ខេត្តកំពង់ស្ពឺ៖ ស្ត្រីវ័យចំណាស់ម្នាក់បានស្លាប់ភ្លាមៗនៅកន្លែងកើតហេតុ និងមនុស្សប្រុស-ស្រី ក្មេងចាស់ចំនួន៦នាក់ទៀតរងរបួសធ្ងន់ និងស្រាល ខណៈដែលរថយន្តស៊េរីទំនើប ម៉ាកឡង់គ្រីស័រ ដឹកមនុស្សចំនួន៧នាក់ បានក្រឡាប់លើល្បឿនលឿន ជ្រុលទៅបុករនាំអមផ្លូវ…
ខេត្តកំពង់ស្ពឺ៖ ស្ត្រីវ័យចំណាស់ម្នាក់បានស្លាប់ភ្លាមៗនៅកន្លែងកើតហេតុ និងមនុស្សប្រុស-ស្រី ក្មេងចាស់ចំនួន៦នាក់ទៀតរងរបួសធ្ងន់ និងស្រាល ខណៈដែលរថយន្តស៊េរីទំនើប ម៉ាកឡង់គ្រីស័រ ដឹកមនុស្សចំនួន៧នាក់ បានក្រឡាប់លើល្បឿនលឿន ជ្រុលទៅបុករនាំអមផ្លូវ បណ្តាលឱ្យឆាបឆេះបង្កការភ្ញាក់ផ្អើល។
ហេតុការណ៍ក្រឡាប់រថយន្តជ្រុលបុករនាំអមផ្លូវល្បឿនលឿនបណ្តាលឱ្យមានមនុស្សស្លាប់ និងរងរបួសខាងលើនេះ បានកើតឡើងវេលាម៉ោង១១និង៤៨នាទីព្រឹកថ្ងៃទី២២ ខែកុម្ភៈ ឆ្នាំ២០២៦។
ប្រភពព័ត៌មានពីសមត្ថកិច្ចខេត្តកំពង់ស្ពឺ បានឱ្យដឹងថា រថយន្តជួបឧប្បត្តិហេតុខាងលើនេះ ម៉ាកឡង់គ្រីស្ស័រ ពណ៌ស ពាក់ផ្លាកលេខភ្នំពេញ 2BM-9888 បានក្រឡាប់លើល្បឿនលឿន នៅត្រង់ចន្លោះបង្គោលគីឡូម៉ែត្រលេខ៣៤ទៅលេខ៣៥ ស្ថិតនៅក្នុងភូមិកំណប់ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។
ប្រភពពីសមត្ថកិច្ចខេត្តកំពង់ស្ពឺបានបន្តថា រថយន្តខាងលើនេះ បានបើកបរតាមបណ្តោយផ្លូវល្បឿនលឿនពីទិសពីខាងលិចទៅទិសខាងកើត លុះពេលធ្វើដំណើរមកដល់ចំណុចកើតហេតុខាងលើ បានរ៉េចង្កូតបណ្តាលឱ្យរថយន្តក្រឡាប់ រួចបុករនាំអមផ្លូវបណ្តាលឱ្យឆាបឆេះបង្កឱ្យមានការភ្ញាក់ផ្អើលតែម្តង។
សមត្ថកិច្ចខេត្តកំពង់ស្ពឺបានបញ្ជាក់ឱ្យដឹងថា ជនរងគ្រោះក្នុងហេតុការណ៍នេះសរុបមានចំនួន៧នាក់ក្នុងនោះមាន៖ ទី១- អ្នកបើកបរឈ្មោះ ជា ប៉ូលីន ភេទស្រីអាយុ ៣៨ឆ្នាំ, ទី២-ឈ្មោះ ស៊ីវ អ៊ី ភេទស្រី អាយុ ៣១ឆ្នាំ, ទី៣- ឈ្មោះ ចេង ណៃស៊ត ភេទស្រី អាយុ ៦៦ឆ្នាំ, ទី៤- ឈ្មោះ ជា ឆោម ភេទប្រុស អាយុ ៧៧ឆ្នាំ, ទី៥- ឈ្នោះ អ៊ឹង ស៊ុយឈៀង ភេទប្រុស អាយុ ១៥ឆ្នាំ, ទី៦- ឈ្មោះ អ៊ឹង ស៊ុយហ្គិច ភេទស្រីអាយុ១០ឆ្នាំ អ្នកទាំង៦នាក់ខាងលើរស់នៅក្នុងភូមិ៣ សង្កាត់២ ក្រុងព្រះសីហនុ ខេត្តព្រះសីហនុ និងទី៧- ឈ្មោះ សូរ ដារ៉ាគន្ធី ភេទស្រី អាយុ៤៥ឆ្នាំ រស់នៅក្នុងភូមិបាជ័យ ឃុំសណ្តាន់ ស្រុកសណ្តាន់ ខេត្តកំពង់ធំ បានស្លាប់ភ្លាមៗនៅកន្លែងកើតហេតុ។
ក្រោយកើតហេតុ នគរបាលចរាចរណ៍ក្រុងច្បារមន សហការជាមួយនគរបាលចរាចរណ៍នាយកដ្ឋានសណ្តាប់ធ្នាប់ យកទៅរក្សាទុកបណ្តោះអាសន្នសិន។
ដោយឡែកសពស្ត្រីជនរងគ្រោះខាងលើ នគរបាលជំនាញបានប្រគល់ជូនសាច់ញាតិក្រុមគ្រួសារដឹកយកទៅធ្វើបុណ្យតាមប្រពៃណី៕
ចែករំលែកព័តមាននេះ