យោងតាមការចុះផ្សាយពីប្រភពបរទេស ការជ្រើសរើសបន្លែដែលមានពណ៌ចម្រុះនៅលើចានបាយ មិនមែនត្រឹមតែដើម្បីសោភណភាពប៉ុណ្ណោះទេ ប៉ុន្តែពណ៌នីមួយៗគឺជា “លេខកូដ” តំណាងឱ្យសារធាតុចិញ្ចឹមដែលរាងកាយមិនអាចខ្វះបាន។ ជាក់ស្តែង បន្លែពណ៌បៃតងដូចជាស្ពៃ ឬប្រូខូលី សម្បូរទៅដោយក្លរ៉ូហ្វីល…
យោងតាមការចុះផ្សាយពីប្រភពបរទេស ការជ្រើសរើសបន្លែដែលមានពណ៌ចម្រុះនៅលើចានបាយ មិនមែនត្រឹមតែដើម្បីសោភណភាពប៉ុណ្ណោះទេ ប៉ុន្តែពណ៌នីមួយៗគឺជា “លេខកូដ” តំណាងឱ្យសារធាតុចិញ្ចឹមដែលរាងកាយមិនអាចខ្វះបាន។
ជាក់ស្តែង បន្លែពណ៌បៃតងដូចជាស្ពៃ ឬប្រូខូលី សម្បូរទៅដោយក្លរ៉ូហ្វីល និងវីតាមីនដែលជួយចិញ្ចឹមឈាម សម្រួលដល់ការរំលាយអាហារ និងគ្រប់គ្រងកម្រិតជាតិស្ករក្នុងឈាមបានយ៉ាងល្អ។ ចំណែកបន្លែពណ៌ក្រហមដែលបានមកពីប៉េងប៉ោះ ឬមើមប៊ីត ផ្តល់នូវសារធាតុលីកូពីន ដែលមានតួនាទីយ៉ាងសំខាន់ក្នុងការការពារសុខភាពបេះដូង ទប់ស្កាត់ជំងឺមហារីក និងជួយឱ្យស្បែកភ្លឺថ្លាពីខាងក្នុង។
ចំពោះបន្លែពណ៌លឿង និងទឹកក្រូច ដូចជាការ៉ុត និងល្ពៅវិញ គឺសម្បូរទៅដោយបេតាការ៉ូទីន ដែលជាអ្នកឯកទេសខាងថែរក្សាសុខភាពភ្នែក និងការពារស្បែកពីការខូចខាតផ្សេងៗ។ ដោយឡែក ពណ៌ស្វាយពីស្ពៃក្តោបស្វាយ ឬត្រប់វែង ជួយកាត់បន្ថយការរលាកក្នុងរាងកាយ ពន្យារភាពចាស់ និងការពារកោសិកាខួរក្បាលឱ្យរឹងមាំ ខណៈបន្លែពណ៌សដូចជាខ្ទឹមស និងផ្កាខាត់ណា មានសមត្ថភាពប្រឆាំងបាក់តេរី និងមេរោគ ព្រមទាំងជួយពង្រឹងប្រព័ន្ធភាពស៊ាំ និងបញ្ចុះកូឡេស្តេរ៉ុលបានយ៉ាងមានប្រសិទ្ធភាព។
ដើម្បីទទួលបានអត្ថប្រយោជន៍ពេញលេញពីបន្លែទាំងនេះ លោកអ្នកគួរយកចិត្តទុកដាក់លើការលាងជម្រះឱ្យបានស្អាតដោយត្រាំទឹកអំបិល ឬទឹកខ្មេះរយៈពេល ១៥ នាទី ដើម្បីជម្រះជាតិគីមី និងជៀសវាងការចម្អិនដោយប្រើកម្ដៅខ្លាំងពេកដែលនាំឱ្យបាត់បង់វីតាមីន។
ការទទួលទានចម្រុះទាំងឆៅ និងឆ្អិន ក៏ជាគន្លឹះសំខាន់ក្នុងការស្រូបយកសារធាតុចិញ្ចឹមខុសៗគ្នា ហើយការបន្ថែមប្រេងដែលមានសុខភាពល្អដូចជាប្រេងអូលីវ ឬប្រេងល្ង នឹងរឹតតែជួយឱ្យរាងកាយស្រូបយកវីតាមីនដែលរលាយក្នុងខ្លាញ់បានកាន់តែប្រសើរថែមទៀតផង៕
ចែករំលែកព័តមាននេះ