ខេត្តបាត់ដំបង ៖ ប្រភពព័ត៌មាននៅតំបន់ព្រំដែនបានឲ្យដឹងថា ពួកទាហានថៃ និងក្រុមអភិរក្សសត្វព្រៃបានរឹបអូសសត្វព្រៃ (សត្វត្រកួត ឬហៅសត្វបង្គូយយក្ស និងសត្វកន្ធាយ) យ៉ាងតិចជាង១០០ក្បាល កាលពីថ្ងៃទី១៨…
ខេត្តបាត់ដំបង ៖ ប្រភពព័ត៌មាននៅតំបន់ព្រំដែនបានឲ្យដឹងថា ពួកទាហានថៃ និងក្រុមអភិរក្សសត្វព្រៃបានរឹបអូសសត្វព្រៃ (សត្វត្រកួត ឬហៅសត្វបង្គូយយក្ស និងសត្វកន្ធាយ) យ៉ាងតិចជាង១០០ក្បាល កាលពីថ្ងៃទី១៨ កុម្ភៈ ដែលក្រុមឈ្មួញទុច្ចរិតច្រកក្នុងការ៉ុងដឹកយកទៅលាក់ទុកក្នុងព្រៃមួយកន្លែង ក្បែរមាត់អូរព្រំដែន ក្នុងភូមិសាស្ត្រ ស្រុកខ្នងហាត ខេត្តស្រះកែវ ទល់នឹងស្រុកសំពៅលូន ខេត្តបាត់ដំបង ដើម្បីត្រៀមនាំឆ្លងអូរព្រំដែនចូលប្រទេសកម្ពុជាដោយខុសច្បាប់ ។
បើតាមប្រភពព័ត៌មានដែលទទួលបានរបាយការណ៍នេះ ពីសមត្ថកិច្ចថៃបានឲ្យដឹងថា សត្វព្រៃទាំងនោះ មានប្រភេទសត្វត្រកួត ឬហៅថា សត្វបង្គួយយក្សចំនួន១០៦ក្បាល និងសត្វកន្ធាយចំនួន០២ក្បាលទៀត ដែលក្រុមឈ្មួញទុច្ចរិតច្រកក្នុងការ៉ុង រួចដឹកយកទៅលាក់ទុកក្នុងព្រៃក្បែរអូរព្រំដែនកម្ពុជា-ថៃ ។
ប្រភពបានរាយការណ៍ថា ប្រជាជនថៃបានប្រទះឃើញការ៉ុងច្រកសត្វព្រៃទាំងនោះ រួចរាយការណ៍ប្រាប់ក្រុមទាហានថៃ ទើបគេទំនាក់ទំនងបន្តទៅកាន់ក្រុមអភិរក្សសត្វព្រៃ មកពិនិត្យ និងរឹបអូសយកតែម្ដង ។
ដោយឡែក ប្រភពខាងមន្ត្រីព្រំដែនកម្ពុជាវិញបាននិយាយដែរថា បើតាមពិនិត្យលើសកម្មភាពដឹកជញ្ជូនសត្វព្រៃ ដោយក្រុមឈ្មួញទុច្ចរិត យកមកលាក់នៅក្បែរព្រំដែនខាងទឹកដីថៃ ខាងលើ ហើយត្រូវបានទាហានថៃខ្លួនឯងរុករកឃើញនេះ គឺពួកឈ្មួញគ្រាន់តែយកទៅលាក់ទុកបណ្ដោះអាសន្នក្នុងរយៈពេលខ្លី រង់ចាំឱកាសល្អ លួចនាំចូលប្រទេសកម្ពុជា ដោយខុសច្បាប់តែម្ដង។
បើតាមការស្រាវជ្រាវអាចមានពួកឈ្មួញខ្មែរ ត្រូវរ៉ូវគ្នាជាមួយពួកឈ្មួញទុច្ចរិតថៃ ក្នុងការលួចរត់ពន្ធបទល្មើសសត្វព្រៃនេះ ប៉ុន្តែសំណាងអាក្រក់របស់ពួកគេ ត្រូវបានក្រុមសមត្ថកិច្ចថៃរកឃើញ និងរឹបអូសយកអស់មុនពេលផ្លោះឆ្លងអូរព្រំដែនចូលប្រទេរសកម្ពុជា ៕
ចែករំលែកព័តមាននេះ