រាជធានីភ្នំពេញ ៖ កម្លាំងសមត្ថកិច្ចការិយាល័យនគរបាលព្រហ្ម ទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ បានធ្វើការឃាត់ខ្លួនជនសង្ស័យ ជាជនជាតិប៉ាគីស្ថានម្នាក់ ពាក់ពន្ធករណីឃាតកម្ម វាយ និងរិតកសម្លាប់ជនរងគ្រោះជាសង្សារ…
រាជធានីភ្នំពេញ ៖ កម្លាំងសមត្ថកិច្ចការិយាល័យនគរបាលព្រហ្ម ទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ បានធ្វើការឃាត់ខ្លួនជនសង្ស័យ ជាជនជាតិប៉ាគីស្ថានម្នាក់ ពាក់ពន្ធករណីឃាតកម្ម វាយ និងរិតកសម្លាប់ជនរងគ្រោះជាសង្សារ ជនជាតិប៉ាគីស្ថានដូចគ្នា ខឹងជនរង គ្រោះជេរប្រមាថដោយប្រើពាក្យថា “អាចុយម្រាយ អាឆ្កែ” ដើរលេងផឹកស៊ី រហូតយប់ជ្រៅ បានចូលផ្ទះ ។
ការឃាត់ខ្លួនជនសង្ស័យពាក់ពន្ធអំពើឃាតកម្មខាងលើនេះ បន្ទាប់ពីសមត្ថកិច្ចជំនាញ បានបើកការស៊ើបអង្កេតស្រាវជ្រាវ អស់រយៈជិតមួយខែកន្លងមក ។
លោកវរសេនីយ៍ឯក អេង សោភា នាយការិយល័យនគរបាលព្រហ្មទណ្ឌកម្រិតធ្ងន់ រាជធានីភ្នំពេញ បានឲ្យដឹងថា កាលពីថ្ងៃទី ៣១ ខែមករា ឆ្នាំ២០២៦ ម៉ោងប្រហែល១៨ និង៣០នាទី នៅចំណុចបន្ទប់ឡៅតឿ “ផ្ទះលេខ៥៥F ផ្លូវលេខ៦៨K ភូមិព្រៃសាលា សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ បានកើតមានអំពើឃាតកម្មមួយ ដោយឃាករ ”យកខ្សែកាបទូរទស្សន៍រឹតក” សម្លាប់ជនរងគ្រោះ ហើយជនជាឃាតករបានគេចខ្លួនបាត់ ។
ជនរងគ្រោះ ឈ្មោះ KANWAL SHAMMSA ភេទស្រី អាយុ ២៨ឆ្នាំ ជនជាតិប៉ាគីស្ថាន មុខរបរមិនពិតប្រាកដ ស្នាក់នៅផ្ទះកើតហេតុ ។
នៅថ្ងៃទី១៩ ខែកុម្ភៈ ឆ្នាំ២០២៦ ដោយមានការបញ្ជាដឹកនាំពីលោកឧត្តមសេនីយ៍ឯក ជួន ណារិន្ទ អគ្គស្នងការរង ជាស្នងការនគរបាលរាជធានីភ្នំពេញ លោកឧត្តមសេនីយ៍ត្រី ប៊ុន សត្យា ស្នងការរងទទួលផែនការងារនគរបាលព្រហ្មទណ្ឌ លោកឧត្តមសេនីយ៍ទោ ញ៉ុង រស់មេត្តា ស្នងការរងទទួលការងារការិយា ល័យនគរបាលព្រហ្មទណ្ឌកម្រិតធ្ងន់ រូបលោកផ្ទាល់ ជានាយការិយាល័យនគរបាលព្រហ្មទណ្ឌកម្រិតធ្ងន់ បានចុះទៅសហការជាមួយអធិការដ្ឋាននគរបាលខណ្ឌពោធិ៍សែនជ័យ និងប៉ុស្តិ៍នគរបាលរដ្ឋបាលកាកាបទី២ បានធ្វើការឃាត់ខ្លួនជនសង្ស័យ តែម្តង ។
ជនសង្ស័យឈ្មោះ HASSAN TAIM00R ភេទប្រុស អាយុ៣៣ឆ្នាំ ជនជាតិប៉ាគីស្ថាន មុខរបរមិនពិតប្រាដក កាន់លិខិតឆ្លងដែនលេខ HJ. (ពុំមានជាប់ខ្លួន) ទីលំនៅផ្ទះកើតហេតុ ។
លោកវរសេនីយ៍ឯក អេង សោភា បន្តថា ក្រោយឃាត់ខ្លួនជនសង្ស័យបានសារភាពថា ៖ កាលពីថ្ងៃទី៣០ ខែមករា ឆ្នាំ២០២៦ វេលាម៉ោងប្រហែល៩យប់ ខ្លួនបានទៅផឹកស៊ី ជាមួយមិត្តភក្តិ នៅបារមាត់ទន្លេ ក្នុងសង្កាត់ផ្សារកណ្ដលទី១ ខណ្ឌដូនពេញ រាជធានីភ្នំពេញ ។ ពេលផឹកស៊ីហើយ វេលាម៉ោងប្រហែល០១រំលងអធ្រាត្រ ឈានចូលថ្ងៃទី៣១ ខែមករា ឆ្នាំ២០២៦ ខ្លួនក៏បានជិះម៉ូតូមកផ្ទះវិញ លុះពេលមកដល់ផ្ទះសង្សាររបស់ខ្លួន(ជនរងគ្រោះ) បានសួរថា ៖ ទៅផឹកស៊ី អីក៏យូរម្លេះ ? ខ្លួនក៏ឆ្លើយថា ធ្វើម៉េចមនុស្សប្រុសដើរលេងផឹកស៊ីជ្រុលម៉ោងបន្តិចហើយ ។ បន្ទាប់មក ស្ត្រីជាសង្សារ បានជេរខ្លួនថា កូនអាឆ្កែ ពេលនោះខ្លួនក៏ខឹងខ្លាំង ស្ទុះទៅទះកំភ្លៀង សង្សារ ៤ដៃ បណ្ដាលឲ្យសន្លប់បាត់បង់ស្មារតី ប៉ុន្តែប្រហែល១០នាទី ក្រោយមកសង្សារ បានដឹងខ្លួនវិញ ។ ក្រោយពេលនាងដឹងខ្លួន ក(បានជេរបន្តទៀតថា “អាចុយម្រាយ អាឆ្កៃ” ដោយឮពាក្យសម្តីជេរដៀលប្រមាថ យ៉ាងដូច្នេះ ខ្លួនមានកំហឹងកាន់តែខ្លាំង ទើបសម្រេចចិត្តទាញផ្ដាច់ខ្សែអុបទិច (ខ្សែកាបទូរទស្សន៍) មកទាក់កសង្សាររហូតដល់ស្លាប់ ។
ជនសង្ស័យសារភាពទៀតថា បន្ទាប់ពីខ្លួនបានធ្វើសកម្មភាពរិតកសម្លាប់សង្សារហើយ ខ្លួនបានហៅមិត្តភក្តិ ឈ្មោះ DAVID ប្រពន្ធឈ្មោះ BATOOL NADLA និងឈ្មោះ MUSIAQ AJAS ឲ្យហៅរថយន្ដតាក់ស៊ី ម៉ាកព្រុស ដឹកសង្សារទៅមន្ទីរពេទ្យ ដើម្បីសង្គ្រោះ តែមិនអាចសង្គ្រោះបាន ដោយជនរងគ្រោះ បានបាត់បង់អាយុជីវិតទៅហើយ បន្ទាប់មកមិត្តភក្តិរបស់ខ្លួន បានទុកសាកសពចោលនៅមន្ទីរពេទ្យ ។
ក្រោយកើតហេតុខ្លួន និងបក្ខពួកបានចាកចេញពីផ្ទះជួល រហូតដល់ថ្ងៃទី១៩ ខែកុម្ភៈ ឆ្នាំ២០២៦ ត្រូវបានសមត្ថកិច្ចឃាត់ខ្លួនបាននៅចំណុចមុខស្ថានទូតប៉ាគីស្ថាន សង្កាត់ទន្លេបាសាក់ ខណ្ឌចំការមន រាជធានីភ្នំពេញ តែម្តង ។ ជនសង្ស័យត្រូវបានសមត្តកិច្ចកសាងសំណុំរឿងបញ្ជូនទៅសាលាដំបូងរាជធានីភ្នំពេញ តាមនីតិវិធី ៕
ចែករំលែកព័តមាននេះ