ទីក្រុងម៉ាអាមី៖ ទីភ្នាក់ងារសម្ងាត់អាមេរិកថ្លែងថាខ្លួនទើបតែបាញ់សម្លាប់បុរសម្នាក់ដែលមានកាំភ្លើងនៅក្នុងដៃ និងដែលព្យាយាមជ្រៀតចូលទៅក្នុងភូមិគ្រឹះរបស់លោកដូណាល់ត្រាំនៅរមណីយដ្ឋានម៉ាអាឡាហ្គោ (Mar-a-Lago) នៃរដ្ឋផ្លរីដា។ នៅពេលកើតហេតុនោះ លោកត្រាំមិនបានស្ថិតនៅក្នុងរមណីយដ្ឋាននោះទេ លោកស្ថិតនៅរដ្ឋធានីវ៉ាស៊ីនតោន។
អ្នកនាំពាក្យទីភ្នាក់ងារសម្ងាត់អាមេរិក លោកអេនថូនី ហ្គូគ្លីយែលមី (Anthony Guglielmi) បង្ហោះសារនៅលើបណ្ដាញអ៊ិចថា «បុរសម្នាក់ដែលកាន់កាំភ្លើងនៅក្នុងដៃត្រូវបានបាញ់សម្លាប់ដោយភ្នាក់ងារនៃសេវាសម្ងាត់អាមេរិកបន្ទាប់ពីគាត់ជ្រៀតចូលទៅក្នុងបរិវេណភូមិគ្រឹះរបស់លោកត្រាំទាំងខុសច្បាប់»។ បុរសជាជនសង្ស័យម្នាក់នោះមានអាយុខ្ទង់ម្ភៃឆ្នាំប្លាយ។ ភ្នាក់ងារសម្ងាត់បានឃ្លាំមើលសកម្មភាពរបស់គាត់ដែលអើតឡឺមៗនៅមាត់របងខាងជើងនៃភូមិគ្រឹះ។
បុរសនោះកាន់កាំភ្លើងខ្លី និងកាន់ធុងមានប្រេងឥន្ធនៈនៅក្នុងនោះ។ នេះបើយោងតាមសេចក្ដីប្រកាសរបស់ទីភ្នាក់ងារសម្ងាត់។ ឃើញដូច្នេះ ភ្នាក់ងារសម្ងាត់ក៏ចេញប្រតិបត្តិការចាត់ការបុរសនោះ និងបាញ់កាំភ្លើងជាច្រើនគ្រាប់។ ការប្រទាំងប្រទើសគ្នានោះបណ្ដាលឱ្យបុរសជាជនសង្ស័យស្លាប់ ចំណែកភ្នាក់ងារសម្ងាត់គ្មាននរណាម្នាក់រងរបួសទេ។ តាមពិតនេះមិនមែនជាលើកទីមួយទេដែលលោកដូណាល់ត្រាំប្រឈមនឹងការប៉ងធ្វើឃាត ឬមានបំណងមិនល្អចំពោះរូបលោក។
កាលពីដើមខែកុម្ភៈនេះ បុរសឈ្មោះរ៉ាយអេន រូត (Ryan Routh) វ័យ៥៩ឆ្នាំដែលប៉ុនប៉ងធ្វើឃាតលោកត្រាំនៅទីលានវាយកូនគោលកាលពីខែកញ្ញា ឆ្នាំ២០២៤ត្រូវតុលាការកាត់ទោសឱ្យជាប់ពន្ធនាគារមួយជីវិត។ ពីរខែមុនការប៉ុនប៉ងធ្វើឃាតនោះ បុរសម្នាក់វ័យម្ភៃឆ្នាំឈ្មោះមេតធូ គ្រូក (Mattew Crooks) បាញ់កាំភ្លើងជាច្រើនគ្រាប់សំដៅទៅរកលោកត្រាំក្នុងបំណងធ្វើឃាតលោក។ ប៉ុន្តែគ្រាប់កាំភ្លើងគ្រាន់តែហោះប្រផិតៗក្បាលរបស់លោកតែប៉ុណ្ណោះ។ ហេតុការណ៍នោះកើតឡើងនៅរដ្ឋផឹនស៊ីលវេនៀ (Pennsylvania)។
នៅអំឡុងពេលនោះ លោកត្រាំកំពុងចុះឃោសនាបោះឆ្នោត។ តាមពិត លោកត្រាំមិនប្រាកដជាឈ្នះឆ្នោតនោះទេ។ ប៉ុន្តែមានកត្តា២ដែលជួយឱ្យលោកមានជ័យជម្នះ។ ទីមួយ គណបក្សប្រជាធិបតេយ្យដូរបេក្ខជនប្រធានាធិបតីពីលោកបៃដិនទៅលោកស្រីហារីស។ ពេលវេលាកៀកពេក នៅសល់ត្រឹមតែ១០០ថ្ងៃមុនការបោះឆ្នោត ដូច្នេះលោកស្រីពិបាកនឹងជួយស្រោចស្រង់ស្ថានការណ៍។ ទីពីរ ព្រឹត្តិការណ៍ប៉ុនប៉ងធ្វើឃាតមិនបានសម្រេចពីសំណាក់ជនដៃដល់ឈ្មោះរ៉ាយអេន គ្រូក(Ryan Crooks)។ ព្រឹត្តិការណ៍នេះធ្វើឱ្យប្រជាជនអាមេរិកមានសមានចិត្តចំពោះលោកត្រាំ។ ដោយសារជនដៃដល់បានស្លាប់បាត់ទៅហើយ ដូច្នេះ គោលបំណងនៃការប៉ុនប៉ងធ្វើឃាតនោះនៅតែជាអាថ៌កំបាំងរហូតមកដល់សព្វថ្ងៃ៕ ប្រភព៖ អារ៉ាប់ ញូស៍ (Arab News) និងប្រភពដទៃទៀត
ចែករំលែកព័តមាននេះ