ខ្លែងឯក និងខ្លែងសេរីជិត ១៤០ កំពុងបង្អួតរាងលើមេឃ នៅខេត្តសៀមរាប
- សៀមរាប
ខេត្តសៀមរាប ៖ រដ្ឋបាលខេត្តសៀមរាប បានប្រារព្ធព្រឹត្តិការណ៍ បុណ្យបង្ហើរខ្លែងឯកខ្មែរ និង ខ្លែងសេរី ក្នុងគោលបំណងធ្វើការផ្សព្វ ផ្សាយ លើកតម្កើន…
ខេត្តសៀមរាប ៖ រដ្ឋបាលខេត្តសៀមរាប បានប្រារព្ធព្រឹត្តិការណ៍ បុណ្យបង្ហើរខ្លែងឯកខ្មែរ និង ខ្លែងសេរី ក្នុងគោលបំណងធ្វើការផ្សព្វ ផ្សាយ លើកតម្កើន មរតកវប្បធម៌ជាតិ ដើម្បីជម្រុញវិស័យទេសចរណ៍ វប្បធម៌ ក្នុងាការទាក់ទាញអ្នកទេសចរណ៍ឱ្យមកកម្សាន្តនៅក្នុងខេត្តសៀមរាបផង។
ពិធីបើកការបង្ហើរខ្លែងឯកខ្មែរ បានដំណើរការទៅក្រោមវត្តមាន របស់ លោក កុយ សង សមាជិកក្រុមប្រឹក្សាខេត្ត តំណាងឯកឧត្តម លី សំរិទ្ធ ប្រធានក្រុម ប្រឹក្សាខេត្ត និងលោក លី សារី អភិបាលរង ខេត្ត តំណាងឯកឧត្តម ប្រាក់ សោភ័ណ អភិបាលនៃគណៈអភិបាលខេត្តសៀមរាប នៅក្នុងបរិវេណអាកាសយានដ្ឋានអន្តរជាតិសៀមរាបចាស់នៅព្រឹកថ្ងៃទី២០ខែកុម្ភះឆ្នាំ២០២៦នេះ។
តាមសេចក្តីរាយការណ៍របស់ លោក មួន សុភាព ប្រធានមន្ទីរវប្បធម៌ និងវិចិត្រសិល្បៈខេត្តសៀមរាប បានលើកឡើងថា ការបង្ហើរ ខ្លែង ឬ ខ្លែងសេរី បានកើតមានឡើងនៅក្នុងប្រពៃណីរបស់ខ្មែរ រាប់ពាន់ឆ្នាំមកហើយ ។
លោកបន្តថា ប៉ុន្តែមួយរយៈកាលកន្លងមកនេះ ខ្លែងខ្មែរ ជាពិសេសខ្លែងឯកនេះ ស្ទើរតែបាត់ បង់ដោយសារតែពលរដ្ឋយើងមួយចំនួនមានជំនឿថា ខ្លែង ជាវត្ថុអពមង្គល តែតាមការពិតខ្លែងនេះដូនតាខ្មែរបង្កើតមកជាវត្ថុតំណាងឱ្យសុភមង្គល។ លោក មួង សុភាព បន្តថា ដោយសារតែជំនឿរមិនសមហេតុផលនេះ ទើបថ្នាក់ដឹកនាំ ស្ថាប័នជាតិបានគិតគូរ និង យកចិត្តទុកដាក់រៀបចំឲ្យមានព្រឹត្តិការណ៍នានាដែលទាក់ទងនឹងខ្លែងនេះ ក្នុងនោះក្រសួងវប្បធម៌និងវិចិត្រសិល្បៈ ក៏មានបំណងយកខ្លែងឯករបស់ខ្មែរនេះ ចុះក្នុងបញ្ជីសម្បត្តិបេតិកភណ្ឌពិភពលោកផងដែរ ។
លោកបញ្ជាក់ថា ដោយសារហេតុនេះទើបក្រសួង វប្បធម៌និងវិចិត្រសិល្បៈ ខិតខំបំផុសចលនាបង្ហើរខ្លែងនេះ ព្រោះការចូលជាសម្បត្តិបេតិក ភណ្ឌពិភពលោកនេះ យើងអាចអភិរក្ស និង ផ្សព្វផ្សាយអំពីខ្លែងយើងបានទូលំទូលាយ។ លោក មួន សុភាព បញ្ជាក់ថា ការបង្ហោះខ្លែងនេះ នឹងក្លាយជាព្រឹត្តិការណ៍ប្រចាំឆ្នាំ ២០២៦ នេះ បានទទួលពាក្យ បេក្ខជន បេក្ខនារីប្រកួតខ្លែងឯក ខ្លែងសេរី និង ចំនួនខ្លែងដែលត្រូវចូលរួមក្នុងព្រឹត្តិការណ៍មានសរុបចំនួន១៣៨ ក្នុងនោះ ខ្លែងឯកមានចំនួនសរុប ៩៣ ខ្លែង ឯក ខ្លែងសេរីមានចំនួនសរុប ៤៥ ខ្លែង ។
ថ្លែងនៅក្នុងពិធីបើកព្រឹត្តិការណ៍បុណ្យបង្ហើរខ្លែងឯកខ្មែរ និងខ្លែងសេរីនេះលោក លី សារី បានលើកឡើងថា ការបង្ហើរខ្លែងខ្មែរ មិនគ្រាន់តែបង្កបរិយាកាសឱ្យប្រជាពលរដ្ឋ សាធារណជន ទស្សនាប្រកបដោយសេចក្ដីសប្បាយរីករាយប៉ុណ្ណោះទេ ប៉ុន្តែវាជាការផ្ទេរនូវចំណេះដឹងខាងទំនៀមទម្លាប់ប្រពៃណី ដល់យុវជនជំនាន់ក្រោយឲ្យបានស្គាល់ យល់ ដឹង និង ចូលរួមប្រតិបត្តិថែរក្សាការពារ លើក ស្ទួយអត្តសញ្ញាណជាតិតម្លៃវប្បធម៌អរូបី ព្រម ទាំងចូលរួមយ៉ាងសកម្មក្នុងការសិក្សាស្រាវ ជ្រាវ ចងក្រងរក្សាទុកនូវឯកសារបេតិកភណ្ឌវប្បធម៌នេះ ឱ្យបានស្ថិតស្ថេរ គង់វង្ស ។
លោក លី សារី បន្តថា ព្រឹត្តិការណ៍បុណ្យបង្ហើរខ្លែងឯកខ្មែរ និងខ្លែងសេរី ប្រារព្ធធ្វើជាលើកទី២ នៅខេត្តសៀមរាប ដែលជាចលករ មួយចូលរួមចំណែកយ៉ាងសំខាន់ ក្នុងការទាក់ ទាញកំណើនភ្ញៀវទេសចរជាតិ និងអន្តរជាតិ ឲ្យមកទស្សនាខេត្តសៀមរាបកាន់តែច្រើន ឡើងផងដែរ ។ ទន្ទឹមនឹងនេះ សម្រាប់ឆ្នាំ ២០២៧ខាងមុខ ដើម្បីបន្តរក្សាកំណើន និង ទាក់ទាញភ្ញៀវទេសចរ និង ថែរក្សាបាននូវប្រពៃណីទំនៀមទម្លាប់ជាតិយើង ក្នុងនាមអាជ្ញាធរខេត្តសៀមរាប លោកបានធ្វើការអំពាវនាវដល់ថ្នាក់ដឹកនាំមន្ទីរ អង្គភាព រដ្ឋ បាលក្រុង ស្រុក វិស័យឯកជន បងប្អូនប្រជា ពលរដ្ឋ ភ្ញៀវទេសចរជាតិ និង អន្តរជាតិទាំង អស់មេត្តាបន្តគាំទ្រឱ្យបានផុលផុស ដើម្បីបន្តការរៀបចំនូវកម្មវិធី និងព្រឹត្តិការណ៍នានា ក្នុងខេត្តសៀមរាបយើងនៅឆ្នាំបន្តបន្ទាប់ទៀត ។
សូមជម្រាបថា ព្រឹត្តិការណ៍បង្ហើរខ្លែងនេះ មានខ្លែងឯក ខ្លែងសេរី និងខ្លែងតូចៗ ហើយព្រឹត្តិការណ៍នេះមាន រយៈពេលបីថ្ងៃចាប់ពីថ្ងៃទី២០ដល់ថ្ងៃទី២២ខែកុម្ភះឆ្នាំ២០២៦ ក៏មានបងប្អូនអ្នកស្រឡាញ់និងលេងខ្លែងមកពីបណ្ដាខេត្តផ្សេងៗ និងបានចូលរួមផងដែរ ៕
ចែករំលែកព័តមាននេះ