ប្រទេសម៉ិចស៊ិក ៖ រដ្ឋមន្ត្រីសន្តិសុខម៉ិចស៊ិក ប្រកាសនាថ្ងៃទី២៣ កុម្ភៈ ថា សមាជិកកងឆ្មាំជាតិម៉ិចស៊ិក២៥នាក់បានត្រូវស្លាប់ ក្នុងការវាយប្រហារ៦លើកដាច់ដោយឡែកពីគ្នា ក្រោយកងកម្លាំងពិសេសរបស់ប្រទេសធ្វើប្រតិបត្តិការសម្លាប់មេរត់ពន្ធគ្រឿងញៀនដ៏មានឥទ្ធិ្ពលបំផុតម្នាក់ ឈ្មោះថា…
ប្រទេសម៉ិចស៊ិក ៖ រដ្ឋមន្ត្រីសន្តិសុខម៉ិចស៊ិក ប្រកាសនាថ្ងៃទី២៣ កុម្ភៈ ថា សមាជិកកងឆ្មាំជាតិម៉ិចស៊ិក២៥នាក់បានត្រូវស្លាប់ ក្នុងការវាយប្រហារ៦លើកដាច់ដោយឡែកពីគ្នា ក្រោយកងកម្លាំងពិសេសរបស់ប្រទេសធ្វើប្រតិបត្តិការសម្លាប់មេរត់ពន្ធគ្រឿងញៀនដ៏មានឥទ្ធិ្ពលបំផុតម្នាក់ ឈ្មោះថា NEMESIO RUBEN OSEGORA CERVANTES មានរហស្សនាមថាEL MENCHO ។
ការវាយប្រហារសងសឹករបស់ពួកកូនចៅមេរត់ពន្ធគ្រឿងញៀននោះ នាំឲ្យផ្នែកមួយធំរបស់ប្រទេសមានការភ័យខ្លាចចំពោះការកើនឡើងនៃអំពើហិង្សា ។ ប្រមុខក្រុមរត់ពន្ធគ្រឿងញៀនដែលមានឥទ្ធិពលបំផុត និងត្រូវតាមរកចាប់ខ្លួនបំផុតនៅម៉ិចស៊ិកនោះ ត្រូវបានសម្លាប់កាលពីព្រឹកថ្ងៃទី២២ កុម្ភៈ នៅក្រុងតាប៉ាល់ប៉ារដ្ឋ JALISCO ក្នុងឱកាសនៃប្រតិបត្តិការមួយរបស់កងទ័ពម៉ិចស៊ិក ។
ជននោះ ជាស្ថាបនិកក្រុមរត់ពន្ធគ្រឿងញៀនJALISCO NUEVA GENERACION(CJNV) ។ ក្រុមរត់ពន្ធគ្រឿងញៀនដ៏ខ្លាំងនោះគេស្គាល់ថា ជាអ្នកនាំចេញគ្រឿងញៀនFENTANYL មេតំហ្វេតាមីននិងកូកាអ៊ីនទៅកាន់សហរដ្ឋអាមេរិក ហើយគឺមនុស្សរបស់ក្រុមនេះដែលជាអ្នកតែងវាយប្រហារប្រឆាំងបណ្ដាអ្នកទទួលខុសត្រូវរដ្ឋាភិបាល ដែលប្រឆាំងពួករត់ពន្ធគ្រឿងញៀន ។
EL MENCHO ត្រូវបានសម្លាប់ក្នុងពេលមានការបាញ់តតាំងគ្នាមួយនៅរដ្ឋJALISCO ជារដ្ឋកំណើតរបស់គេ ពេលកងទ័ពប៉ុនប៉ងចាប់ខ្លួនគេ ។ ក្រោយសម្លាប់មេធំពួកគេ បណ្ដាកូនចៅបានបញ្ចេញប្រតិកម្ម ដោយបង្កអំពើហិង្សាជាទូទៅ បិទបណ្ដាផ្លូវថ្នល់ និងដុតបំផ្លាញបណ្ដារថយន្ត ។
ថ្ងៃទី២២ កុម្ភៈ ភាពចលាចលបានផ្ទុះឡើងនៅពាសពេញភាគខាងលិចម៉ិចស៊ិក ក្រោយកងទ័ពសម្លាប់EL MENCHO ។ នោះជាការសម្លាប់់មេរត់ពន្ធគ្រឿងញៀនដែលខ្លាំងជាងគេ និងសាហាវបំផុតនៅម៉ិចស៊ិក ។ វាជាការបង្ហាញកម្លាំងដ៏ចម្បងមួយរបស់រដ្ឋាភិបាលម៉ិចស៊ិក ខណៈប្រធានាធិបតីអាមេរិកលោកដូណាល់ត្រាំ បន្តធ្វើការគាបសង្កត់លើប្រទេសជិតខាងនោះឲ្យធ្វើអ្វីច្រើនទៀត ក្នុងការតស៊ូប្រឆាំងការរត់ពន្ធគ្រឿងញៀន ។ អាមេរិកបានផ្ដល់រង្វាន់១៥លានដុល្លារ សម្រាប់រាល់ព័ត៌មានដែលនាំទៅដល់ការចាប់ខ្លួនEL MENCHO ។
រដ្ឋមន្ត្រីការពារប្រទេសម៉ិចស៊ិក លោករីកាដូត្រេវីលឡាថ្លែង នាថ្ងៃទី២៣ កុម្ភៈ ថា បានដេញតាមមនុស្សមួយក្រុមរបស់EL MENCHO រហូតដល់កន្លែងលាក់ខ្លួនរបស់គេនៅក្រុងតាប៉ាល់ប៉ារដ្ឋ JALISCO ។ កងកម្លាំងពិសេសរបស់កងទ័ព និងកងឆ្មាំជាតិបានធ្វើអន្តរាគមន៍នាព្រឹកថ្ងៃទី២២ កុម្ភៈ ហើយក៏រងការបាញ់ស្រោចតបតវិញ ។ ជនប្រដាប់អាវុធ៨នាក់ត្រូវស្លាប់នៅនឹងកន្លែង។ EL MENCHO និងអង្គរក្សគេ២នាក់បានរត់គេចខ្លួនចូលព្រៃ ទាំងរងរបួសធ្ងន់ពេលមានការបាញ់តតាំងគ្នា។ ពេលចាប់ខ្លួនបានពួកគត្រូវបានបញ្ជូនតាមអាកាស ជាមួយទាហានម្នាក់ដែលរងរបួសដែរ។ ប៉ុន្តែEL MENCHO និងអង្គរក្សរបស់គេ២នាក់បានស្លាប់ ពេលបញ្ជូនមកកាន់ក្រុងម៉ិច
ស៊ិកកូ។
នៅកន្លែងមួយផ្សេងទៀតនៃរដ្ឋJALISCO កងទ័ពបានសម្លាប់សមាជិកជាន់ខ្ពស់ម្នាក់ទៀតរបស់ក្រុមរត់ពន្ធគ្រឿងញៀននោះ។ នាថ្ងៃទី២២ កុម្ភៈ ឆ្មាំគុកម្នាក់និងភ្នាក់ងារម្នាក់នៃការិយាល័យអគ្គរដ្ឋអាជ្ញារដ្ឋនោះនិងនារីម្នាក់បានត្រូវសម្លាប់ ។ ចំណែកជនសង្ស័យប្រមាណជា៣០នាក់ ត្រូវសម្លាប់នៅរដ្ឋ JALISCO និង៤នាក់ទៀតសម្លាប់នៅរដ្ឋជិតខាងមីចាវកាន។
អស់ពេលជាង១ទសវត្ស NEMESIO RUBEN OSEGORA CERVANTESបានកសាងក្រុមរត់ពន្ធគ្រឿងញៀនដែលខ្លាំងជាងគេបំផុត។ គេបានកសាងបណ្ដាជម្រកយុទ្ធសាស្ត្រ និងបណ្ដាញព័ត៌មាននានាដែលអាចឲ្យខ្លួនគេគេចផុតពីការតាមប្រមាញ់របស់អាជ្ញាធរជាច្រើនលើក ៕
ចែករំលែកព័តមាននេះ