ខេត្តត្បូងឃ្មុំ: ពិធីចាប់ត្រីបែបប្រពៃណីពីបុរាណត្រូវបានរក្សារហូតមកដល់សព្វថ្ងៃមានរាប់រយឆ្នាំមកហើយ ។ ជាក់ស្ដែងនៅត្រពាំងក្រម ភូមិសាទុំ ឃុំជាំក្រវៀនស្រុកមេមត់ បានកំណត់ពេលវេលាចាប់ត្រីដោយធ្វើឡើងម៉ោង៩និង៣០នាទីព្រឹកថ្ងៃទី១៤ កុម្ភៈ ឆ្នាំ២០២៦ គេសង្កេតឃើញមនុស្សម្នាក្មេងចាស់ប្រុសស្រីមកពីគ្រប់ទិសទីមានរហូតដល់រាប់ពាន់នាក់ចុះចាប់ត្រី…
ខេត្តត្បូងឃ្មុំ: ពិធីចាប់ត្រីបែបប្រពៃណីពីបុរាណត្រូវបានរក្សារហូតមកដល់សព្វថ្ងៃមានរាប់រយឆ្នាំមកហើយ ។ ជាក់ស្ដែងនៅត្រពាំងក្រម ភូមិសាទុំ ឃុំជាំក្រវៀនស្រុកមេមត់ បានកំណត់ពេលវេលាចាប់ត្រីដោយធ្វើឡើងម៉ោង៩និង៣០នាទីព្រឹកថ្ងៃទី១៤ កុម្ភៈ ឆ្នាំ២០២៦ គេសង្កេតឃើញមនុស្សម្នាក្មេងចាស់ប្រុសស្រីមកពីគ្រប់ទិសទីមានរហូតដល់រាប់ពាន់នាក់ចុះចាប់ត្រី ដោយទឹកមុខស្រស់ញញឹមសប្បាយរីករាយ ជាមួយនោះកម្លាំងសមត្ថកិច្ចមាននគរបាលអាវុធហត្ថ ត្រូវបានដាក់ពង្រាយតាមគោលដៅ ដើម្បីពង្រឹងសន្តិសុខនិងសណ្ដាប់ធ្នាប់ជូនដល់បងប្អូនមកកំសាន្តលេងផងដែរ។
លោកហេង ពិសិដ្ឋ ប្រធានមន្ទីរកសិកម្មរុក្ខាប្រមាញ់និងនេសាទខេត្តត្បូងឃ្មុំមានប្រសាសន៍ឲ្យដឹងថា: នៅក្នុងរដូវវស្សាកន្លងទៅឯកឧត្តមទឹម បូរក្ស អនុរដ្ឋលេខាធិការក្រសួងកសិកម្មរួមទាំងមន្ត្រីជំនាញក្រោមឱវាទបានយកកូនត្រីចម្រុះចំនួន៥ម៉ឺនកូនលែងនៅតំបន់ត្រពាំងក្រម ប្រយោជន៍ដើម្បីឲ្យពពួកមច្ឆាទាំងនោះ បានពងកូនសំបូរបែបនៅពេលមានកម្មវិធីប្រតិ្តការណ៍ចាប់ត្រី ។ក្នុងទិដ្ឋភាពនោះការដឹកនាំចាប់ត្រីសប្បាយលេងគឺមានការចូលរួមពីសំណាក់ឯកឧត្តមប៉ែន កុសល្យអភិបាលខេត្ត ព្រមទាំងអភិបាលរងខេត្តអមដោយប្រធានមន្ទីរអង្គភាពពាក់ព័ន្ធ។
លោកប្រធានមន្ទីរកសិកម្មខេត្តមមានប្រសាសន៍បន្តឲ្យដឹងទៀតថា ចំពោះលក្ខខណ្ឌឧបករណ៍នេសាទបែបបុរាណដែលតម្រូវឲ្យចុះចាប់ត្រីគឺមានអង្រុតនិងឈ្នាង គ្រាន់តែដល់ម៉ោងគឺម្នាក់ៗបានត្រៀមលក្ខណៈសម្បត្តិចុះចាប់ដោយព្រមៗគ្នាតែម្ដង ។ គឺមនុស្សក្មេងចាស់ប្រុសស្រីចុះចាប់ឡើងណែនពេញត្រពាំងក្រម ដែលអាចដល់ខ្ទង់ម៉ឺននាក់ អ្នកខ្លះចាប់បានត្រីកំផ្លៀញ ត្រីឆ្លាំងត្រីរ៉ស់ ត្រីឡាត មានតូចមានធំដោយមានឧបករណ៍ស្ពាយសម្រាប់ដាក់ត្រីពេលពិនិត្យមើលថាសមល្មមហើយមានអ្នកខ្លះបានឡើងមកលើគោកដោយបង្កាត់ភ្លើងអាំងត្រីនៅក្រោមម្លប់ឈើជួបជុំមិត្តភក្តិក្រុមគ្រួសារទទួលទានអាហារសប្បាយលេង ដែលមួយឆ្នាំមានតែម្ដង។
ហើយការចុះចាប់នេះទឹកក្រោមចង្កេះមនុស្សចាស់ មានបងប្អូន ៤ទៅ៥នាក់មកពីស្រុកតំបែរបានចាប់ត្រីបានរហូតដល់ជាង៣០គីឡូ ជាមួយនោះឯកឧត្តមអភិបាលខេត្តក៏បានលើកទឹកចិត្តផ្ដល់ប័ណ្ណសរសើរអ្នកដែលទទួលបានជ័យលាភីចាប់ត្រីច្រើនជាងគេ។
សូមបញ្ជាក់ថា ដើម្បីថែរក្សាអភិរក្សត្រីឲ្យគង់វង្សនៅត្រពាំងក្រម គឺមន្ទីរកសិកម្មខេត្តបានបង្កើតឲ្យមានសហគមន៍ដោយមានដាំដើមឈើបន្ថែមសម្រាប់ជាម្លប់ពេលដែលរដូវកម្មវិធីចាប់ត្រីបែបបុរាណឈានចូលមកដល់។
លោកប្រធានមន្ទីរកសិកម្មខេត្តបានបញ្ជាក់ថាចំពោះទិដ្ឋភាពជារួមមនុស្សដែលមកចាប់ត្រីនៅឆ្នាំនេះគឺមានចំនួនច្រើនជាងឆ្នាំកន្លងទៅ ហើយត្រីដែលបងប្អូនប្រជាពលរដ្ឋចុះចាប់ដោយប្រើឧបករណ៍អង្រុតនិងឈ្នាងគឺទិន្នផលមានការកើនឡើងដោយសារតែមានការយកចិត្តទុកដាក់ពីក្រសួងកសិកម្មក៏ដូចជាអាជ្ញាធរពាក់ព័ន្ធថ្នាក់ខេត្តដល់មូលដ្ឋាន។ហើយមុនពេលពិធីចាប់ត្រីគឺគេបានដាក់កម្លាំងយាមប្រចាំការទាំងយប់ទាំងថ្ងៃដោយមិនអនុញ្ញាតឲ្យប្រជាពលរដ្ឋណាម្នាក់ចូលទៅនេសាទនៅចំណុចត្រពាំងក្រម ដោយខុសច្បាប់នោះទេ។
សកម្មភាពចាប់ត្រីដែលរៀបចំឡើងដោយរដ្ឋបាលខេត្តត្បូងឃ្មុំគឺបានទាក់ទាញមនុស្សមកពីតាមបណ្ដាខេត្តនានាជុំវិញខេត្តត្បូងឃ្មុំមកលេងកម្សាន្តច្រើនកុះករដល់រាប់ម៉ឺននាក់ឯណោះ។ ដើម្បីបង្កើតនូវភាពសប្បាយរីករាយក៏មានការប្រគំតន្ត្រីខ្នាតធំដែលបានធ្វើឡើងនាយយប់ថ្ងៃទី១៤កុម្ភៈ ចំថ្ងៃបុណ្យនៃក្តីស្រឡាញ់ ក្រៅពីប្រជាពលរដ្ឋកម្ពុជាក៏មានបងប្អូនវៀតណាមបានមកចូលរួមចាប់ត្រីបង្កើតភាពសប្បាយរីករាយក្នុងទឹកមុខស្រស់ញញឹមជាអ្នកធំផងរបងជាមួយ ៕
ចែករំលែកព័តមាននេះ