ុស្តិ៍នគរបាលឃុំសង្កែសាទបចុះទៅដល់ទីតាំងជួញដូរគ្រឿងញៀននៅចំណុចភូមិជំនាប់ ឃុំសង្កែសាទប ស្រុកឱរ៉ាល់ បានធ្វើការឃាត់ខ្លួនមុខសញ្ញា០១នាក់ឈ្មោះកែម អឹម ភេទស្រី អាយុ៦២ឆ្នាំ នៅវេលាម៉ោង ១៤និង៣០នាទីថ្ងៃទី២២ ខែកុម្ភៈ ឆ្នាំ២០២៦ រស់នៅភូមិជំនាប់ ឃុំសង្កែសាទប ស្រុកឱរ៉ាល់ ខេត្តកំពង់ស្ពឺនិងដកហូតវត្ថុតាងទូរសព្ទ័ដៃចំនួន០១គ្រឿង។
បច្ចុប្បន្ន ជនសង្ស័យទាំងពីរនាក់ខាងលើត្រូវបានឃាត់ខ្លួនយកមកអធិការដ្ឋាននគរបាលស្រុកឱរ៉ាល់និងកំពុងកសាងសំណុំរឿងបញ្ជូនបន្តទៅការិយាល័យជំនាញនៃស្នងការដ្ឋាននគរបាលខេត្តកំពង់ស្ពឺ ដើម្បីចាត់ការបន្តតាមនីតិវិធី៕
ចែករំលែកព័តមាននេះ