ជិត២៩តោន ! ប្រហិត និងសាច់បង្កកខូចគុណភាព ត្រូវបានដុតកម្ទេចចោលនៅហូជីមិញ
ហូជីមិញ ៖ ប្រហិត សាច់ក្រក ហតដក ប៉ាតេ និងចំណីអាហារសុទ្ធតែពេញនិយមជិត២៩តោន ត្រូវបានបង្ក្រាបទាន់ពេល សាកស្រមៃមើល បើទំនិញទាំងនេះ…
ហូជីមិញ ៖ ប្រហិត សាច់ក្រក ហតដក ប៉ាតេ និងចំណីអាហារសុទ្ធតែពេញនិយមជិត២៩តោន ត្រូវបានបង្ក្រាបទាន់ពេល សាកស្រមៃមើល បើទំនិញទាំងនេះ អាចនឹងត្រូវចែកចាយទៅតាមភោជនីយដ្ឋាន ហាងអាហារ និងពេលជួបជុំក្រុមគ្រួសារពេលចូលឆ្នាំ តើនឹងងមានរឿងអ្វីកើតឡើងទៅ?
កំលុងពិធីបុណ្យចូលឆ្នាំថ្មីប្រពៃណីចិន-វៀតណាម អាជ្ញាធរក្នុងទីក្រុងហូជីមិញ និងបណ្តាខេត្តក្រុងនានា បានស្ទាក់ឆែកឆេររថយន្តដឹកទំនិញចំណីអាហារ ដោយរកឃើញអាហាររាប់តោនខូចគុណភាព និងគ្មានប្រភពច្បាស់លាស់ ដោយផលិតចំណីអាហារ និងសាច់បង្កកក្នុងបរិមាណដ៏ច្រើនសន្ធឹកសន្ធាប់ទាំងនោះត្រូវគេដឹងថា សម្រាប់ត្រៀមផ្គត់ផ្គង់តាមទីផ្សារ ដែលនឹងបង្កហានិភ័យខ្ពស់ដល់សុវត្ថិភាពចំណីអាហារ និងប៉ះពាល់ផ្ទាល់ដល់សុខភាពអ្នកប្រើប្រាស់ ។
ជាក់ស្តែងថ្មីៗនេះ ប៉ូលិសសេដ្ឋកិច្ចទីក្រុងហូជីមិញបានដុតកម្ទេចោលនូវផលិតផលអាហារ និងសាច់បង្កកចម្រុះរហូតដល់ជិត ២៩ តោន បន្ទាប់ពីរឹបអូសបានពីរថយន្តដឹកទំនិញក្លាសេចំនួន ២គ្រឿង ។ យោងតាមសារព័ត៌មាន VietnameNet បានឱ្យដឹងថា នៅថ្ងៃទី១៤ ខែកុម្ភៈកន្លងទៅ ប៉ូលិសសេដ្ឋកិច្ចក្រុងហូជីមិញបាន បានឆែកឆែរ រថយន្តដឹកទំនិញចំនួនគ្រឿង ដែលកំពុងចតនៅក្នុងចំណតរថយន្តតាមបណ្តោយផ្លូវ Le Thi Rieng សង្កាត់ Thoi An ទីក្រុងហូជីមិញ។
ក្នុងអំឡុងពេលឆែកឆេរ អាជ្ញាធរបានរកឃើញ និងរឹបអូសអាហារក្លាសេគ្មានប្រភពដើមជាង២៨,៨ តោន រួមមាន ៖ កន្សោមដោះជ្រូក៖ ១៣,៩០០គីឡូក្រាម, ខ្លាញ់ជ្រូក ៖ ១,០០០គីឡូក្រាម, ឆ្អឹងជ្រូក ៖ ៣៦០ គីឡូក្រាម, ពងមាន់ខ្ចី៖ ៥២០ គីឡូក្រាម, ទ្រូងក្ងាន៖ ៣២០ គីឡូក្រាម, នំប៉ាវ ៖ ១,២៤៥ គីឡូក្រាម, សាច់ក្រក៖ ៨,៣៧៤ គីឡូក្រាម, ខ្វាគោ៖ ២៤០ គីឡូក្រាម, ហតដក ៖ ២,១០០ គីឡូក្រាម និង ប្រហិតចម្រុះ៧៦៥គីឡូក្រាម ដោយគិតជាតម្លៃសរុបជាង ២,៣ប៊ីលានដុង ឬប្រហែល៩ម៉ឺនដុល្លារ។
យោងតាមចម្លើយសារភាពរបស់អ្នកបើកបរ និងម្ចាស់ទំនិញ បានឱ្យដឹងថា ប្រភេទអាហារទាំងនេះត្រូវបានប្រមូលទិញចេញពីប្រភពផ្សេងៗជាពិសេសតាមរយៈបណ្តាញសង្គម ហើយដឹកជញ្ជូនពីទីក្រុងហាណូយ មកទីក្រុងហូជីមិញ ដោយត្រូវយកទៅផ្គត់ផ្គង់នៅតាមទីផ្សារកន្លែងជាច្រើន រួមទាំងភោជនីយដ្ឋាន និងអាជីវកម្មលក់អាហារតាមដងផ្លូវទូទាំងទីក្រុង ។
គួរកត់សម្គាល់ថា ជនសង្ស័យបានប្រើប្រាស់ល្បិចផ្សេងៗដើម្បីគេចពីភ្នែកប៉ូលិស ដូចជាការផ្លាស់ប្តូរមធ្យោបាយដឹកជញ្ជូន ការធ្វើដំណើរតាមផ្លូវច្រើនខ្សែ និងការស្តុកទុកទំនិញនៅតាមផ្សារបោះដុំ កន្លែងទំនេរ ឬការដ្ឋានសំណង់ជាដើម ។
ប៉ូលិសទីក្រុងហូជីមិញ បានផាកពិន័យរដ្ឋបាល និងបញ្ជាឱ្យកម្ទេចចោលនូវអាហារក្លាសេគ្មានប្រភពដើមទាំងអស់ចំនួន ២៨,៨២៤គីឡូក្រាម ស្របតាមច្បាប់ ។ បន្ទាប់ពីហេតុការណ៍នេះ ប៉ូលិសទីក្រុងហូជីមិញ បានណែនាំឱ្យប្រជាពលរដ្ឋប្រើប្រាស់ តែអាហារដែលមានប្រភពច្បាស់លាស់ និងមិនត្រូវប្រើប្រាស់ផលិតផលដែលហួសកំណត់ កកិតខូចទ្រង់ទ្រាយ មានសញ្ញាស្អុយរលួយ ប្តូរពណ៌ ឬមានក្លិននិងរសជាតិមិនធម្មតា ។
ពេលរកឃើញសញ្ញាសង្ស័យណាមួយនៃអាហារមិនមានសុវត្ថិភាព ប្រជាពលរដ្ឋគួរសាយការណ៍ជាបន្ទាន់ទៅកាន់ប៉ុស្តិ៍ប៉ូលិសដែលនៅជិតបំផុត ។ សម្រាប់អាជីវកម្មដែលដំណើរការឃ្លាំង ចំណតរថយន្ត និងកន្លែងផ្ទុកទំនិញ ចាំបាច់ត្រូវអនុវត្តតាមបទប្បញ្ញត្តិច្បាប់ឱ្យបានម៉ឺងម៉ាត់ មិនត្រូវផ្តល់ទីតាំងសម្រាប់ផ្ទុកទំនិញគេចពន្ធ ទំនិញហាមឃាត់ ឬទំនិញគ្មានប្រភពដើមឡើយ និងត្រូវសហការផ្តល់ព័ត៌មានដល់អាជ្ញាធរនៅពេលរកឃើញសញ្ញានៃការរំលោ.ភច្បាប់ ដើម្បីរួមចំណែកធានាសុវត្ថិភាពចំណីអាហារ និងរក្សាសន្តិសុខសណ្តាប់ធ្នាប់ក្នុងតំបន់ ៕
ចែករំលែកព័តមាននេះ